26°C , Partly sunny | Kigali-Rwanda

Kigali: Abamotari biteguye kubahiriza ibyo bazasabwa muri COVID-19

Yanditswe na KAYITARE JEAN PAUL

Ku ya 20-05-2020 saa 11:50:28
Abamotari biteguye gusubira mu muhanda kandi bakubahiriza amabwiriza yo kwirinda COVID-19

Abamotari batandukanye mu Mujyi wa Kigali barishimira ko bagiye gusubira mu kazi guhera tariki ya 01 Kamena 2020, nkuko bigaragara mu byemezo by’inama y’Abaminisitiri yabaye ku wa Mbere tariki 18 Gicurusi 2020.

Bamwe mu baganiriye n’Imvaho Nshya, bavuga ko biteguye kubahiriza amabwiriza bazahabwa n’ubuyobozi bwa FERWACOTAMO n’inzego zitandukanye zirimo n’izishinzwe umutekano wo mu muhanda.

Kavamahanga Evariste utuye mu Murenge wa Nyarugunga mu Karere ka Kicukiro, avuga ko yishimiye kugaruka mu kazi ariko by’umwihariko agashimira ubuyobozi bw’Igihugu bwakomeje gushyiraho umurongo wo kwirinda icyorezo cya COVID-19.

Nubwo Kavamahanga agiye kugaruka mu kazi, ngo yiteguye gushyira mu bikorwa amabwiriza azahabwa n’inzego zitandukanye. Ati “Nishimiye kugaruka mu kazi ariko nkazubahiriza amabwiriza yo kwirinda COVID-19. Moto ndimo kuyikoresha no kugerageza gushaka ibyangombwa bizatuma ngaruka mu muhanda nta nkomyi”.

Ruvusha Hamadi na we usanzwe akorera akazi ko gutwara abagenzi kuri moto mu Mujyi wa Kigali, ashima ingamba zafashwe zo kwirinda icyorezo cya COVID-19 akaba yiteguye gusubira mu kazi, yubahiriza amabwiriza yo kwirinda Koronavirusi.

Ati: “Ntawe utakwishimira ko tugiye kugaruka mu kazi ariko natwe nuko tugomba kubahiriza gahunda yo kwirinda Koronavirusi. Bibaye byiza buri wese utwara abagenzi kuri moto, azasabwe kugira umuti usukura intoki (Hand Sanitizers) hato tutazongera kumva hafashwe ingamba zo gusubira mu rugo. Abamotari twitegure kandi tuzubahirize ibyo tuzasabwa byose”.

Ngarambe Daniel, Perezida w’Urugaga rw’Abamotari mu Rwanda FERWACOTAMO, na we yishimira uko Leta irimo gufasha abamotari nk’aho RRA yamaze gukuriraho umusoro abamotari kubera iminsi bamaze badakora.

Yagize ati “Ikiza twabonye nuko RRA yakuyeho umusoro w’igihe tumaze tudakora ibyo byose twarabyishimiye. Mu by’ukuri twashimiye Leta uburyo yadufashije, kandi natwe twiteguye neza ko n’ibindi natwe dusabwa, tugomba kureba uko dufasha abamotari bakabikemura”.

Twibutse ko abakora akazi ko gutwara abagenzi kuri moto no ku igare, bizatangirana n’ukwezi kwa Kamena 2020 ndetse n’ingendo hagati y’intara n’izindi zizasubukurwa.

Umwanditsi:

KAYITARE JEAN PAUL

3 Comments on “Kigali: Abamotari biteguye kubahiriza ibyo bazasabwa muri COVID-19”

  1. Mureke dushimire inzego zitandukanye z’ubuyobozi bw’igihugu cyacu,mu kudufasha kubonera ibisubizo ibibazo duhura nabyo.Muri abo gushimirwa pe! Turashimira kandi RRA Kubwo kugira imisoro basonera abasoreshwa,harimo n’abamotari.RRA ntiyadusobanurira uko iby’umusoro uba waratanzwe bitarenze kuwa 31 Werurwe 2020 bizagenda,n’uko uwagombaga kuzatangwa bitarenze kuwa 30 Kamena 2020 uzagenzwa? Niba byaravuzwe kandi,ababyumvise neza mwatubwira uko bimeze.Murakoze!

  2. RURA nayo izavuge kuri za Autorisation de transport zarangiye n’izigiye kurangira uko bizagenda,nyuma y’igihe abamotari bamaze badakora. Erega hari n’abo za Assurance zarangiriyeho badakora! Ngira ngo ibi byo birareba police.Murakoze!

Tanga Igitekerezo

Email yanyu ntigaragazwa ku rubuga. Amazina na Email ni ngombwa.