Kigali: Barashima igisubizo cya WASAC k’ibigega by’amazi byimukanwa

Yanditswe na TUMUKUNDE GEORGINE

Ku ya 01-12-2020 saa 14:32:36
Ibigega birimo kwifashishwa mu gihe hakirimo gukorwa imishinga migari yo kwegereza abaturage amazi

Abaturage bo mu bice bitandukanye by’Umujyi wa Kigali byari bifite ikibazo cy’amazi kurusha ibindi, baratangaza ko kubegereza amazi hifashishijwe ibigega byimukanwa byabagobotse bakaba bararuhutse ingendo bakoraga bajya kuvoma kure bamwe bakanayabona ahenze cyangwa atari meza.

Ibigega by’amazi babyegerejwe n’Ikigo k’Igihugu gishinzwe amazi n’isukura (WASAC) ku bufatanye n’Ikigo cy’Abayapani gishinzwe Ubutwererane Mpuzamahanga ( JICA).

Bamwe mu baganiriye n’Imvaho Nshya, bagaragaje ibyishimo baterwa no kuvoma hafi bakabasha no kwikorera indi mirimo ibateza imbere.

Uwitwa Tuyishime Emmanuel utuye mu Mudugudu wa Rwintare, Akagari ka Gitaraga mu Murenge wa Masaka, mu Karere ka Kicukiro, yagize ati: “Amazi yatugezeho twarabyishimiye! Twari dufite ikibazo cy’amazi gikomeye; ijerikani y’amazi yavaga aho bita i Kabuga ikatugeraho ihagaze amafaranga 200, 300 cyangwa ukohereza umwana kuvoma akaba yagwa mu gishanga bikadutera ikibazo. Ahantu twakuraga amazi hari nk’urugendo rw’isaha”.

Umuturanyi we Mutuyimana Felicité ati: “Ikibazo cy’amazi cyari giteye inkeke mu Mudugudu wacu wa Rwintare, cyari kiremereye cyane abenshi bajyaga mu gishanga cyangwa tukagura ijerikani; ni amahirwe twabonye kuko kutagira amazi byatumaga bamwe bavoma ibishanga bakahakura uburwayi nk’inzoka…”

Uwemereyimana Esther utuye mu Mudugudu wa Kazo mu Kagari ka Shango, mu Murenge wa Nduba mu Karere ka Gasabo, na we ati: “Mbere y’uko aya mazi atugeraho twavomaga kure, ijerikana igura amafaranga 150[…], aya mazi rero twarayishimiye, turayagura igiceri cya 20, twebwe muri make tuba twumva ari nk’ubuntu. Turashimira ubuyobozi bwatuzaniye amazi, turashimira Leta yacu…”

Iyo amazi agiye gushira mu kigega WASAC ihita ishyiramo andi

Mu rwego rw’imicungire y’ibi bigega, abaturage bitoramo uwo babona ari inyangamugayo akazajya avomesha ndetse akanamenyesha WASAC igihe amazi agiye gushiramo ikazana andi.

Ndagiriyemungu Theogene uvomesha ku kigega kiri mu Mudugudu wa Kazo, yagize ati: “Iyo hasigayemo nka metero kibe ebyiri mpita mpamagara ku buryo amazi hano adashobora kubura”.

Avuga ko bitewe n’ibihe, hari igihe ikamyo igemura amazi ishobora kuhagera nka kabiri ku munsi.

Nkuko WASAC ibisobanura, biriya bigega byagiye bishyirwa ku masite atandukanye yabanje gukorerwa inyigo hakarebwa uko ikibazo k’ibura ry’amazi gihagaze, ingo zihatuye n’umubare w’ibigega bikenewe bizatuma abaturage batongera gukora ingendo ndende bajya kuvoma.

Site zashyizweho  ibigega byimukanwa ni Bibare, Zindiro, Kamahinda, Musave, Avega, Busanza, Rwimbogo, Gasaraba, Masaka, Muyumbu, Ntora, Gasanze, Nduba, Muganza ( Kimisagara National) Nyagasozi, Amakawa na Rebero. Ibigega byashyizweho ni 26, buri kigega gifite metero kibe 10 ni ukuvuga ritiro ibihumbi 10. Ni ibigega bishobora kwimurwa bigashyirwa ahandi mu gihe abaturiye site byari biriho begerejwe amazi mu ngo zabo.

Ibigega birifashishwa hategerejwe irangira ry’imishinga migari y’amazi

Umuyobozi Mukuru wa WASAC Eng. Muzola Aimé, yasobanuye ko biriya bigega byashyizweho kugira ngo bibe byifashishwa n’abaturage bo mu duce tudafite amazi n’ututayabona ku buryo buhoraho nk’uko ahandi bayabona mu gihe imishinga migari y’igihe kirekire yo kubegereza amazi ikirimo gushyirwa mu bikorwa.

Ati: “Hakozwe imishinga y’igihe kirekire, ubu igeze ku rwego rushimishije; twubatse ibigega n’imiyoboro ariko nta bwo irarangira, uwo mushinga uracyakorwa, mu gihe utararangira hashatswe igisubizo kihuse, kuko niba uzamara undi mwaka kugira ngo ahantu hatandukanye tuhageze amazi hose bayabone, muri icyo gihe abantu baba bayakeneye umunsi ku wundi, harebwe uburyo bwihuse bwo kuyabagezaho, aho kugira ngo umuturage ashoke ibishanga ahubwo abashe kuyabona hafi ku mafaranga 20 ku ijerikani mu gihe dutegereje ko umushinga urangira, umuntu akayabona mu buryo buhoraho kandi mu rugo rwe”.

Eng Muzola Aimé, Umuyobozi Mukuru wa WASAC, avuga ko imishinga yo kwegereza abaturage amazi ikomeje kwihutishwa

Yakomeje ashimangira ko imishinga migari yo kwegereza amazi abatayafite irimo kwihutishwa, hari n’uruganda rw’amazi rwa Kanzenze ruzatanga metero kibe 40.000 ku munsi, biteganyijwe ko ruzuzura muri uku kwezi k’Ukuboza 2020.

Eng. Muzola yanagaragaje ko gahunda yo kubaka imiyoboro y’amazi ikomeje mu bice byose by’Umujyi wa Kigali ndetse no mu nkengero zawo nk’i Runda, Rugalika, Muyumbu, Karumuna na Kanyinya.

Ni uduce tubarwa muri uwo mushinga waguye wo guhindura amatiyo hagashyirwamo amanini no kuyashyira aho atari asanzwe ari kugira ngo abahatura bage bahasanga ibikorwa remezo by’amazi.

Ibigega by’amazi byagiye bishyirwa kuri site zitandukanye hakurikijwe uburemere bw’ikibazo cy’amazi gihari

Uwemereyimana Esther avuga ko bishimiye amazi begerejwe

Umwanditsi:

TUMUKUNDE GEORGINE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.