Kigali-Rwanda

Partly sunny
27°C
 

Kung Fu:  Ikipe ya  Chin Woo ni yo  yitwaye neza muri shampiyona y’igihugu

Yanditswe na BUGINGO FIDELE

Ku ya Dec 24, 2018

Tariki 23 Ukuboza 2018 ni bwo  hasojwe umwaka w’imikino mu mukino wa Kung Fu Wushu mu Rwanda hakinwa shampiyona y’igihugu “National Kung Fu Championship Competition 2018”. Iyi mikino ikaba yarabereye mu nzu y’imikino ya NPC-Rwanda kuri Sitade Amahoro i Remera.

Iyi shampiyona ya 2018 yitabiriwe n’amakipe 21 ahitabiriye abakinnyi bose hamwe 267 barimo  abagore 57 n’abagabo 210.

Nk’uko bisanzwe irushanwa ryakinwe mu byiciro bibiri birimo kwiyereka “Taolu” ndetse no kurwana “Sanda”. Ikipe ya Chin Woo ibarizwa mu mujyi wa Kigali ni yo yitwaye neza kuko yegukanye imidari 8 ikurukirwa na Kigali Wushu Club yegukanye imidari 7 naho Black Eagle Ngoma y’Iburasirazuba yegukana imidari 5.

Ikipe ya Chin Woo ni yo yitwaye neza muri shampiyona y’igihugu ya 2018 aho yegukanye imidari 8

Perezida  w’ishyirahamwe ry’umukino wa Kung-Fu Wushu mu Rwanda “RKWF”, Uwiragiye Marc yatangaje  ko muri  rusange irushanwa ryagenze neza kandi  ko ryitabiriwe.  Ati “Ibi biratwereka ko turi kugenda tuzamura urwego rw’imikinire kandi ni byo kuko  ubu mu karere turi aba mbere”.

Umwaka ushize wa 2017 shampiyona yabaye nyuma kuzenguruka mu ntara zose. Uyu mwaka wa 2018 ntabwo byatbaye, Uwiragiye avuga ko bahuye n’ikibazo cy’amikoro. Ati “Hari ibikorwa  twakoze mu minsi isoza umwaka bituma amikoro aba bake ariko ibi byabaye uyu munsi  byagenze neza”.

Iyi mikino ya shampiyona y’igihugu yakurikiranwe  n’abayobozi batandukanye barimo  Ambasaderi w’Ubushinwa mu Rwanda, Rao Hongwei,  Rurangayire Guy, umuyobozi wa Siporo muri Minisiteri y’Umuco na Siporo “MINISPOC”. Hari kandi n’abayobozi b’uturere twa Ngoma na Rwamagana bari baje  gushyigikira  amakipe yabo.

Aha ni abakinnye mu kiciro cyo kurwana (Sanda)

 

Aha ni mu kiciro cyo kwiyereka

 

Ambasaderi w’Ubushinwa mu Rwanda, Rao Hongwei (ibumoso) ashyikirizwa ishimwe na Perezida wa RKWF, Uwiragiye Marc