18°C , Partly sunny | Kigali-Rwanda

Kwihindura injangwe n’umugore, inkuru mpimbano zadindije ifatwa rya Kabuga

Yanditswe na NTAWITONDA JEAN CLAUDE

Ku ya 17-05-2020 saa 07:17:18
Kabuga amaze imyaka irenga 25 ahigwa bukware yaraburiwe irengero ngo aryozwe uruhare yagize muri Jenoside yakorewe Abatutsi

Inkuru mpimbano zishingiye ku makabyankuru atwerera bamwe imbaraga zirenze ubushobozi bwa muntu (myths), zigira uruhare rukomeye mu guhindura imitekerereze y’abagize sosiyete.

Abakurikirana amateka y’u Rwanda bazi inkuru ya Nyagakecuru wo mu Bisi bya Huye, wavuzweho gutunga inzoka idasanzwe yamurindiraga mu rugo rw’amatuvu, ikamuremera igitinyiro kidasanzwe cyatumye n’Umwami Ruganzu Ndoli akoresha ubwenge  budasanzwe kugira ngo iyo nzoka ihunge abone uko amunesha.

Mobutu Sese Seko Kuku Ngbendu Wa Za Banga wayoboye Repubulika Iharanira Demokarasi ya Congo (RDC) ubwo yari ikitwa Zaire, ni urugero rwa bugufi rw’Umuyobozi ukomeye wavuzweho ibitangaza byo kwihindura ingwe, injangwe cyangwa ibindi bikoko ku buryo bitashobokaga kumuhangura ku butegetsi.

Abantu benshi iyo babaye ibyamamare kubera ibikorwa bidasanzwe byiza cyangwa bibi, bahimbirwa inkuru zikomeza ubuhangange bwabo rimwe na rimwe zitari ukuri.

Ifatwa ry’umunyemari Kabuga Felicien ukurikiranyweho uruhare rukomeye yagize muri Jenoside yakorewe Abatutsi, ryagaruye urwibutso rw’inkuru zamuvuzweho zatumaga bamwe bumva ko adashobora gufatwa ngo agezwe imbere y’ubutabera.

Nubwo nta wapfa kumenya ikomoko y’izo nkuru, bamwe bavugaga ko Kabuga adashobora gufatwa kuko afite ubushobozi budasanzwe bwo kwihindura umugore, injangwe n’ibindi bikoko, ku buryo ngo yashoboraga kuba yanagera mu Rwanda ntihagire urabukwa.

Minisitiri w’Ubutabera akaba n’Intumwa Nkuru ya Leta Busingye Johnston, yatangarije Tereviziyo y’Igihugu ko izo nkuru ari zimwe mu zavuzwe mu myaka 26 amaze ashakishwa kandi avugwa mu bihugu byinshi.

Yagize ati: “Abantu benshi bazi ko Kabuga yavuzwe mu bihugu byinshi. Yavuzweho ibitangaza byinshi birimo kwihindura ikindi kintu kitari umuntu: kwihindura umugore, kwihindura uruhu, yavuzweho ibintu byinshi cyane. Abantu bari baranatangiye gucika intege batekereza ko atazaboneka niba akibaho.”

Kabuga atawe muri yombi ageze mu zabukuru

Ifatwa rya Kabuga ryatumye benshi babona ko hari izindi mpamvu zatumaga kabuga atabasha gufatwa. Minisitiri Busingye yakomeje agira ati: “Kabuga yihishe imyaka 26 yose; ushobora kwiruka igihe kinini uhunga ubutabera, ariko ntabwo wakwihisha burundu ngo bigukundire.”

Bivugwa ko imwe mu mpamvu nyamukuru zatumye Kabuga adafatwa mu maguru mashya ari uko yakoreshega umutungo mwinshi yigura mu bihugu yavugwagamo, ku buryo yabaga afite amakuru ahagije n’abamufasha kubura mu buryo bw’ibitangaza mu gihe inzego z’umutekano zigiye kumugwa miswi.

Ikindi cyakunze kugarukwaho cyane ni ubushake buke bwa Politiki bwarangwaga mu bihugu bimwe na bimwe byakerensaga cyangwa bigikerensa ubutabera bukwiriye guhabwa abagize uruhare muri Jenoside yakorewe Abatutsi

Uruhare rwa Kabuga  rutari ibigaragarira amaso rworetse imbaga muri Jenoside

Kabuga yari umwe mu barenga 1000 Urwego Mpuzamahanga Rwashiriweho Gukora Imirimo y’Insigarira y’Inkiko Mpanabyaha (IRMCT) rwashyiriyeho impapuro zo kubata muri yombi.

Komisiyo y’Igihugu yo Kurwanya Jenoside (CNLG), ivuga ko nubwo Kabuga Félicien atafashe imbunda ngo arase Umututsi cyangwa umuhoro ngo amuteme, yatanze amafaranga menshi yakoreshejwe mu gucura umugambi wa Jenoside no kuyikora.

Dr Bizimana Jean Damascène, Umunyamabanga Nshingwabikorwa wa CNLG, yagize ati: “Interahamwe ntabwo zashoboraga gukora iyo Kabuga atabaho. Kabuga yatanze amafaranga yo kubagurira intwaro, yo kubaha imodoka zibatwara n’agahimbazamusyi bagiye kwica. Munibuke ko ku itariki 11 z’ukwezi kwa Mutarama 1994, Gen. Romeo Dallaiare wari uhagarariye ingabo za Loni mu Rwanda (MINUAR) yabonye amakuru avuga ko mu bubiko bwa Kabuga i Gikondo huzuye intwaro zahabwaga Interahamwe.”

Ayo makuru Dallaire yayahawe n’umwe mu bari abayobozi b’Interahamwe witwaga Jean Pierre Turatsinze wanahamije ko izo ntwaro zabongereye ubushobozi bwo kwica Abatutsi 1000 buri minota 20.

Ibindi Kabuga yakoze bikongera ubukana bwa Jenoside ni ugutera inkunga y’umurengera ibitangazamakuru rutwitsi birimo Radio RTLM, Ikinyamakuru Kangura, Intera, Kamarampaka, La Médaille de Nyiramacibiri, l’Ecole de Mille Collines, L’Indontable Ikinani n’ibindi.

Dr. Bizimana yakomeje agira ati: ” Utwo twose ni utunyamakuru, twa Hutu Power Kabuga yagendaga ashinga akaduha amazina atandukanye kugira ngo abantu bakeke ko hari ikindi Kinyamakuru gishya ariko ari bya bindi ashyiraho afatanyije n’umugore wa Habyarimana Agathe Kanziga na musaza we Seraphin Rwabukumba wari umukozi muri BNR, Ferdinand Nahimana n’abandi.”

IRMCT yatangaje ko guhera mu mwaka wa 1997 Kabuga yashinjwaga n’Urukiko Mpuzamahanga Mpanabyaha Rwashyiriweho u Rwanda (ICTR) ibyaha birindwi birimo ubufatanyacyaha muri Jenoside, gushishikariza mu buryo butaziguye no gukangurira rubanda gukora Jenoside, gushaka gukora Jenoside, umugambi wo gukora Jenoside, gutoteza no gutsemba, byose bifitanye isano n’ibyaha byakozwe mu gihe cya Jenoside yakorewe Abatutsi.

Iyi nyubako iherereye ahitwa Asnieres-sur-seine mu nkengero z’i Paris mu Bufaransa, ni ho Kabuga yafatiwe ahamaze imyaka mike yidegembya

Ubushinjacyaha Bukuru mu Rwanda bwatangaje ko inkiko zo mu Bufaransa zitezweho kohereza Kabuga kuburanira i Arusha muri Tanzania mu rukiko rwamuhamagaje, cyangwa akaba yakoherezwa kuburanira mu Rwanda nk’uko byagenze kuri Ntaganzwa Ladislas, Munyagishari Bernard na Uwinkindi Jean.

Leta y’u Rwanda yakiriye neza itabwa muri yombi rya Kabuga, ishimangira ko ari indi ntambwe ishimishije u Bufaransa bwongeye gutera mu bushake mu gukurikirana no guta muri yombi abakekwaho Jenoside yakorewe Abatutsi bahungiye muri icyo Gihugu.

Kabuge Felicien wavukiye mu cyahoze ari Selire Gatenga, Segiteri Mukarange, Komini ya Mukarange muri Perefegitura ya Byumba mu mwaka wa 1935, ni umwe muri ba ruharwa 14 ubutabera mpuzamahanga bwashyiriyeho intego ya miriyoni 5 z’amadorari y’Amerika ku muntu uzabasha gutanga amakuru.

Abamaze gukacirwa biyongera kuri Kabuga ni Getete Jean Baptiste, Bizimungu Augustin, Renzaho Tharcisse na Hategekimana Ildephinse. Abagishakishwa ni Bizimana Augustin, Ngirabatware Augustin, Nizeyimana Ildephonse, Mpiranya Protais, Callixte Nzabonimana, Munyakazi Yussuf John, Ryandikayo, Sikubwabo Charles, Ndimbati Aloys na Pheneas Munyarugarama.

 

Umwanditsi:

NTAWITONDA JEAN CLAUDE

One Comment on “Kwihindura injangwe n’umugore, inkuru mpimbano zadindije ifatwa rya Kabuga”

Tanga Igitekerezo

Email yanyu ntigaragazwa ku rubuga. Amazina na Email ni ngombwa.