20°C , Mostly cloudy | Kigali-Rwanda

Koronavirusi: Ntawe usohoka muri Nyarugunga uretse abajya guhaha n’abataha mu ntara

Yanditswe na Kayitare Jean Paul

Ku ya 26-03-2020 saa 09:28:53

Nyuma y’aho Guverinoma ishyizeho amabwiriza mu rwego rwo kwirinda ikwirakwizwa kw’icyorezo cya Covid19, abanyarwanda basabwe kuguma mu rugo, kwirinda ingendo zitari ngombwa nk’uko bikubiye mu itangazo rya Minisitiri w’Intebe ryo ku wa 21 Werurwe 2020.

Minisiteri y’Ubuzima iravuga ko kuwa 25 Werurwe 2020 mu Rwanda hagaragaye undi muntu wanduye Koronavirusi, akaba abaye uwa 41. Uwo muntu yaje aturutse i Dubai ashyirwa mu kato.

Minisiteri y’Ubuzima isobanura ko abarwayi bose ngo baravurirwa ahabugenewe kandi nta n’umwe urembye, igasaba abaturarwanda gukomeza kwitwararika, bubaha amabwiriza ya Minisitiri w’Intebe yo gukaza isuku, kwirinda kuva mu ngo zabo nta mpamvu ifatika n’ibindi.

Mu murenge wa Nyarugunga ahazwi nk’i Kanombe hafi n’ibitaro bya Gisirikare, mu Kajagari ka Kabiri, kuri Segiteri, ku Gasaraba, n’ahazwi nko kuri 15 ku muhanda Kigali-Rwamagana, mu karere ka Kicukiro mu Mujyi wa Kigali, biragoye kubona abantu bagenda mu muhanda uretse abakomeje gutaha mu ntara.

Imvaho Nshya yageze mu bice bitandukanye byo mu Murenge wa Nyarugunga mu rwego rwo kureba uko amabwiriza arimo gushyirwa mu bikorwa ndetse n’icyo bamwe mu baturage bari mu muhanda batangaza.

Imodoka y’Isuku n’Umutekano y’umurenge wa Nyarugunga yarimo ba DASSO ndetse n’umunyerondo w’umwuga, hifashishijwe indangururamajwi, yagendaga isaba abari mu muhanda kuguma mu ngo. Imodoka ya Polisi yarimo ubuyobozi bwa Polisi mu Murenge wa Nyarugunga, nayo yari mu igenzura ifatanije n’Inzego z’ibanze.

Imvaho Nshya yashoboye kubona amakuru y’uko abaturage hafi ya bose bari mu ngo zabo, abagaragara ku muhanda akaba ari abataha mu ntara ndetse n’abarimo kujya guhahira hafi mu makaritsiye. Icyakoze hari abaturage bafashwe na  Polisi barimo kunywera mu kabari k’uwitwa Pascal ucururiza mu mudugudu w’Umucyo mu Kagari ka Kamashashi, inafata amagare bigaragara ko yakoreshwaga n’abanyonzi.

Uwizeyimana Damascène wari usanzwe akora akazi k’ubukarani, yabwiye Imvaho Nshya ko ahisemo gutaha n’amaguru mu karere ka Rulindo akazagaruka ari uko hatangajwe amabwiriza mashya.

Ati “Nakoraga akazi k’ubukarani hano mu Kajagari ariko mpisemo gutaha iwacu muri Burega mu karere ka Rulindo kuko inzu mbamo sinabona ubushobozi bwo kuyishyura, hakiyongeraho no kuba ntabona ibyo kurya. Ndagiye n’amaguru kuko nta modoka zihari, nzagaruka hatanzwe amabwiriza mashya kuko ndimo gukurikira Radio Rwanda cyane bityo nkarushaho kumenya uko ibintu bimeze”.

Bavumiragira Jean uvuga ko yarangije kwiga Kaminuza ariko akabura akazi, agahitamo kujya aroba moto amasaha y’ijoro, nawe yemeza ko yahisemo gusubira ku Muyumbu mu Karere ka Rwamagana mu Ntara y’Iburasirazuba akazagaruka ari uko ibintu bitangiye kumera neza.

Abakozi bo mu ngo, abenshi kugeza ubu nibo biganje ku mahahiro y’ibiribwa bitamara igihe kinini by’umwihariko mu Murenge wa Nyarugunga. Bavuga kandi ko basabwe n’abakoresha babo gukoresha uburyo bw’ikoranabuhanga kugira ngo bashobore kwishyura ibyo bahashye, bakaba bashyiriwe amafaranga kuri MoMo (Mobile Money) kugira ngo bage bayahahisha.

Vuguziga Jeanne yagize ati “Mabuja yampaye amafaranga kuri telefoni kugira ngo nge nyakoresha nje guhaha bityo nirinde gufata ku mafaranga kuko nshobora kwandura Covid19 bitewe no guhererekanya amafaranga. Isuku nyishyize imbere kuko iki cyorezo giteye ubwoba”.

Kuva ku Cyumweru tariki 22 Werurwe 2020 kugeza ubu, inzego z’ibanze mu murenge wa Nyarugunga zifatanije n’iz’umutekano, bazindukira mu gikorwa cyo kugenzura niba abarebwa n’amabwiriza ya Minisitiri w’Intebe, barimo kuyubahiriza uko bikwiye hagamijwe kwirinda ikwirakwizwa rya Koronavirusi.

Umuvugizi wa Polisi y’u Rwanda, CP JBosco Kabera, avuga ko hirya no hino mu gihugu Polisi ikomeje akazi kayo kuko nk’abashinzwe umutekano wo mu muhanda bakomeje guhagarika abagenda mu muhanda ari nako ngo babaza iyo bajya.

Ati “Abapolisi hirya no hino bakomeje kugenzura ishyirwa mu bikorwa ry’amabwiriza ya Minisitiri w’intebe. Ku munsi wa mbere byagenze nabi ariko ubu birimo kugenda neza kuko utwaye ikinyabiziga baramuhagarika bakamubaza iyo ajya basanga ari impamvu zumvikana bakamureka ariko zaba zitumvikana bakamuca amande”.

CP Kabera, umuvugizi wa Polisi, asaba abaturage kuguma mu rugo bakareka kugendagenda muri karitsiye kandi ngo n’abashaka gukora siporo bazikorere mu rugo mu rwego rwo kubahiriza amabwiriza yo kuguma mu rugo no kwirinda Koronavirusi.

Minisiteri y’Ubuzima igira inama abanyarwanda yo gukoraba intoki hakoreshejwe amazi meza n’isabune, kwirinda gukora ingendo zidakenewe, kuguma mu rugo kugeza igihe hatanzwe andi mabwiriza, gukoresha agapfukamurwa igihe cyose umuntu yumva afite ibimenyetso bya Covid19 ndetse no gukororera cyangwa kwitsamurira mu kizigira cy’ukuboko.

Umwanditsi:

Kayitare Jean Paul

Tanga Igitekerezo

Email yanyu ntigaragazwa ku rubuga. Amazina na Email ni ngombwa.