18°C , Partly sunny | Kigali-Rwanda

Kompanyi zitwara abagenzi zirasabwa gushyiraho uburyo bunoze bwo gucunga imizigo yabo

Yanditswe na Tumukunde Georgine

Ku ya 27-12-2019 saa 13:01:43
Abatwara abagenzi baributswa ko bafite n' inshingano zo kubungabunga imizigo yabo

Urwego Ngenzuramikorere  (RURA) rurasaba  kompanyi zitwara abagenzi mu modoka gushyiraho uburyo  bunoze bwo gucunga imizigo yabo  mu rwego rwo gukumira ibibazo bikunze kugaragara by’abavuga ko babuze imizigo.

Abatwara abagenzi bakwiye kugira umukozi wakira imizigo minini akayibika mu  modoka ahatandukanye n’aho abantu bicara mu ibutu (Car Boot),  no mu gihe cyo  kuyikuramo umugenzi ageze aho ajya,  hakaba hari ubishinzwe uyimuhereza kandi  azi neza ko iyo amuhaye ari iye adatwaye iy’abandi.

Mukamurera Vénérande ushinzwe ishami rirengera abafatabuguzi  muri RURA, avuga ko hari ubwo umugenzi bamupakirira   umuzigo yagera aho ajya agasanga ntawukirimo.  Arasaba abatwara abagenzi kugira uburyo bunoze bwo gucunga imizigo.

Ati: “ Umuzigo muto ni wo umugenzi akwiye kwicungira kuko aba awicaranye, hanyuma umuzigo munini upakirwa ahabugenewe, mu gihe ubuze uba ugomba kubazwa nyiri imodoka wawumupakiriye. Twakira ibirego byinshi by’abagenzi babuze imizigo yabo, tukabahuza n’abo baba babapakiriye,  ubashije kugaragaza ikimenyetso cy’umuzigo we akawishyurwa, ariko ubundi ntibikwiye ko ibyo bibazo bikomeza kubaho”.

RURA irategura amabwiriza y’uburyo imizigo y’abagenzi yajya icungwa.  Mukamurera ati: “Hagomba kubaho nk’ikimenyetso gishyirwa  ku muzigo w’umuntu  na we agahabwa ikindi  gihuye  n’ikiri ku muzigo we,  mu gihe cyo kuwukuramo akaba ari cyo yerekana hakarebwa ko ari uwe koko”.

Avuga ko ibyo bibazo by’ imizigo ibura bikwiye gukemurwa, abatwara  abagenzi bakumva ko ari inshingano zabo gucunga neza  imizigo y’abo batwaye.

Abagenzi bifuza ko kompanyi zajya zifunga neza ahabikwa imizigo

Abagenzi bamwe bagaragaza ko hari imizigo yibirwa mu nzira n’iyibwa imodoka itangiye guhaguruka, bagasaba ko kompanyi zajya zifunga neza aho imizigo ibikwa.

Ingabire Clémentine  ukunze kurangura  ibicuruzwa i Kigali akabijyana i Muhanga aho acururiza, yagize  ati: “ Ibibazo by’ibura ry’imizigo ahanini bishingira ku kuba  aho ibikwa haba hadafunze neza, hari igihe umuzigo wibwa imodoka itsimbuye igiye hari n’igihe wibirwa mu nzira kandi umugenzi nta ko atagize ngo acunge neza ko umuzigo we bawubitse, kompanyi zikwiye kujya zifunga  neza aho ibikwa ku buryo nta mujura wahafungura”.

Bamwe mu batwara abagenzi bavuga ko hari ingamba bafashe

Bamwe mu batwara abagenzi bavuga ko ugereranyije n’ibihe byashize, hari intambwe yatewe mu gukemura ikibazo k’ibura ry’imizigo bitewe n’ingamba bafashe.

Mu kiganiro n’Imvaho Nshya, Nziza Hussein Umuyobozi w’imwe muri kompanyi zitwara abagenzi zerekeza mu ntara,  yavuze ko bashyizeho  umukozi ushinzwe imizigo ishyirwa mu ibutu, agakurikirana uburyo ishyirwamo agafunga.

Ati: “…ariko n’umushoferi akaba ahibereye akabireba, agafunga umuryango we, n’ushaka umuzigo amenya uko awumuha, aba azi ibyo yashyizemo n’ibisigayemo”.

Ashimangira  ko mu gihe imizigo ibuze yabitswe inyuma mu ibutu kompanyi itwara abagenzi iba igomba kuyishyura.

Ku kijyanye n’uko hari kompanyi zanga kwishyura abagenzi mu gihe imizigo yabo yabuze, we avuga ko akenshi biba byatewe n’ubwoko bw’umuzigo wabuze n’uburyo wabuzemo.

Ati: “Niba umugenzi azanye umuzigo akicarana na wo yarangiza akavuga ngo nawubuze ndishyuza ikigo, aho ni ho usanga hazamo kwinangira kw’ikigo mu kwishyura”.

Bisaba gushishoza kuko ngo  hari abavuga ko babuze imizigo bashaka gukora uburiganya.

Ati: “Hari abaza bitwaje intege nke ziri mu itwarwa ry’imizigo bishakira indonke; umuntu akaza ngo nari mfite igikapu none  baragitwaye ariko wakurikirana  ugasanga si ko byari bimeze.  Hari abari bamaze iminsi baza gutega nta kindi bashaka ari ukugira ngo bibe abarangaye, imodoka yaba igiye kugenda umuntu akavuga ngo ndavamo kandi agasohoka yibye”.

Yongeyeho  ati: “Tugira amahirwe kuko nko muri gare ya Nyabugogo hari Cameras (ibyuma by’umutekano bifata amashusho), iyo habaye ikibazo turebamo bikadufasha gukurikirana umuzigo w’umuntu”.

Nziza yagaragaje ko  n’umugenzi afite uruhare rwo gucunga umuzigo yicaranye na wo. Ati: “Ku itike no mu modoka imbere haba handiteho ko umugenzi agomba gucunga umuzigo we aho awushyize  ndumva kompanyi nyinshi zaragiye zibyandikaho, ariko niba bawushyize inyuma mu modoka ni ikigo kiba kigomba kuwucunga”.

Hagiye kujya hatangwa ikiranga imizigo

Undi muti wa kiriya kibazo k’ibura ry’imizigo  ni uko umwaka utaha bazatangira gukoresha amatike aranga imizigo.

Nziza ati: “Mu minsi iri imbere  tuzajya dukora ikintu twakwita amatike y’imizigo ku buryo tuba dufite amakuru ko imodoka ihagurutse isaha iyi n’iyi ifite imizigo iyi n’iyi. Mu bufatanye bwacu na RURA batubwiye imizigo igomba kuba iri aho abagenzi bari n’itagomba kuhaba bigendanye n’ibiro by’iyo umuntu afite”.

Yongeyeho ko muri ubwo bufatanye, amabwiriza arimo gukorwa  arebana n’imizigo hari byinshi azakemura; bazajya bamenya  imizigo igomba kubikwa mu ibutu n’itagomba kuhajya. Biteganyijwe ko  umuzigo umugenzi yakwicarana na wo ugomba kuba utarengeje ibiro 20, bityo buri ruhande rwaba urw’umugenzi n’urwa kompanyi imutwaye, ruzajya rumenya inshingano rufite mu kubungabunga umuzigo.

Mu gihe hatarajyaho ayo matike, hari abavuga  ko batangiye kujya bandika  ku muzigo wa buri muntu, kandi  igapakirwa hakurikijwe uko abantu baza kugenda bavamo n’aho baviramo, ubatwara na we areba uko ipakirwa kugira ngo aze kubona uko ayibaha.

Umwanditsi:

Tumukunde Georgine

Tanga Igitekerezo

Email yanyu ntigaragazwa ku rubuga. Amazina na Email ni ngombwa.