18°C , Partly cloudy | Kigali-Rwanda

Kung Fu: Hatangiye igikorwa cyo gufasha imiryango 402  y’abakinnyi  yagizweho ingaruka na COVID-19

Yanditswe na BUGINGO FIDELE

Ku ya 20-05-2020 saa 23:26:38
Ambasaderi w'u Bushinwa mu Rwanda, RAO Hongwei (iburyo) n'umunyamabanga uhoraraho muri MINISPORTS, Shema Maboko Didier (ibumoso) bashyikiriza inkunga y'ibiribwa umutoza w'ikipe ya Kigali Wushu, Nzabonimana Elie (Foto Bugingo F.)

Ishyirahamwe ry’umukino njyarugamba wa Kung Fu Wushu mu Rwanda “RKWF” ku nkunga ya Ambasade y’u Bushinwa mu Rwanda batangije ku mugaragaro igikorwa cyo gufasha imiryango y’abakinnyi  yagizweho ingaruka n’icyorezo cya Koronavirusi cyugarije Isi muri iyi minsi.

Nyuma y’aho umurwayi wa mbere agaragariye mu Rwanda tariki 14 Werurwe 2020 bukeye bwaho  tariki 15 Werurwe 2020 ni bwo ibikorwa bya siporo byahagaritswe nyuma tariki 22 Werurwe 2020 hatangira gahunda yo kuguma mu rugo mu rwego rwo kwirinda ikwirakwira ry’iki cyorezo.

N’ubwo hari imirimo imwe n’imwe yasubukuwe tariki 04 Gicurasi 2020, ibikorwa bya siporo ntabwo birasubukurwa.

Tariki 20 Gicurasi 2020 ku kicaro k’ikipe ya Tsen Sport Organisation mu Murenge wa Kimihurura  habereye umuhango wo gushyikiriza imfashanyo y’ibiribwa imiryango  y’abakinnyi  ba  Kung Fu Wushu mu Rwanda.

Iyi nkuga yatanzwe na Ambasade y’u Bushinwa mu Rwanda  irimo umuceri, ifu y’ibigori, ibishyimbo n’isukari  yatwaye agera kuri miriyoni 24 z’amafaranga y’u Rwanda.  Biteganyijwe ko izahabwa imiryango igera kuri 402  ivuye  mu makipe 23 yo mu gihugu hose.

Buri muryango ugomba guhabwa ibiro 30 by’ifu y’ibigori, ibiro 15 by’umuceri, ibiro 15 by’ibishyimbo n’ibiro 5 by’isukari.

Ambasaderi w’u Bushinwa mu Rwanda, RAO Hongwei yatangaje ko umukino wa Kung Fu Wushu ubusanzwe ufite inkomoko mu Bushinwa ari ikiraro gihuza  umuco w’ibihugu byombi. Yakomeje avuga ko  benshi mu bakinnyi muri iyi minsi yo guhangana n’icyorezo cya COVID-19  bakorera imyitozo mu rugo.

Yagize ati : “ Buri mwaka Ambasade y’u Bushinwa mu Rwanda yifatanya n’abakina umukino wa Kung Fu Wushu mu marushanwa atandukanye mu rwego rwo kuzamura uyu mukino, ndizera ko ibi bihe bizarangira vuba tukongera tugahurira mu marushanwa atandukanye.”

Uretse kuba Ambasade y’u Bushinwa mu Rwanda yarageneye inkunga y’ibiribwa abakinnyi ba Kung Fu Wushu mu Rwanda, Ambasaderi  RAO Hongwei yavuze ko Leta y’u Bushinwa muri ibi bihe  yagiye itanga ubufasha bunyuranye mu gufasha ababayeho nabi  kandi ko banatanze inkunga mu bijyanye n’ubuvuzi  bikaba bizanakomeza.

Umunyamabanga uhoraho muri Minisiteri ya Siporo, Shema Maboko Didier yashimiye Ambasade y’u Bushinwa mu Rwanda kuri iyi nkunga bageneye abakinnyi b’umukino wa Kung Fu Wushu mu Rwanda. Yashimiye kandi RFWF kuba baratarekereje ku bakinnyi babo muri ibi bihe bakabasha kwegera umufatanyabikorwa kugira ngo bagoboka imiryango yagizweho ingaruka n’iki cyorezo.

Shema yasabye ko hakomeza kubaho ubufatanye kugira ngo abakinnyi igihe imikino izaba isubukurwa  bazabe bafite ubuzima bwiza kuko udafite ubuzima bwiza bitashoboka ko yongera  kwitwara neza nka mbere.

Bamwe mu bagenewe inkunga bashimiye RKWF na Ambasade y’u Bushinwa mu Rwanda kuba ibagobotse muri ibi bihe bigoye. Nzabonimana Elie usanzwe ari umutoza wa Kigali Wushu ibarizwa Kimisagara yavuze ko iyi nkunga ije bari bayikeneye kuko abakinnyi atoza bakoraga imirimo itandukanye kandi ikaba yari yarahagaze. Turikumana Robert utuye mu Rugando akaba akinira Tsen Sport organization yavuze ko iyi nkunga ababyeyi nibayakira bibashimisha kandi ko bazakomeze kumushyigikira muri uyu mukino.

UKO IYI NKUNGA YABONETSE

Visi Perezida wa RKWF, Makuza Richard yatangarije Imvaho Nshya ko  batangiye baganira  na Ambasade y’u Bushinwa aho yabemereye miriyoni 5 ariko bakabona abakeneye gufashwa ari benshi bikazamuka bikagera kuri miriyoni 13 nyuma bikaza kurangira bibaye miriyoni 24.

Yakomeje avuga ko iyi miryango izafashwa igera kuri 402 kugira ngo iboneke basabye amakipe yose  gukora urutonde rw’abababaye kurusha abandi mu makipe 25, amakipe 23 akaba ari yo yatanze urutonde.

GAHUNDA YO GUSHYIKIRIZA INKUNGA AMAKIPE

Ubwo iki gikorwa cyatangizwaga tariki 20 Gicurasi 2020, amakipe 3 yo muri Kigali ni yo yahawe inkunga aya ni  Tsen Sports Organisation , Kigali Wushu Club na Tiger Wushu Kimisagara.

Iki gikorwa kizakomeza tariki 23 Gicurasi 2020 nabwo hatangwa inkunga mu makipe yo muri Kigali ari yo  Rwanda Wing Chin Academy, Chow Gar Mantis Academy, Dragon Nyamirambo, Dragon Batsinda, Dragon Wushu Kanombe, Puch Lam Gikondo, Gasabo Wushu Club, Chin Woo Academy, Kicukiro Wushu Club, Ging Hu Club na Kigali Shaolin Tiger Club.

Tariki 24 Gicurasi 2020, ikipe ya  Muhanga Shaolin Tiger Temple nibwo izashyikirizwa inkunga naho  tariki 26 Gicurasi 2020, igikorwa gikomereze i Burasirazuba aho ikipe ya Tiger Chin Woo Rwamagana, Black Scorpion Kayonza, Black Eagle Ngoma na Chow Gar Martis Nyagatare zizashyikirizwa inkunga.

Iki gikorwa kizasorezwa mu ntara y’Amajyaruguru n’u Burengerazuba   tariki 29 Gicurasi 2020 aho ikipe ya Red Gradon Gicumbi , Musanze Shaolin Temple, Mahoko Shaolin Temple na Rubavu Wushu Club zizashyikirizwa  inkunga.

Uko umuhango wagenze  mu mafoto

 Foto: Bugingo Fidele

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.