22°C , Partly sunny | Kigali-Rwanda

Maghreb yibasiwe na COVID-19 nubwo hafashwe ingamba rugikubita

Yanditswe na NYIRANEZA JUDITH

Ku ya 17-05-2020 saa 13:49:22
Umukozi wo muri Minisiteri y'Ubuzima muri Maroc yateraga umuti mu muhanda wo mu Murwa Mukuru Rabat tariki ya 22 Werurwe 2020 (Foto AFP)

Algérie, Maroc na Tunisie ni byo bihugu bya Maghreb byihutiye gushyiraho ingamba zo kwirinda zicyumva icyorezo cya Koronavirusi ku butaka bwabyo giturutse mu bihugu by’u Burayi. Nubwo byihutiye gushyiraho ingamba zo kwirinda, ibihugu 2 kuri 3 biza muri 4 bya mbere byibasiwe cyane n’icyo cyorezo ku Mugabane w’Afurika.

Ingamba zafashwe mu bihugu bya Maghreb mu mezi ashize zafashije mu gukumira ikwirakwira ry’icyo cyorezo, ariko Maroc na Algérie biri mu bihugu byibasiwe cyane na Koronavirusi ku Mugabane w’Afurika kuko Tunisie iza ku mwanya wa 3 muri Afurika nyuma y’Afurika y’Epfo na Misiri. Tunisie ariko nta barwayi bashya bahabonetse guhera mu ntangiriro z’iki cyumweru.

Algérie ku mwanya wa 4 ahapfa benshi

Algérie habarurwa umubare munini w’abapfa, ni igihugu kiza ku mwanya wa kane mu bihugu byagizweho ingaruka na Koronavirusi ku mugabane w’Afurika.

Umurwayi wa mbere yahabonetse mu mpera za Gashyantare nk’uko byatangajwe na Minisitiri w’Ubuzima Abderrahmane Benbouzid kuri tereviziyo y’icyo gihugu. Uwo murwayi yari aturutse mu Butaliyani yahise ashyirwa mu kato. Nyuma y’iminsi mike mu ntangiriro za Werurwe habonetse abandi barwayi 16 mu ntara ya Blida bo mu muryango umwe. Aba mbere bagaragayeho icyorezo cya Koronavirusi, bakaba barayikuye i Burayi.

Hakurikiyeho gufunga amashuri na kaminuza, hahagarikwa ingendo zo mu kirere ziva n’izerekeza muri Espagne, u Butaliyani no mu Bufaransa kimwe na Maroc nk’uko ari ingamba zashyizweho na Algérie hagati mu kwezi kwa Werurwe. Gutwara abantu mu buryo rusange, ibijyanye na siporo ntibyemewe, resitora n’ahakorerwaga ibirori by’umwihariko mu ntara ya Blida, gahunda ni ukuguma mu rugo.

Muri Algérie hagaragara umubare munini wabahitanwa na Koronavirusi kuko kugeza ku itariki ya 15 Gicurasi, mu barwayi bagaragaye 6 629 hapfuye 536, ijanisha riri hejuru ku gipimo hafi cya 8%.

Imbogamizi ni ukuba nta bikoresho bihagije mu mavuriro, ibitanda n’uburyo bwo kwirinda ku buryo mu mpera za Werurwe hari n’umushoferi watwaraga imbangukiragutabara witabye Imana.

Muri iki gihugu hagaragaye abarwayi 6 623, hapfa 190 kugeza tariki ya 14 Gicurasi. Ni igihugu kibasiwe kiza ku mwanya wa 3 muri Afurika. Uwagaragayeho uburwayi bwa mbere mu ntangiriro za Werurwe yaturutse mu Butaliyani.

Abarwayi 7 ni bo bagaragaye ku butaka bwa Maroc hagati mu kwezi kwa 3. Hahise hafungwa imipaka, amashuri, siporo, resitora, ingendo z’imbere mu gihugu n’izo hanze, izo mu kirere kimwe n’izo mu mazi zerekeza mu Bufaransa no muri Espagne kuzageza muri Nzeri.

Muri karitsiye nka Tanger, Fès cyangwa Tétouan biragoye kubahiriza gahunda ya guma mu rugo, ku buryo bisaba imbaraga nyinshi, Igihugu cyahohereje abashinzwe umutekano benshi. Utubahirije amabwiriza ajyanye no kwirinda, afungwa hagati y’ukwezi n’amezi 3 akanacibwa amande anagana n’amayero 115.

Indi ngamba yagizwe itegeko muri Maroc mu rwego rwo gukumira ikwirakwira rya koronavirusi ni ukwambara agapfukamunwa. Guhera tariki ya 7 Mata, nta munyamaroke wari wemerewe kuba yasohoka atakambaye.. Inganada zikora imyenda zahagaritse ibindi zari zisanzwe zakoraga zihatira gukora udupfukamunwa. Imibare itangazwa na Minisiteri y’Inganda, ni uko inganda zigera muri 30 zikora udupfukamunwa miriyoni 7 ku munsi.

Umwanditsi:

NYIRANEZA JUDITH

Tanga Igitekerezo

Email yanyu ntigaragazwa ku rubuga. Amazina na Email ni ngombwa.