Kigali: Babiri bishwe na COVID-19 bari bafite ibindi bibazo by’ubuzima

Yanditswe na Tumukunde Georgine

Ku ya 10-08-2020 saa 16:02:16

Ku wa Gatandatu tariki ya 8 no ku Cyumweru tariki 9 yabaye iminsi ya mbere yatangajwemo abarwayi b’icyorezo cya COVID-19 babuze ubuzima. Uwatangajwe ku wa Gatandatu yari umugabo w’imyaka 51 y’amavuko, mu gihe uwo ku CYumweru yari umugabo w’imyaka 77.

Minisitiri w’Ubuzima Dr. Daniel Ngamije, yavuze ko abo bombi bagaragaye mu minsi ibiri ikurikirana bari bafite ibindi bibazo by’ubuzima, bafite izindi ndwara, akaba aboneraho gusaba abafite uburwayi bwa karande kwirinda kurushaho, ariko n’abandi bantu muri rusange ntibadohoke ku ngamba zashyizweho.

Yagize ati: “…icyo bitwigisha ni uko iyi ndwara twese tugomba kuyirinda, birumvikana ko hari abagomba kurusha abandi kuyirinda, ndashaka kuvuga abafite ibindi bibazo by’ubuzima bazi cyangwa bakagombye kuba bazi n’umuryango wabo wagombye kuba uzi”.

Yakomeje asobanura ibyo byiciro by’abagomba kuyirinda kurusha abandi agira ati: “Hakunda kugaragara abantu bafite ibibazo by’umubyibuho ukabije, abafite indwara bamaranye na zo igihe; yaba za diyabete, asima cyangwa izindi ndwara zo mu myanya y’ubuhumekero. Ibyo ni ibibazo umuntu akwiriye kumenya, noneho iyo byiyongereyeho imyaka iri hejuru ya 65 kuzamura, burya umubiri uba utangiye gucika intege, utabasha kwirwanaho neza iyo haje indwara zikomatanyije”.

Dr. Daniel Ngamije arakangurira abafite biriya bibazo kurushaho kwirinda n’umuryango wabo ukabafasha ntutume bajya ahahurira abantu benshi ngo usange bahanduriye.

Anibutsa n’abandi muri rusange ko batagomba kwirara kuko hari n’abagiye bagaragara mu bindi bihugu bagifite imyaka yo hasi bishwe na kiriya cyorezo kandi batari banafite ibindi bibazo by’ubuzima.

Minisitiri w’Ubuzima Dr Ngamije Daniel,

Mu kiganiro yagiranye na RBA, yakomoje no ku bijyanye n’uko abona Abanyarwanda bahagaze mu kwirinda Covid-19, avuga ko biri ku gipimo kiringaniye, kuko nko mu kwezi gushize hari abagaragaje kwirarara nyuma yo kubona ko ibikorwa bimwe byafunguwe nyuma ya gahunda ya guma mu rugo, bibwira ko iyi ndwara itagikomeye cyangwa se habayeho gukabiriza ubukana bwayo.

Dr. Ngamije yakomeje avuga ko nimugoroba usanga nko mu nkengero z’Umujyi wa Kigali ari urujya n’uruza agapfukamunwa nta ko bazi, nta n’umwe wahaye intera mugenzi we, biganirira nk’aho nta kibazo gihari.

Asanga abagize umuryango bakwiye kugira uruhare mu iyubahirizwa ry’amabwiriza yo kwirinda Koronavirusi.

Ati: “Nta rugo rutagira umukuru w’umuryango, mu nshingano ze nashyiremo kurwanya Covid-19, atange gahunda mu rugo, abagize umuryango bamenye ko niba umuntu agiye gusohoka mu rugo, agiye guhura n’abandi bantu yambara agapfukamunwa niba atagafite urwo ruzinduko arureke, amenye ko agomba gutanga intera igihe ari kumwe na bagenzi be, ko agomba gukaraba amazi meza n’isabube ahantu agiye cyangwa akifashisha umuti wabugenewe”.

Minisitiri w’Ubuzima Dr. Daniel Ngamije avuga ko ahahurira abantu benshi nko mu masoko, mu nsengero n’ahandi, bakongera ingufu mu kwirinda, bagashyiraho ibikoresho by’isuku abaje bagakaraba, bakanareba ko uje yambaye agapfukamunwa utabyubahirije bakamusubiza inyuma.

Umwanditsi:

Tumukunde Georgine

Tanga Igitekerezo

Email yanyu ntigaragazwa ku rubuga. Amazina na Email ni ngombwa.