24°C , Partly cloudy | Kigali-Rwanda

Karate: U Rwanda rurashaka kwitegura hakiri kare shampiyona y’Afurika izabera i Kigali

Yanditswe na BIZIMANA ERIC

Ku ya 28-02-2018 saa 06:22:09
Kapiteni w'ikipe y'u Rwanda, Ngarambe Vanily (iburyo) aratangaza ko nibitegura bihagije bazitwara neza muri shampiyona y'Afurika

Ubuyobozi bw’ishyirahamwe ry’umukino njyarugamba wa Karate mu Rwanda « FERWAKA » bwashyize ahagaragara gahunda yo kwitegura shampiyona  y’Afurika « African Karate Championship 2018 » izabera i Kigali kuva  tariki  28 Kanama kugeza  tariki  02 Nzeri 2018.

Kapiteni w’ikipe y’u Rwanda, Ngarambe Vanily (iburyo) aratangaza ko nibitegura bihagije bazitwara neza muri shampiyona y’Afurika

Muri uku kwitegura,  FERWAKA  yamaze gutoranya abakinnyi 50 mu bitabiriye  irushanwa rya  “Japan Ambassador’s Cup 2018” ryabaye   tariki 10 Gashyantare 2018 akaba ari bo  bazavamo abakinnyi bazahagararira u Rwanda muri iyi shampiyona.

Kuva muri Mata 2018, aba bakinnyi bazajya bakora imyitozo bataha iwabo, binjire mu mwiherero mu mpera za Kamena 2018 bakurikiranywe n’impuguke muri uyu mukino, izaturuka mu gihugu cya Misiri.

Kapiteni w’ikipe y’igihugu, Ngarambe Vanily yabwiye Imvaho Nshya ko nibagira imyiteguro myiza bizeye kuzaza  mu makipe atatu ya mbere, banahangane n’ibihugu by’abarabu  birimo Misiri, Maroc, Algeria na Tuniziya ndetse   n’Afurika y’Epfo na Congo Brazaville itangiye kuzamuka nyuma yo kwakira imikino rusange y’Afurika «African Games 2015 ».

Ngarambe yagize ati « Nta bwo byoroshye ariko byose bisaba kwitegura. Nk’uko babivuga turamutse dutangiye muri Mata 2018 nta kuntu twabura imidali. N’iyo uwa mbere utaboneka ariko muri ibiri, itatu cyangwa ine ya mbere ntitwaburamo”.

Muri iyi shampiyona, u Rwanda ruzakina mu byiciro bibiri ari byo kwiyereka (Kata) no kurwana (Kumite).

Mu Kumite, u Rwanda ruzahagararirwa n’umuhungu umwe n’umukobwa mu byiciro bitanu hakurikijwe ibiro. Aha haziyongeraho abandi babiri mu bahungu no mu bakobwa bagire ikipe y’igihugu ya gukirana.

Muri Kata, u Rwanda ruzahagarirwa n’umuhungu n’umukobwa, aha haziyongereho abandi babiri bazakina nk’ikipe ya Kata.

Muri 2017, iyi shampiyona y’Afurika yabereye   i Yaoundé muri Cameroun  ari bwo u Rwanda rwemerewe kwakira iri rushanwa gusa nta bwo ikipe y’u Rwanda yitabiriye ahubwo hariyo Perezida wa FERWAKA, Uwayo Theogene.

Shampiyona y’Afurika u Rwanda ruheruka kwitabira yabaye muri 2014 muri Senegal. Muri 2015 nta bwo shampiyona yabaye kubera imikino y’Afurika « All African Games 2015 » ndetse no muri 2016 iyi shampiyona nta bwo yabaye.

Muri 2014 ubwo shampiyona y’Afurika  yaberaga muri Senegal, Gashagaza Solange yegukanye umudali wa Bronze naho ikipe ye ari kumwe na Kabera Rehema ndese na  Mutuyimana Providence  begukana igikombe  k’ikipe yitwaye neza mu bakobwa.

Mu bahungu, Ngarambe Vanily  usanzwe ari kapiteni w’ikipe y’igihugu yasoje ku mwanya wa 5.

 

Umwanditsi:

BIZIMANA ERIC

Tanga Igitekerezo

Email yanyu ntigaragazwa ku rubuga. Amazina na Email ni ngombwa.