22°C , Partly sunny | Kigali-Rwanda

Loni yishimiye igitego cyatsinzwe mu gufata Kabuga

Yanditswe na Imvaho Nshya

Ku ya 17-05-2020 saa 12:49:56
Umunyamabanga Mukuru wa Loni Antonio Guterres yashimiye inzego zafatanyije mu guta muri yombi Kabuga Félicien wamaze igihe kinini akwepa ubutabera

Umunyamabanga Mukuru wa Loni Antonio Guterres, yashimiye u Rwanda n’inzego zafatanyije n’Urwego Mpuzamahanga Rwashiriweho Gukora Imirimo y’Insigarira y’Inkiko Mpanabyaha (IRMCT), mu guta muri yombi Umunyemari Kabuga Félicien w’imyaka 84 y’amavuko ushinjwa uruhare rikomeye yagize muri Jenoside yakorewe Abatutsi.

Félicien Kabuga watawe muri yombi ku wa Gatandatu tariki 16 Gicurasi 2020, ni umwe mu bantu bashakishwaga cyane bamaze igihe kinini bakwepa ubutabera mpuazamahnga, akaba akurikiranyweho uruhare rukomeye yagize muri Jenoside yakorewe Abatutsi mu 1994, aho inkunga yahaye Leta yateguye ukanashyira mu bikorwa Jenoside  yongereye umuvuduko mu kwica Abatutsi barenga miriyoni mu gihe k’iminsi 100.

Inzego z’u Bufaransa zamucakiye biturutse ku iperereza ryakozwe ku bufatanye n’Ibiro by’Umushinjacyaha Mukuru wa IRMCT mu gace gahana imbibi Umurwa Mukuru Paris.

Itangazo ryatangajwe n’Umuvugizi wa Antonio Guterres, rigaragaza ko Loni yishimiye byimazeyo itabwa muri yombi ry’umwe mu Banyarwanda bateguye bakanatera ingabo mu bitugu abicaga Abatutsi babahora uko bavutse.

Guterres yunze mu rya Leta y’u Rwanda na IRMCT ko ifatwa rya Kabuga ritanga ubutumwa ku bakurikiranyweho ibyaha bya Jenoside yakorewe Abatutsi bakihishe hirya no hino, ko batazigera batoroka ubutabera burundu kandi ko bidatinze bazashyira bakaryozwa amabi bakoze.

Ibimenyetso bigaragaza uruhare rwa Kabuga muri Jenoside yakorewe Abatutsi bishimangira ko ari we watumije mu mahanga imihoro n’izindi ntwaro zakoreshejwe mu kwica Abatutsi, akaba ari na we wagize uruhare rukomeye mu ishingwa rya radio rutwitsi RTLM n’ibindi binyamakuru byihutishije umugambi wa Jenoside yakorewe Abatutsi.

Umunyamabanga Mukuru wa Loni yifatanyije n’Abanyarwanda bose muri iyi minsi 100 yo kwibuka ku nshuro ya 26 Jenoside yakorewe Abatutsi, by’umwihariko abagizweho ingaruka n’ibikorwa byose Kabuga yateye inkunga.

Yashimangiye agaciro ko kurandura umuco wo kudahana, ati: “Guhagarika umuco wo kudahana ni ingenzi.”

Yongeye gushima ubufatanye bwa IRMCT n’ubuyobozi bw’u Bufaransa kuri icyo gitego batsinze, yibutsa ibihugu bigicumbikiye abakoze Jenoside ko na byo bikeneye ubufatanye nk’ubwo mu kubageza imbere y’ubutabera.

Ibyo ngo bizashoboka ari uko ibyo bihugu byiyemeje gukorana bya hafi na IRMCT mu gutahura ubwihisho bw’abakekwa, kubata muri yombi, kurekura no kohereza abahunze ubutabera bakiri benshi.

Ubushinjacyaha Bukuru bw’u Rwanda butangaza ko bwohereje mu mahanga inyandiko zigera ku 1,000 zo gufata abakurikiranyweho ibyaha bya Jenoside yakorewe Abatutsi bahungiye mu bihugu bitandukanye, aho bamwe bidegembya kuko bakingiwe ikibaba.

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.