Kigali-Rwanda

Mostly cloudy
21°C
 

Kevin Monnet-Paquet nyuma yo kubagwa mu ivi azamara amezi 6 adakina

Yanditswe na Bugingo Fidèle

Ku ya 21-02-2019 saa 09:14:22
Kevin-Monnet-Paquet wagize imvune izatuma amara amezi 6 adakina

Rutahizamu w’ikipe ya Saint-Etienne mu Bufaransa akaba afite inkomoko mu Rwanda, Kevin Monnet-Paquet nyuma yo kubagwa kubera imvune yagize mu ivi byemejwe ko agiye kumara amezi 6 adakina.

Kevin Monnet-Paquet yagiriye imvune mu mukino w’umunsi wa 5 wa shampiyona, aho ikipe ya Saint-Etienne yatsinzwe na PSG igitego 1-0 tariki 18 Gashyantare 2019. Nyuma yo kugira iyi mvune yo mu ivi ku kaguru k’ibumoso, tariki 19 Gashyantare 2019 ni bwo yabazwe.

Uyu rutahizamu ufite imyaka 30 y’amavuko wari wemeye gukinira ikipe y’u Rwanda akabaza ashobora kongera gukina muri Kamena 2019. Ibi bivuze ko uyu mwaka w’imikino wa 2018-2019 uzarangira atongeye gukina. Muri uyu mwaka wa 2018-2019, Kevin Monnet-Paquet yakinnye imikino 25 atsinda igitego 1 ndetse akaba yaranatanze umupira umwe wavuyemo igitego.

Nyuma yo kwemera gukinira ikipe y’u Rwanda, umutoza Mashami Vincent akaba yari yatangaje ko bagomba kumwifashisha mu mukino wa nyuma mu itsinda H mu gushaka itike ya CAN 2019 aho Amavubi azakina na Cote d’Ivoire tariki 22 Werurwe 2019.

Uyu rutahizamu wanakiniye ikipe y’igihugu y’u Bufaransa mu kiciro cy’abato akaba ashobora kuzagaragara mu mikino yo gushaka itike ya CAN 2021 izatangira muri 2020.

Kevin-Monnet-Paquet wagize imvune izatuma amara amezi 6 adakina

Umwanditsi:

Bugingo Fidèle

Tanga Igitekerezo

Email yanyu ntigaragazwa ku rubuga. Amazina na Email ni ngombwa.