19°C , Mostly cloudy | Kigali-Rwanda

MINAGRI yatangije igihembwe k’ihinga cya 2021-A

Yanditswe na Imvaho Nshya

Ku ya 15-09-2020 saa 15:48:59

Kuri uyu wa Kabiri tariki 15 Nzeri 2020, Minisitiri w’Ubuhinzi n’Ubworozi (MINAGRI),  Dr Mukeshimana Gérardine,  ari kumwe na Guverineri w’Intara y’Iburasirazuba  Mufulukye Fred n’abandi bayobozi mu nzego zitandukanye, bifatanyije n’abaturage bo mu  Murenge wa Murundi mu Karere ka Kayonza mu  gikorwa cyo gutangiza ku mugaragaro igihembwe k’ihinga cya 2021 A.

Iki gikorwa  cyabereye ahitwa Kayongo  ahari ubutaka buhuje ku buso bwa hegitari 120 mu Tugari twa Murundi na Karambi. Aha abahinzi bakaba  basobanuriwe uburyo bwo gutera ibigori bakoresheje inyongeramusaruro (imbuto, ifumbire mvaruganda n’iy’imborera).

MinisitiriDr Mukeshimana Gérardine  yashimiye abahinzi uburyo bahuje imikoreshereze y’ubutaka, abasaba gukoresha inyongeramusaruro muri iki gihembwe kugira ngo hazaboneke umusaruro mwinshi utunga imiryango yabo  ndetse banasagurire amasoko.

Minisitiri Dr Mukeshimana yabwiye abahinzi ko igihe  bafite ikibazo bagomba kwifashisha ba Agoronome  kugira ngo babunganire. Yanabasabye kandi guharanira ko ibyo bakora babikora neza bikabateza imbere bikanateza imbere igihugu muri rusange.

Guverineri w’Intara y’Iburasirazuba  Mufulukye Fred,  na we yasabye aba bahinzi guhingira ku gihe ndetse no guharanira ko ubutaka bwose bubyazwa umusaruro kugira ngo hazaboneke umusaruro mwinshi maze iyi Ntara ikomeze kuba ikigega k’igihugu.

Mu  Ntara y’Iburasirazuba biteganyijwe ko muri iki gihembwe k’ihinga cya 2021 A  hazahigwa ubuso bungana  na hegitari 239 177. Bimwe mu bihingwa bizibandwaho harimo  ibigori bizahigwa ku buso bwa hegitari 119 829, ibishyimbo (hegitari 102 994), Soya (hegitari 1755,5), umuceri (hegitari 7685,1) n’imyumbati (hegitari 6911).

Hatangijwe n’umushinga wagutse wo kuhira imyaka uzatwara miriyari 80Frw

Mu Karere ka Kayonza hatangijwe umushinga mugari wo kuhira imyaka uzafasha aka karere mu guhangana n’amapfa ajya akibasira.

Ni umushinga uzakorera mu mirenge 8 kuri 12 igize aka karere, uzibanda ku kwegereza abaturage ibikorwa remezo bizabegereza amazi yo kuhira.

Biteganyijwe ko mu Murenge wa Ndego ari ho hazatunganywa ubuso bunini bwo kuhirwa bungana na ha 2000.

Mu myaka 6 uyu mushinga uzamara, uzakoresha miriyari zisaga 80 z’amafaranga y’u Rwanda azatangwa n’Ikigega Mpuzamahanga kita ku iterambere ry’ubuhinzi (IFAD) na Guverinoma y’u Rwanda.

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.