17°C , Thunderstorms | Kigali-Rwanda

Kigali: Abagore basabwe guhagurukira ibibazo bikibangamiye umuryango

Yanditswe na Mutungirehe Samuel

Ku ya 21-09-2019 saa 17:18:16
Ba mutima w'Urugo bagize inama y'igihugu y'abagore ku rwego rw'Umujyi wa Kigali bahize kongera imbaraga mu byo bakoraga bagateza imbere umugore muri byose (Foto Samuel M)

Abagore bagize Inama y’Igihugu y’Abagore ku rwego rw’Umujyi wa Kigali, basabwe kongera uruhare rwabo mu gukemura no gukuraho ibibazo bikibangamiye umuryango nyarwanda, byaba ibibangamiye imibereho myiza nk’umwanda, kurwanya amakimbirane ateza ibibazo byinshi mu muryango, guca ihohoterwa rikorerwa mu miryango no ku bakobwa b’abangavu bagiterwa inda zitateganyijwe, abana bagikoreshwa imirimo ivunanye no mu tubari n’abagikoresha abana mu ngo batujuje imyaka y’ubukure bakabireka.

Babisabwe n’Umuyobozi w’Umujyi wa Kigali wungirije ushinzwe ubukungu n’imibereho myiza, Umutoni Nadine, ubwo yafunguraga ku mugaragaro inama rusange y’inama y’igihugu y’abagore ku rwego rw’Umujyi wa Kigali, abasaba kongera uruhare rwabo mu gushishikariza abaturage by’umwihariko abagore nk’abagore bahagarariye abandi mu Mujyi wa Kigali.

Ni inama yahuriyemo abagore bagize iyo nama y’igihugu ku rwego rw’Umujyi wa Kigali, bamwe mu badepite bahagarariye abagore mu Nteko Ishinga Amategeko, abahagarariye urugaga rw’abagore mu Mujyi wa Kigali, ba mutima w’urugo n’uhagarariye Polisi ku rwego rw’umugi hagamijwe kurebera hamwe ibyagezweho mu mwaka wa 2018/2019 n’ibizakorwa mu ngengo y’imari y’umwaka wa 2019/2020 no kuganira ku bindi bibazo birimo n’ihohoterwa rikorerwa abangavu.

Umutoni yagize ati “Turabasaba rwose kudufasha; hariya hasi mu midugudu yacu, mu tugari, mu mirenge, bongere isuku kuko turabona abantu bakijugunya ibishingwe hanze. Ikindi kibabaje isuku ku bana iracyarimo ikibazo, mubishyiremo imbaraga tubikore bibe umuco wacu nk’abagore bahagarariye abandi mu nzego zitandukanye. Nzi ko mu mihigo ya ba mutima w’urugo birimo ariko ni ngombwa ko mbigarukaho.”

Umutoni yakomeje abibutsa ko isuku yagera no ku bice byose by’umubiri bitari ugukaraba gusa, ahubwo ababyeyi bakibuka isuku y’amenyo, haba kuri bo bwite no ku bana bato bituma inzego z’ubuzima zigaragaza ko indwara z’amenyo zirimo kwiganza kandi zitera kanseri zo mu kanwa no mu muhogo.

Umutoni yabwiye abagore bahagarariye abandi mu Mujyi wa Kigali ko hari n’ikibazo k’inzoga mu rubyiruko, aho yababwiye ko bagihagurukiye mu bacuruza inzoga, bareba niba nta bana bakoreshamo cyangwa baha inzoga kandi bitemewe.

Akomeza agira ati “Abana bacu hari n’ikindi kibazo gihari, bari kubasambanyiriza mu nzu zicumbikirwamo urubyiruko n’abandi bibana (Lodges), mu bugenzuzi twakoze na byo twarabibonye kandi bikorwa n’abantu bakuru. Nk’ababyeyi tubigarukeho, dukurikirane abana bacu, tubahe amakuru, tubiteho, abana bacu boye kwangirika kandi ari rwo Rwanda rw’Ejo.”

Umuhoza Aurore ushinzwe inama y’igihugu y’abagore mu Mujyi wa Kigali, yabwiye itangazamakuru ko muri uyu mwaka bakoze byinshi bijyanye n’inkigi enye iterambere ry’igihugu ryubakiyeho, ariko byose bigaruka ku kuzamura ubushobozi bw’abagore no kongera ubukangurambaga mu kurwanya ibibazo bikiri mu muryango nyarwanda.

Ati “Twagize uruhare runini mu gukora ubukangurambaga ku isuku, mu midugudu, mu mirenge, mu kurwanya umwanda dushishikariza ba mutima w’urugo kugira isuku, aho twagiye twubaka ubwiherero mu mirenge itandukanye y’Umujyi wa Kigali kandi dukora n’ibindi mu gushishikariza abagore gukoresha gaze mu rwego rw’isuku no kurengera ibidukikije.”

Ku kijyanye no gukomeza ibikorwa byabo mu ngengo y’imari y’uyu mwaka 2019/2020, inama y’igihugu y’abagore yagaragaje byinshi bigiye kwitabwaho mu kuzamura uruhare rw’umugore mu bikorwa bitandukanye no mu bukangurambaga ariko banita ku nkingi byubakiyeho y’umugoroba w’ababyeyi, ukumvikana nk’umugoroba w’umuryango, w’abagize umudugudu ntuharirwe abagore gusa.

Umwanditsi:

Mutungirehe Samuel

Tanga Igitekerezo

Email yanyu ntigaragazwa ku rubuga. Amazina na Email ni ngombwa.