Koga: RSF yatangaje gahunda y’ibikorwa mu myaka itanu iri imbere  

Yanditswe na BUGINGO FIDELE

Ku ya 03-08-2020 saa 16:32:03
Abari bitabiriye inama y'inteko rusange ya RSF

Mu nama y’inteko rusange  y’ishyirahamwe ry’umukino wo Koga mu Rwanda “RSF” yateranye  tariki 02 Kanama 2020  hagaragajwe gahunda y’ibikorwa mu gihe k’imyaka 5 iri imbere.

Iyi nama yitabiriwe n’amakipe 15 yo mu gihugu hose  yabereye mu cyumba k’inama cya Minisiteri ya Siporo  “MINISPORTS”  hubahirizwa amabwiriza yo kwirinda icyorezo cya  COVID 19.

Komite nshya ya RSF yatowe muri Mutarama 2020  yagaragarije  abanyamuryango  raporo y’ihererekanya bubasha na komite basimbuye aho byabaye tariki 27 Werurwe 2020.

Iyi komite yanagaragaje ibikorwa bakoze kuva  muri Mata ugeza Kanama 2020 aho  bakoze igikorwa cyo gufasha abakinnyi n’abatoza bagizweho ingaruka na COVID-19 mu gihe cya Guma mu rugo. Abagenewe ubufasha bakaba bangana na 74 mu gihugu hose.

Mu bindi bikorwa bavuguruye amategeko,  bategura gahunda y’igenamigambi y’imyaka 5 aho yibanze ku  iterambere ry’abatoza n’abakinnyi muri rusange.

Kubera ibihe bya COVID-19, komite nyobozi ya RSF yashyikirije  MINISPORTS amabwiriza genderwaho   ku muntuugiye gukina umukino wo koga mu gihe baba bakomorewe  nk’uko hari indi mikino yakomorewe.

Ibikorwa biteganyijwe

Mu bikowa biteganyijwe muri iyi nama hemejwe ko tariki 10 kugeza 13 Kanama 2020 hazaba  amahugurwa y’abatoza ariko azaba hifashishijwe ikoranabuhanga.

Hateganyijwe kandi igikorwa cyo gusura amakipe yose no kuyafasha mu kwiyubaka, gukurikirana icyakorwa kugira ngo umukino wo Koga  utere imbere ndetse no gushyira mu bikorwa gahunda y’iterambee ry’igihe kirekire.

Nyuma y’iyi nama y’inteko rusange yari n’iya mbere kuri iyi komite, Nyabyenda Jean Pierre  ukuriye ikipe ibarizwa muri  Nyarutarama Sports Centre   yavuze ko komite yajyagaho ntikurikirane amakipe, kandi ko   abantu baba bakwiye gukurikirana bakamenya ibyo abandi bakora kugira ngo bigaragare bityo bahuze imbaraga.

Akomeza avuga ko bafitiye ikizere iyi komite nshya  kuko irimo abantu bakinnye uyu mukino bityo bazi imvune zawo. Ati : “ Aba bose ni abakinnye uyu mukino kandi bafite umutima wo kuwukunda.”

Perezida w’ishyirahamwe ry’umukino wo Koga mu Rwanda “RSF”,  Girimbabazi Pamela    yatangaje ko igihe cyari kigeze ngo bahure n’abanyamuryango kugira ngo bamenyeko batangiye gukora  kandi  banabagezeho gahunda z’ibikorwa  biteganyijwe mu minsi iri imbere.

Yakomeje avuga ko  bagombaga  no kuganira muri  iki gihe cya COVID-19 ku ruhare rwabo mu kurwanya  iki cyorezo bubahiriza amabwiriza ndetse no kureba icyo bakora kugira ngo  bakomorerwe   nk’umukino wo Koga.

Girimbabazi  agaruka ku kerekezo k’imyaka 5  yavuze ko intego  ari ukwegera amakipe bakareba icyo bakora kugira ngo amakipe  ahe abakinnyi umwanya bakine ndetse n’ikipe y’igihugu ikomere.

Yakomeje avuga ko  bafite gahunda yo kwegera abakinira mu ntara cyane  abakinira mu biyaga kuko  abenshi aba ari abakinnyi b’abahanga kandi ko bagira n’ikiciro cy’amarushanwa yabo.

Ku bijyanye no gusubukura imikino, Girimbabazi Pamela yavuze ko barimo kuganira n’abayobozi  ba Minisiteri ya Siporo aho bamaze no  gutanga amabwiriza bakurikiza igihe baramuka bakomorewe.

Perezida w’ishyirahamwe ry’umukino wo Koga mu Rwanda “RSF”, Girimbabazi Pamela

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.