22°C , Mostly cloudy | Kigali-Rwanda

Kicukiro: Mu Mudugudu wa Rebero biyubakiye umuhanda w’ibirometero 2

Yanditswe na Imvaho Nshya

Ku ya 03-07-2020 saa 18:55:46
I Gikondo hatashywe umuhanda wubatswe n'abaturage ubatwara miriyoni 7 (Foto Kayitare J.P)

Abaturage bo mu Mudugudu wa Rebero mu murenge wa Gikondo mu Karere ka Kicukiro barishimira ko biyujurije umuhanda w’ibirometero bibiri, bakavuga ko umunsi wo kwibohora ku nshuro ya 26 usanze hari igikorwa k’indashyikirwa bagizemo uruhare.

Ruhamya Bonavanture umuturage wagize uruhare mu kubaka uwo muhanda, avuga ko igikorwa bakoze ari ukubera ubuyobozi bwiza.

Ati: “Ibyo twakoze ni ukubera ubuyobozi bwiza bw’umudugudu bwadusabye kwihuza kugira ngo dushobore kwiyubakira uyu muhanda”.

Avuga kandi ko ku gice cy’umuhanda begereye, abaturage bashoboye kwishyira hamwe buri wese akishyura ibihumbi 400 nubwo hari ikindi gice abaturage bagiye batanga uko bishoboye akaba ariho ahera avuga ko bibohoye nubwo kwibohora bigikomeje.

Umunyamabanga Nshingwabikorwa w’Umurenge wa Gikondo Mukasano Suzan, avuga ko abaturage ari bo biyubakiye umuhanda (foto Kayitare J.P)

Ku rundi ruhande avuga mbere hari umuhanda mubi, hari amabuye ku buryo imodoka itashoboraga kuhazamuka. Ati “Abafite imodoka byarabagoraga ariko ubu hasa neza cyane ahubwo turasa Leta kuducanira amatara yo ku muhanda hano muri karitsiye”.

Umunyamabanga Nshingwabikorwa w’Umurenge wa Gikorwa, Mukasano Suzan, yabwiye Imvaho Nshya ko umuhanda ufite uburebure bwa kirometero ebyiri wakozwe n’abaturage ubwabo, ngo ukaba waratwaye miriyoni 7 z’amafaranga y’u Rwanda.

Yagize ati “Umuhanda wujujwe n’abaturage utwaye miriyoni 7 kandi hamaze gukorwa ibirometero bisaga bibiri kandi turacyakomeje ku yindi mihanda yose. Ni igikorwa cyo kwishimirwa”.

Mukasano avuga ko mbere wasangaga imihanda ihanamye bigatuma hasa nabi hakiyongeraho ikibazo cy’amazi yaturukaga haruguru bityo ngo imihanda ikangirika.

Ati: “Ibyo byatumye abaturage bishyira hamwe bubaka umuhanda bituma hahantu hamera neza kuko mbere ntabwo hari nyabagendwa ahubwo ugasanga hahora abajura”.

Aha ni ho ahera avuga ko umuhanda kugeza ubu ukoreshwa neza, akongeraho ko nta ngengo y’imari ya Leta yakoreshejwe ahubwo ko ari ubushobozi bw’abaturage no kwishakamo ibisubizo kugira ngo bature aheza.

Umutoni Justine umuyobozi w’umudugudu wa Rebero, asobanura ko kugira ngo uyu muhanda wubakwe bitizanye ahubwo ari ukubera ko abaturage ba Rebero bafite imyumvire myiza.

Ati: “Umudugudu wa Rebero ni umudugudu ugizwe n’abaturage bumva neza gahunda za Leta kandi baharanira kwigira. Twe nk’abayobozi biratworohera kandi uko niko kwibohora nyakuri.”

Abaturage ba Rebero bishimiye umuhanda biyujurije bavuga ko ari ikimenyetso cyo kwibohora (Foto Kayitare J.P)

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.