17°C , Thunderstorms | Kigali-Rwanda

Kagame yashyizeho abasenateri bane barimo Dr Iyamuremye, Mukabaramba na Nyirasafari

Yanditswe na Imvaho Nshya

Ku ya 20-09-2019 saa 18:04:33
Dr. Alvera Mukabaramba yari amaze igihe ari Umunyamabanga wa Leta muri Minisiteri y’Ubutegetsi bw’Iguhugu ushinzwe imibereho myiza y’abaturage

Perezida Kagame amaze gushyiraho abasenateri bane: Dr Iyamuremye Augustin, Nyirasafari Esperance, Habiyakare François na Dr Mukabaramba Alvera.

Itangazo rya Guverinoma y’u Rwanda riravuga ko Perezida Kagame yabikoze ashingiye ku Itegeko Nshinga rya Repubulika y’u Rwanda ryo mu 2003 ryavuguruwe mu 2015, cyane cyane mu ngingo yaryo ya 80 igika cya mbere, agace ka 2, n’igika cya 5.

Ingingo ya 80 y’Itegeko Nshinga ivuga ko Sena igizwe n’Abasenateri 26 barimo 8 bashyirwaho na Perezida wa
Repubulika, by’umwihariko akita ku bumwe bw’Abanyarwanda, ku ihagararirwa ry’igice cy’Abanyarwanda
amateka agaragaza ko basigaye inyuma no ku zindi nyungu rusange z’Igihugu.

Kuba hatangajwe bane bashyizweho na Perezida, bisobanuye ko Umukuru w’Igihugu azagena abandi bane kugira ngo buzure umunani yemerewe n’Itegeko Nshinga.

Usibye umunani bashyirwaho na Perezida wa Repubulika, Ingingo ya 80 y’Itegeko Nshinga iteganya ko abandi 12 batorwa batorwa n’inzego zihariye, hakurikijwe inzego z’imitegekere y’Igihugu, 4 bashyirwaho n’Ihuriro
ry’Igihugu Nyunguranabitekerezo ry’Imitwe ya Politiki, umwarimu 1 cyangwa umushakashatsi wo muri Kaminuza no mu Mashuri Makuru bya Leta uri ku rwego nibura rw’umwarimu wungirije utorwa n’abarimu
n’abashakashatsi bo muri ibyo bigo n’umwarimu 1 cyangwa umushakashatsi 1 wo muri Kaminuza no mu Mashuri Makuru byigenga nibura uri ku rwego rw’umwarimu wungirije utorwa n’abarimu n’abashakashatsi bo muri ibyo
bigo.

Dr Iyamuremye Augustin amaze imyaka myinshi muri politiki y’u Rwanda

Nyirasafari Esperance yari asanzwe ari Minisitiri w’Umuco na Siporo kuva mu Kwakira 2018, mbere yaho yari Minisitiri w’Uburinganire n’Iterambere ry’Umuryango

Tugarutse gato kuri aba basenateri bane bagenwe na Perezida Kagame, Dr. Augustin Iyamuremye w’imyaka 73 y’amavuko, ni umugabo w’inararibonye muri politike y’u Rwanda. Ni inzobere mu buvuzi bw’amatungo, ariko asobanukiwe cyane ibijyanye n’imitegekere y’u Rwanda. Yakoze imirimo ya politike ku butegetsi bwa Habyarimana Juvénal, Sindikubwaho Theodore, Pasteur Bizimungu na Perezida Paul Kagame.

IMIRIMO YAKOZE

1977-1984: Umuyobozi wa Laburatwari ya Kaminuza y’u Rwanda
1984-1990: Umuyobozi w’ikaragiro rya Nyabisindu
Ukuboza 1990-1992: Perefe wa Gitarama
Kamena 1992- Mata 1994: Umuyobozi w’ibiro by’iperereza mu gihugu
Nyakanga 1994-1998: Minisitiri w’Ubuhinzi
1998-Nyakanga 1999: Minisitiri w’Itangazamakuru
Nyakanga 1999-Werurwe 2000: Minisitiri w’Ububanyi n’Amahanga
2001-2003: Depite mu Nteko Ishinga Amategeko

Muri Gashyantare 2015 ni bwo Inama y’Abaminisitiri yagize Dr Augustin Iyamuremye umuyobozi w’Urubuga rw’Igihugu Ngishwanama rw’Inararibonye, umwanya yahawe nyuma yo kuyobora Urwego rw’Igihugu rushinzwe Intwari z’Igihugu, Imidari n’Impeta by’Ishimwe (CHENO).

Duzabagezaho amateka y’abandi basigaye mu nkuru zacu zitaha.

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.