17°C , Thunderstorms | Kigali-Rwanda

Kanye West ayobore urutonde rw’abaraperi binjije menshi muri 2018

Yanditswe na Gisubizo Gentil

Ku ya 21-09-2019 saa 18:51:47
Kanye West ayoboye urutonde rw'abaraperi bakize ku Isi

Kanye Omari West, umuraperi w’umunyamerika, umuririmbyi, umwanditsi w’indirimbo, ni we muraperi winjije amafaranga menshi umwaka ushize, aho yinjije Miliyoni 150 z’Amadolari.

Ibi Kanye West yabigezeho nyuma y’uko amaze iminsi ashyize imbere guhanga imideri binyuze mu myambaro, akaba aherutse gushyira ahagaragara inkweto yitiriye “Yeezy”, ubu bwoko bw’inkweto zikigera ku isoko yateganyaga ko zizinjiza akayabo ka miriyari imwe n’igice y’amadorari mu gihe cy’umwaka umwe.

Ikinyamakuru “Forbes” gisanzwe gikora urutonde rw’abaherwe batandukanye ku Isi, ku wa kane tariki 19 Nzeri 2019 cyatangaje urutonde rw’abahanzi bakora injyana ya Rap gihishura ko Kanye West ari we uri imbere y’abandi baraperi mu kwinjiza amafaranga muri uyu mwaka wa 2019.

Nk’uko iki kinyamakuru cyabyanditse kerekanye ko yakubye hafi inshuro ebyiri Shawn Corey Carter wamenyekanye cyane mu muziki ku izina rya Jay-Z. Urutonde rwakozwe hagati ya Kamena 2018 na Kamena 2019, buri muhanzi kandi yabariwe hakuwemo umusoro.

Jay-z yaje ku mwanya wa 2

Ni ku nshuro ya mbere Kanye West yicaye kuri uyu mwanya kuva yatangira urugendo rw’umuziki, mu gihe Jay-Z yari aherutse kuyobora urutonde rw’abahanzi bakize muri Leta Zunze Ubumwe za Amerika muri 2018.

Ubwo yashyiraga ku isoko inkweto za “Yeezy”, Kanye West yatangarije ikinyamakuru “Forbes” ko afite ikizere cy’uko zizamenyekana ku Isi nk’uko “Jordan” izwi.

Kanye West mu mwaka ushize yinjije menshi kurusha Jay Z kuko Jay Z yinjije abarirwa muri Miriyoni 81 z’Amadorari.

Forbes ivuga ko amafaranga ya Jay-z yiyongereye biturutse ku bitaramo bikomeye bitandukanye bizenguruka imigabane byiswe “One The Run II” afashijwe n’umugore we Beyonce.

Umuraperi Drake yaje ku mwanya wa gatatu na miriyoni 75 z’amadorari, P.Diddy ku mwanya wa kane aho yinjije Miriyoni 70, Travis Scott ku mwanya wa gatanu na miriyoni 58. Ku mwanya wa 6 hari umuraperi Eminem winjije Miriyoni 50, DJ Khaled witegura kwibaruka umwana wa kabiri ari ku mwanya wa karindwi na Miriyoni 40.

Drake yaje ku mwanya wa 3 ku baraperi bakize kurusha abandi ku Isi

Kendrick Lamar ari ku mwanya wa munani na Miriyoni 38.5, ku mwanya wa cyenda hari Migos Miriyoni 36 naho Childish Gambino wamamaye mu ndirimbo “This is America” ari ku mwanya wa 10 na miriyoni 35.

Uru rutonde rugera ku baraperi 20, uri ku mwanya wa 11 ni J-Cole ufite miriyoni 31 akaba akurikiwe ku mwanya wa 12 na Nicki Minaj ufite miriyoni 29, Cardi B ufite Miriyari 28 akaza ku mwanya wa 13

Ku mwanya wa 14 hari Swizz Beatz utunze miriyoni 23 akurikiwe na Meek Mill uri ku mwanya wa 15 aho atunze miriyoni 21, Birdman ku mwanya wa 16 na miriyoni 20. Ku mwanya wa 17 hari Future winjije agera kuri Miriyoni 19.5, Nas ari ku mwanya wa 18 na miriyoni 19, Wiz Khalifa ku mwanya wa 19 aho atunze miriyoni 18.5 mu gihe ku mwanya wa 20 hari Pitbull ubarirwa muri miriyoni 18.

Aba bahanzi bose uko ari 20 uteranyije amafaranga yabo binjije mu mwaka umwe ni Miriyoni 860 z’amadorari y’Amerika.

Travis Scott ari ku mwanya wa 5 ku rutonde rw’abaraperi bakize ku Isi

P. Diddy yisanze ku mwanya wa kane kuri urwo rutonde

Umwanditsi:

Gisubizo Gentil

Tanga Igitekerezo

Email yanyu ntigaragazwa ku rubuga. Amazina na Email ni ngombwa.