Kigali-Rwanda

Mostly cloudy with showers
19°C
 

Kigali: Hagaragajwe uko ubukene bwarwanywa hagabanywa ubusumbane

Yanditswe na Kayitare Jean Paul

Ku ya 28-05-2019 saa 15:14:22
Abitabiriye inama bagaragaje uko ubukene n'ubusumbane mu by'ubukungu byifashe ku Isi no muri Afurika (Foto Gentil G.)

Ihuriro ry’Abashakashatsi ku bukungu mu Rwanda EPRN, ryahuye n’inzego zitandukanye kugira ngo harebwe impamvu zituma Umugabane w’Afurika by’umwihariko Afurika yo munsi y’Ubutayu bwa Sahara ikomeza kugira ubusumbane mu bukungu ndetse bikaba n’imvano y’ubukene.

Gatsinzi Justin, Umuyobozi w’ishami rishinzwe imibereho myiza y’abaturage mu kigo gishinzwe guteza imbere ibikorwa by’iterambere mu nzego z’ibanze LODA, asobanura ko igihugu kizi ikerekezo gifite mu kurwanya ubukene n’ubusumbane kandi kikaba gifite n’ibyo gisabwa n’abo gifitanye amasezerano ku Isi mu by’iterambere rirambye.

Yagize ati “Hari abantu benshi bibwira ko ubukire ari amafaranga ariko noneho twagize amahirwe yo kugaragarizwa imiterere y’ubukene, tuza kubona ko bugira isura nyinshi. Ugiye kurebera mu buzima wavuga ngo nakora iki kugira ngo mbe narwanya ubukene n’ubusumbane, mu burezi, mu kwita ku bana, mu buhinzi, muri za gahunda z’imibereho aho bigaragara ngo iyo umuntu avuga kurwanya ubukene n’ubusumbane ubusanzwe wabigeraho ute? Igisubizo ni ukubaka umuntu.”

Gatsinzi avuga ko mu kerekezo k’igihugu inzego hari icyo zisabwa. Ati “Turabisabwa cyane kubera ko igihugu cyamaze kumenya ikibazo turwana na cyo. Birashoboka kurwanya ubukene no kugabanya ubusumbane ari uko ingamba zacu zirimo kwita ku miterere y’ubukene, dufite abantu bari mu bukene bangana iki? Bafite ubushobozi bungana iki, bafite imyumvire ingana ite? Akaba ari yo mpamvu tuvuga tuti mu Rwanda nta bwo ikigo kimwe ari cyo cyarwanya ubukene bukabije ahubwo dushaka ubwunganizi mu nzego zose zirimo uburezi, ubuzima, gahunda zo kurwanya ubukene, tukaba tuzi ngo ubwo buryo bwo gukorera hamwe na sosiyete sivili ndetse n’abikorera twaba turi mu nzira nziza zo kurwanya ubukene n’ubusumbane.”

Prof. Musahara Herman, umushakashatsi, umwarimu muri kaminuza akaba n’umunyamuryango w’Ihuriro ry’Abashakashatsi ku bukungu mu Rwanda EPRN, asobanura impamvu ku mugabane w’Afurika hagenda haba ubukene n’ubusumbane.

Agira ati “Impamvu ya mbere ni politiki. Ni ngombwa ko habaho politiki ituma ubukene bugabanuka. Biragaragara ko no mu bihugu by’Afurika yo munsi y’Ubutayu bwa Sahara harimo n’u Rwanda habayemo umuvuduko ushimishije w’ubukungu ariko ugasanga ubukene n’ubusumbane biracyahari.”

Avuga ko ari ngombwa gushyira ingufu mu kongera umuvuduko w’ubukungu. Ati “Ni ngombwa ko ugira ibyo ukoresha kugira ngo ugabanye ubukene ariko hakabaho na za politiki zituma hatabaho bamwe nka kuriya bavuga ko abakire 80 ku Isi bashobora kuvanaho ubukene, abantu ntibabe banaburara aho ari ho hose ku Isi. Ni ngombwa ngo havanweho politiki yatuma habaho ubwo busumbane bw’abantu bamwe bakira cyane abandi bagasigara inyuma”.

Prof. Musahara avuga ko muri Afurika yo munsi y’ubutayu bwa Sahara ari ngombwa ko habaho izindi ngamba n’ibindi bikorwa byo gufasha abakene basubiye inyuma kubera umuvuduko w’ubukene, atanga urugero nk’ubudehe, Girinka, n’ibindi.

Abitabiriye inama bagaragaje uko ubukene n’ubusumbane mu by’ubukungu byifashe ku Isi no muri Afurika (Foto Gentil G.)

Umwanditsi:

Kayitare Jean Paul

Tanga Igitekerezo

Email yanyu ntigaragazwa ku rubuga. Amazina na Email ni ngombwa.