22°C , Partly sunny | Kigali-Rwanda

Mani Martin yababajwe n’Abana bo ku Nyundo baserukanye indirimbo ye batabimusabye

Yanditswe na Ndamyirokoye François

Ku ya 12-10-2019 saa 17:51:56
Umuhanzi Mani Martin

Maniraruta Martin  uzwi mu muziki nka  Mani Martin yababajwe  n’uko indirimbo ye yakoreshejwe na bamwe mu  banyeshuri biga umuziki ku Nyundo mu iserukiramuco baherutse kwitabira  ryabereye muri Tanzania.

Iri serukiramuco aba banyeshuri baririmbyemo iyi ndirimbo  ryitwa JAMA Fest, abo banyeshuri akaba  ari bamwe mu baryitabiriye baturutse mu Rwanda.

Indirimbo ya Mani Martin baririmbye byatumye arakara ni iyitwa “Afro” akaba yagaragaje ko atabyishimiye binyuze ku mbuga nkoranyambaga zitandukanye akoresha.

Kubabara kwe kwaje nyuma y’uko yabonye amashusho  yabo barimo kuyiririmba mu gihe batigeze babimusabira uburenganzira.

Mani Martin yavuze ko ari ibintu bigayitse agira ati “Biba bibabaje iyo uri umuhanzi umuntu agakoresha igihangano cyawe kandi nawe uhari wakabaye wifashishwa ukakikoreshereza”.

Yakomeje avuga ko atari ubwa mbere ibi bimubayeho, ati, “Hari n’ibindi bihe byagiye bimbaho nuko nagiye nicecekera ariko sinakomeza guceceka.”

Mani Martin avuga ko yandikiye Urugaga rwa muzika nyarwanda arusaba kumuvuganira ndetse no kumenyesha inzego zinyuranye ko ibyakozwe bihabanye n’amategeko arengera iby’umutungo kamere w’ubwenge.

Ibirebana n’ibyo yanditse ku mbuga nkoranyambaga avuga ukuntu yababaye avuga  ko yabikoze ashaka kumenyesha inzego zinyuranye ko ibyakozwe bidakwiye   ko bitanakwiye gukomeza kubaho mu muziki w’u Rwanda.

Ku bwe avuga ko   aba banyeshuri batakagombye gukoresha ibihangano by’abandi bahanzi kuko biga umuziki kandi kimwe mu byo bakabaye biga harimo no guhanga.

Yagize ati  “Biga umuziki, kimwe mu byo bakwigishijwe ni uguhanga ibihangano kandi byiza bashobora no guserukana”.

Uyu muhanzi asanga inzego zitumira abahanzi zakagombye kumenya ko nyiri igihangano igihe ahari atigeze abura yagahawe amahirwe yo gutumirwa agakoresha igihangano cye aho gufata abandi ngo babe ari bo babyaza inyungu ibyo yahanze.

Mani atangaza ko nta  rundi rwego ateganya kuregera ahubwo asaba inzego zibishinzwe gukurikirana iki kibazo ntikizongere ukundi.

Uyu muhanzi ahamya ko na we ajya akoresha ibihangano by’abandi yiga cyangwa yitoza kuririmba ariko ngo ntashobora kubikoresha mu buryo bubyara inyungu atabifitiye uburenganzira.

Abisobanura yagize ati “Kuba umunyeshuri yakwigira ku ndirimbo yanjye nta kibazo kibirimo ariko nanone ntibikomeze gukoreshwa babibyaza umusaruro kandi njye nta nyungu mbifitemo”.

Umuhanzi Intore Tuyisenge uhagarariye Urugaga rw muzika nyarwanda  yavuze ko ibaruwa ya Mani Martin  bayakiriye ngo kandi barimo gukurikirana ikibazo.

Avuga ko kandi nk’urugaga bagiye guhuza impande zose zirebwa n’icyo kibazo kugira ngo hashakwe uko cyakemuka.

Umuhanzi Intore Tuyisenge

Ku rundi ruhande  Tuyisenge  ahamya ko ibyo Mani Martin aburana ari ukuri kandi batifuza ko byakomeza gutya.

Iserukiramuco rya JAMA fest ryatangiye  ku ya 21 Nzeri 2019 risozwa ku ya  28 Nzeri 2019. Izindi ndirimbo ubusanzwe Mani Martin azwiho harimo  iyitwa “Africa ndota”, “Ndaraye”, “Mapenzi” yakoranye na Sauti Sol, “Idini y’ukuri”, “Ituro”, “Urukumbuzi”  kandi   afite n’izindi.

Umwanditsi:

Ndamyirokoye François

Tanga Igitekerezo

Email yanyu ntigaragazwa ku rubuga. Amazina na Email ni ngombwa.