26°C , Partly sunny | Kigali-Rwanda

Mashariki African Firm Festival yasubitswe kubera Coranavirus

Yanditswe na Ndamyirokoye François

Ku ya 16-03-2020 saa 17:29:51
Bimwe mu bihembo bijya bitangwa muri iryo serukiramuco

Iserukiramuco rya sinema ribera mu Rwanda, Mashariki African Film Festival ryari kuzatangira tariki 21 Werurwe 2020 ryasubitswe bitewe n’icyorezo cya Coronavirus gikomeje gukwirakwira ahantu hatandukanye ku Isi.

Abategura iri rushanwa babinyujije ku rukuta rwabo rw’urubuga rwa Twitter batangaje ko bafashe umwanzuro wo gusubika iryo serukiramuco ryari rigiye kuba ku nshuro yaryo ya 6.

Ati “Twafashe umwanzuro wo gusubika iserukiramuco ryo kuri iyi nshuro kubera ikibazo cya Coranavirus ikomeje guhangayikisha Isi yose”.

Iri serukiramuco ryari kuzatangira ku ya 21 rikagera ku ya 24 Werurwe 2020. Igihe rizasubukurirwa kizatangazwa mu gihe ubuyobozi bw’Umujyi wa Kigali buzaba bwakomoreye ibikorwa by’imyidagaduro n’ibitaramo.

Iri serukiramuco ryari rigiye kuba ku nshuro ya Gatandatu ryari kuzerekanwamo firime 12 mu kiciro cya firime ndende nyafurika harimo iyitwa Karani Ngufu yakozwe n’Abanyarwanda.

Mu kiciro cya firime mbarankuru nyafurika hari kuzerekanwa firime 15 harimo iyitwa “The 600: The Soldiers Story” iherutse kwegukana igihembo muri Leta Zunze Ubumwe z’Amerika.

Ikiciro cya firime ngufi nyafurika kirimo firimi 19 harimo iyitwa “I Got My Things and Left” ya Philbert Aimee Mbabazi Sharangabo mu gihe mu kiciro cya firime ngufi zo mu Rwanda harimo firime 12.

Ikiciro cya firime ngufi zo muri Afurika y’u Burasirazuba kigizwe na firime esheshatu, harimo iyitwa “Entanglement” y’Umunyarwanda Patrick Karambizi.

Ikiciro cya Panorama kigizwe na firime eshanu harimo iyitwa “Notre Damme Du Nil” yakozwe na Atiq Rahim ashingiye ku gitabo cy’umunyarwandakazi Scholastique Mukasonga.

Nyuma y’iri serukiramuco hatangwa ibihembo bitandukanye kuri firime zahize izindi mu rwego rwo gushyigikira abakora umwuga wa sinema.

Ku rundi ruhande icyorezo cya Coronavirus gikomeje kuba ikibazo gihangayikishije Isi yose. Ingamba zitandukanye zikomeje gufatwa mu rwego rwo kugabanya umubare w’abandura ndetse ibihugu itarageramo bikomeje kugira amakenga ngo hatagira umuturage n’umwe ufatwa.

U Rwanda rwafashe ingamba zo kongera isuku ahantu hahurira abantu benshi, aho abantu babanza gukaraba intoki mbere yo kwinjira mu nyubako iyo ari yose itangirwamo serivisi, ubu nta gusuhuzanya mu ntoki ndetse n’ibikorwa by’imyidagaduro muri Kigali byarahagaritswe kuva tariki 08 Werurwe 2020.

Umwanditsi:

Ndamyirokoye François

Tanga Igitekerezo

Email yanyu ntigaragazwa ku rubuga. Amazina na Email ni ngombwa.