17°C , Thunderstorms | Kigali-Rwanda

Kung Fu: U Rwanda rwatumiwe muri shampiyona y’Isi

Yanditswe na Bugingo Fidèle

Ku ya 20-09-2019 saa 16:29:00
Havugimana Emmanuel (ibumoso) na Kwizera Claudien (iburyo) bazaserukira u Rwanda muri shampiyona y'Isi mu mukino wa Kung Fu Wushu

Nk’uko bitangazwa n’ubuyobozi bw’ishyirahanwe ry’umukino wa Kung Fu Wushu mu Rwanda “RKWF”, tariki 19 Nzeri 2019 ni bwo babonye ubutumire bwavuye mu ishyirahamwe ry’uyu mukino mu Bushinwa bubemerera kwitabira shampiyona y’Isi ya 2019.

Iyi shampiyona y’Isi biteganyijwe ko izabera mu mujyi wa Shanghai mu Bushinwa kuva tariki 17 kugeza 24 Ukwakira 2019.

Perezida wa RKWF, Uwiragiye Marc atangaza ko ari inshuro ya mbere u Rwanda rutumiwe muri iyi mikino akaba asanga ari uko bamaze iminsi bakora cyane mu rwego rwo kuzamura no kumenyekanisha uyu mukino bihereye mu bakiri bato.

Uwiragiye atangaza ko abakinnyi bazaserukira u Rwanda ari 2 ari bo Havugimana Emmanuel ukina mu byitwa “Nan Quan” naho Kwizera Claudien akine mu byitwa “Chanquan” byose bikaba biri mu kiciro cyo kwiyereka «Taolu » aho bakore ikibando, icumu n’inkota.

Umutoza uzajyana n’aba bakinnyi ni Simparikubwabo Godfrey naho Uwiragiye Marc agende ayoboye iri tsida.

Perezida wa RKWF, Uwiragiye atangaza ko ubu bagiye kwegera Minisiteri y’Umuco na Siporo kugira ngo babafashe ibijyanye no kwitabira iyi mikino.

Aba bakinnyi babiri, Havugimana Emmanuel na Kwizera Claudien bamaze iminsi bitwara neza aho muri Kanama bitabiriye irushanwa muri Tanzania babasha kwegukana imidari 4.

Umwanditsi:

Bugingo Fidèle

One Comment on “Kung Fu: U Rwanda rwatumiwe muri shampiyona y’Isi”

Tanga Igitekerezo

Email yanyu ntigaragazwa ku rubuga. Amazina na Email ni ngombwa.