18°C , Mostly cloudy | Kigali-Rwanda

Kung Fu: Abasaga 39 basoje amahugurwa bahabwaga n’abatoza b’inzobere bavuye mu Bushinwa

Yanditswe na BUGINGO FIDELE

Ku ya 26-09-2019 saa 16:30:50
Abitabiriye amahugurwa bose bari kumwe n'abatoza b'inzobere na Perezida wa RKWF

Abatoza 19 n’abakinnyi 20 bo mu Rwanda mu mukino wa Kung Fu Wushu tariki 25 Nzeri 2019 ni bwo basoje amahugurwa y’ibyumweru bibiri bahabwaga n’abatoza b’inzobere baturutse mu Bushinwa aribo  Yang  Tianyu na Chen Liwei.

Aba batoza bageze mu Rwanda  tariki 12 Nzeri 2019  aho baje  ku bufatanye  bw’ishyirahamwe ry’umukino wa Kung Fu Wushu mu Rwanda “RKFW” n’ihuriro  ry’abaturage ba Henan ritsura umubano n’ibihugu by’amahanga “ Henan People’s Association for Friendship with Foreign Countries”  binyujijwe muri Ambasade y’u Bushinwa mu Rwanda.

Ubwo aya mahugurwa yasozwaga, Perezida wa  RKFW, Uwiragiye Marc yatangaje ko yagenze neza kandi abahuguwe bungutse byinshi mu bijyanye n’uyu mukino kuko bahuguwe n’inzobere.

Yavuze ko  aya mahugurwa yahuriranye n’imyireko yabereye muri Kigali Convention Centre tariki 15 Nzeri 2019 mu kwizihiza isabukuru y’imyaka 70  ya Repubulika ya  rubanda  rw’Abashinwa ndetse n’imyiyereko yabereye muri Ambasade y’u Bushinwa mu Rwanda tariki 20 Nzeri 2019.

Yagize : “Aya mahugurwa  yatumye imyumvire ihinduka  kuri uyu mukino kuko hari bimwe abakinnyi bacu n’abatoza batari bazi kandi bizadufasha mu gukomeza guteza imbere uyu mukino. »

Uwiragiye yanavuze ko mu bitabiriye amahugurwa harimo  n’abakinnyi bazaserukira u Rwanda muri shampiyona y’Isi izabera mujyi wa  Shanghai mu Bushinwa kuva tariki  17 kugeza 24 Ukwakira 2019. Yagize ati : “Tugiye gukomeza kubatyaza kugira ngo bazabashe kwitwara neza.”

Abatoza ndetse n’abakinnyi bahuguwe batangaje ko bungutse ubumenyi bwisumbuye ku bwo bari basanganwe kandi bemeza ko buzabafasha kuzamura uyu mukino.

Havugimana Emmanuel  usanzwe ari umukinnyi ariko akaba anatoza  yavuze ko bungutse byinshi cyane cyane ku bijyanye n’imyiyereko ya kera dore ko basanzwe bakora iby’ubu. Yakomeje avuga ko   nabo bagomba gusangiza ubumenyi bungutse abandi kugira ngo mu marushanwa atandukanye abakinnyi b’u Rwanda bazajya bitabira bazitware neza.

Ababatoza, Yang  Tianyu na Chen Liwei baba mu ishuri  ryitwa Shaolin Yanlu Wushu  mu Ntara ya Henan.

Umuhango wo gusoza amahugurwa mu mafoto

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.