Kirehe: Inanasi zoherezwa mu mahanga zumishijwe zigiye kwikuba 3

Yanditswe na Manishimwe Noël

Ku ya 04-02-2019 saa 14:38:28
Abari mu gikorwa cyo gupakira no gupfunyika inanasi zumishijwe, zitegurirwa koherezwa mu Bufaransa (Ifoto Manishimwe N)

Ubuyobozi bwa Koperative Tuzamurane y’abahinzi b’inanasi mu Karere ka Kirehe, buravuga ko ingano y’inanasi zumishwa zikoherezwa mu mahanga uzava kuri toni 24 bariho muri 2018, zikagera kuri toni zisaga 70 mu mwaka wa 2020.

Koperative Tuzamurane ikora ubuhinzi bw’inanasi, ikazitunganya, ikazohereza ku masoko yo mu Rwanda n’i Burayi, iherereye mu Murenge wa Gahara, ikaba yaravutse mu mwaka wa 2005.

Iyi koperative igizwe n’abanyamuryango 130 yatangiriye ubuhinzi kuri hegitari 36, ubu ubuso buhinzweho bukoreshwamo ifumbire y’imborera gusa bugeze kuri hegitari 188.8.

Hakuzimana Jean Damascène Uyobora Tuzamurane yabwiye Imvaho Nshya ko, kuri ubu ibikorwa byo kwagura uruganda rutunganya umusaruro w’inanasi byatangijwe muri Mutarama 2019, bikaba biteganyijwe ko umusaruro w’inanasi zumishishirizwa muri iyi Koperative, zikoherezwa mu mahanga uzikuba hafi 3 mu mwaka utaha wa 2020.

Ati: “Ubu nk’uko mwabibonye , turimo kwagura uruganda, ku buryo dutekereza ko nko mu mezi 6 ari imbere, tuzaba dushobora nibura kuva ku biro 120 by’inanasi zumishijwe ku munsi, nitwongeraho izindi mashini 3, ziziyongera kuri ebyiri dufite, tuzaba dushobora gukora nibura ibiro 500 ku munsi. Muri 2020 turateganya ko tuzava kuri toni 24 z’inanasi zumye dutunganya mu mwaka, nibura tukaba twakuba inshuro 3, tukagera kuri toni 70 ku mwaka.”

Agaragaza ko ubuso bahingaho bubonekaho umusaruro ungana na toni 3,600 by’inanasi buri mwaka, muri izo hakumishwa izigera kuri toni 600, izindi zikagurishwa ku masoko yo mu Gihugu arimo n’izigemurwa ku ruganda Inyange Industries.

Kugeza ubu hafi 30 z’inanasi zumishwa buri mwaka zoherezwa ku isoko ryo mu Gihugu cy’ u Bufaransa kuva mu mwaka wa 2015.

Hari kubahwa uruganda ruzarangira mu kwezi kwa Kamena 2019, hagashyirwamo n’imashini imwe yumisha inanasi, izaba ari iya 3 yiyongera kuri 2 basanzwe bafite.

Hakuzimana yongeyeho ati: “Inyubako ubwayo, izarangira itwaye amafaranga y’u Rwanda asaga miriyoni 120. Imashini zizajyamo zo ni 3, imwe igura Amadorari ibihumbi 50, ariko turashaka ko uyu mwaka wa 2019, urangira imashini imwe yaragezemo, izindi kibazajyamo mu mwaka wa 2020. Turi kurwubaka bufatanye n’Umushinga wa PASP ukorera muri Minisiteri y’Ubuhinzi n’ubworozi.”

Ubuyobozi bwa Koperative Tuzamurane bugaragaza ko abahinzi b’inanasi bakomeza gushyira imbaraga muri ubu bihinzi, ndetse nka Koperative bihaye intego y’uko buri mwaka hongerwa hegitari 30 nshya ku zihari.

Hatangijwe kandi ibiganiro ku buryo ku isoko ry’inanasi zumishijwe, iyi Koperative isanzwe ifite mu Bufaransa, mu bihe biri imbere hashobora kwiyongeraho n’andi yo mu Bihugu nka Leta Zunze Ubumwe z’Amerika n’u Bushinwa.

Mu byo Koperative Tuzamurane iri gushyiramo imbaraga kandi harimo gushishikariza abagore n’urubyiruko kuba abanyamuryango bayo, gutangira abanyamuryango Mituweli buri mwaka n’ibindi birimo kubafasha mu burezi ku bafite abana biga.

Umwanditsi:

Manishimwe Noël

Tanga Igitekerezo

Email yanyu ntigaragazwa ku rubuga. Amazina na Email ni ngombwa.