18°C , Partly sunny | Kigali-Rwanda

Kigali: Abaturage badafite ibyo kurya bashyiriweho nomero itishyurwa bahamagara

Yanditswe na KAYITARE JEAN PAUL

Ku ya 06-04-2020 saa 12:19:32

Ubuyobozi bw’Umujyi wa Kigali burasaba abaturage guhamagara inzego z’ubuyobozi bw’Umujyi kugira ngo bahabwe ibyo kurya muri iki gihe cya COVID19.

Mu itangazo Imvaho Nshya ifitiye kopi, Umujyi wa Kigali utangaza ko hashyizweho umurongo utishyurwa abaturage badafite ibyo kurya bazajya bahamagaraho.

Iri tangazo rigira riti “Ubuyobozi bw’Umujyi wa Kigali buramenyesha abaturage ko muri iki gihe twubahiriza amabwiriza ku ngamba zo kwirinda icyorezo cya Koronavirusi, abafite ikibazo cyo kubura ibiribwa bashobora guhamagara umurongo utishyurwa 3260”.

Muragijimana Vestine utuye mu murenge wa Nyarugunga mu karere ka Kicukiro mu Mujyi wa Kigali, yabwiye Imvaho Nshya ko yashimiye uburyo Ubuyobozi bw’Umujyi wa Kigali bwashyizeho uburyo bwo kugaragaza ko abantu babuze ibyo kurya.

Yagize ati “Nge nishimiye ko Ubuyobozi bw’Umujyi wa Kigali bwadushyiriyeho uburyo bwo gusaba ibiribwa kandi tugakomeza kwirinda icyorezo cya Koronavirusi. Icyo nsaba nuko byategurwa neza kugira ngo hazabemo umucyo kandi bizagezwe ku bahamagaye kugira ngo twirinde ingendo zitari ngombwa”.

Harabagabo Cassien nawe wari atunzwe no gukora ibiraka, yishimiye ko abadafite ibiribwa ko bashyiriweho uburyo bwo kubisaba Ubuyobozi bw’Umujyi wa Kigali. Ati ” Ndashimira ko Ubuyobozi bw’Umujyi bukomeje kudutekerezaho kubera uburyo bwadushyiriyeho bwo guhamagara dusaba ibiribwa. Ubuzima ku bari batunzwe n’ibiraka bwifashe nabi ariko kuba ubuyobozi bukomeje kudutekerezaho ni byiza kandi turishimye”.

Ubuyobozi bw’Umujyi wa Kigali busaba abatuye Umujyi wa Kigali gukomeza kubahiriza amabwiriza yo kwirinda icyorezo cya Koronavirusi, baguma mu rugo nkuko bigaragara mu itangazo ryashyizweho umukono na Meya w’Umujyi wa Kigali, Rubingisa Pudence.

Umwanditsi:

KAYITARE JEAN PAUL

One Comment on “Kigali: Abaturage badafite ibyo kurya bashyiriweho nomero itishyurwa bahamagara”

  1. Muraho neza! Mbanze gushima Leta yacu; irimo gutaha abatura Rwanda kubona ibyo kurya; ariko nkaba nsaba ko umuyobozi bwohejuru ko bwakurikirana ko bitera kubi bigenewe; ahenshi harakora ikimenyane.

    Murakoze.

Tanga Igitekerezo

Email yanyu ntigaragazwa ku rubuga. Amazina na Email ni ngombwa.