Kigali-Rwanda

Partly sunny
27°C
 

Kaminuza ya MIPC irakora amatafari arusha ‘bloc-ciment’ gukomera

Yanditswe na Ngaboyabahizi Protais

Ku ya 26-12-2018 saa 09:47:04
Bamwe mu banyeshuri ba MIPC hamwe n'amatafari agezweho bakoze (foto Ngaboyabahizi Protais).

Abatuye mu Karere ka Musanze bashima ubwiza bw’amatafari ya bloc-ciment akorwa na Kaminuza ya MIPC mu buryo bugezweho hatabayeho kuyakwita.

MIPC (Muhabura Integrated Polytechnic College (MIPC), yafunguye imiryango yayo mu mwaka wa 2014, iherereye mu Murenge wa Cyuve, Akarere ka Musanze.

Abayituriye bashima  iterambere ibagezaho ibaha imirimo, ariko cyane cyane amatafari babumba hakoreshejwe, umucanga, isima n’itaka ry’ibumba.

Aya matafari bamwe bita bloc-ciment, iyi kaminuza ya MIPC itangaza ko yayatangije mu rwego rwo kubungabunga ibidukikije, nk’uko umuyobozi wayo Pasteur Vital Manirakiza abihamya.

Aganira n’Imvaho Nshya yagize ati: “Henshi mu Rwanda tumenyereye ko habamo amatafari akoreshwa ari aya rukarakara, ahiye ariko akaba yabanje kunyura mu itanura, twebwe rero hari ayo twatekereje akubye uburambe ayo asanzwe inshuro 7, MIPC rero ikaba yaratekereje mu rwego rwo kugira ngo habungabungwe ibidukikije.

“Ariya matafari ntatwikwa, urumva ko ibimera biba biruhutse, nta myotsi umutu ahura na yo, nta n’ubwo rikoreshwa amazi ngo riratera ibyondo kuko nyuma yo kuvanga umucanga, sima, n’itaka ry’ibumba imashini ari yo ikanda iryo tafari, rigahita rikoreshwa, kandi byagaragaye ko akunzwe muri uyu mugi wa Musanze n’ahandi mbese afite isoko.”

Uyu muyobozi akomeza asaba abarangiza kaminuza kumva ko umurimo ari bo bazawihangira, cyane ko bahabwa ubumenyi ngiro muri iyi kaminuza.

Bamwe mu bahuguwe bagahabwa akazi muri iyi kaminuza ndetse n’abayituriye bavuga ko bari bakeneye hafi yabo ikigo nk’iki.

Habyarimana Jean Marie Vianney w’imyaka 55, ni umufundi wo mu Murenge wa Cyuve, Akagari ka Bukinanyana avuga ko iyi kaminuza yahinduye ubuzima bwe.

Yagize ati: Mbere nta bwo nigeze nubaka inzu y’amabati, niberaga mu mategura ku buryo iyo itegura ryahanukaga byamberaga ikibazo, aha nahaboneye amahugurwa, mpahabwa n’akazi ku buryo navuguruye inzu yange, mu buryo twita ngo ni iy’igihanga; nkayongerera agaciro ubu ifite agaciro ka miliyoni zigera kuri 4.”

Uyu mugabo akomeza avuga ko kuva yatangira gukora muri MIPC yatangiye abana be amafaranga y’ishuri kugera muri kaminuza aho umwana we amaze kuharangiza, agenda yishyura amafaranga make, bakura ku mushahara we.

Bamwe mu bubakishije kuri ariya matafari bo karere ka Musanze barimo Habineza Jean Claude wo mu murenge wa Muhoza, avuga ko aya matafari ari bimwe bituma umwubatsi yunguka.

Yagize ati: “Aya matafari nge nakubwira ko yubaka vuba kandi neza, agira n’uburambe agafasha umwubatsi kwizigamira, kuko agenda afungana bityo sima wari gukoresha ukayunguka, itafari nariguze ku mafaranga 320, ariko ndakumenyesha ko metero kare imwe aba yubatse hajyaho amatafari aya asanzwe twita ko ahiye anyuze mu ifuru rimwe na rimwe aba atahiye neza agera ku 150, mu gihe n’ijana ry’aya ritagerayo, ikiza cyayo ni uko aramba, nkaba nashishikariza abandi bubatsi kuyakoresha.”

Akomeza avuga ko iri tafari kubera ko riva mu mashini ryumye neza ridasaba kuritegerez , bituma umuntu yihutisha ibikorwa bye by’ubwubatsi.

Abanyeshuri bagera ku 1 360, abarezi 67 n’abakozi basanzwe ba nyakabyizi basaga 100, kandi batunze imiryango yabo babikesha umushahara bakura muri iyi kaminuza.

Bamwe mu banyeshuri ba MIPC hamwe n’amatafari agezweho bakoze (foto Ngaboyabahizi Protais).

Umuyobozi wa MIPC Manirakiza Vital (foto Ngaboyabahixzi Protais).

Umwanditsi:

Ngaboyabahizi Protais

4 Comments on “Kaminuza ya MIPC irakora amatafari arusha ‘bloc-ciment’ gukomera”

Tanga Igitekerezo

Email yanyu ntigaragazwa ku rubuga. Amazina na Email ni ngombwa.