21°C , Partly cloudy | Kigali-Rwanda

Jenoside: Bizimana Augustin wahigwaga bukware amaze imyaka 20 apfuye

Yanditswe na Imvaho Nshya

Ku ya 22-05-2020 saa 13:19:49

Ubushinjacyaha Bukuru bw’Urwego Mpuzamahanga Rwashiriweho Gukora Imirimo y’Insigarira y’Inkiko Mpanabyaha (IRMCT). bumaze imyaka 20 bushakisha Bizimana Augustin ukekwaho ibyaha bya Jenoside yakorewe Abatutsi kandi atakiriho.

Umushinjacyaha Mukuru Serge Blammertz w’Urwego IRMCT  Serge Brammertz, yatangaje kuri uyu wa Gatanu tariki 22 Gicurasi 2020 yemeje ko Bizimana Augustin wari ku rutonde rumwe na Kabuga Félicien, Mpiranya Protais n’abandi bashyiriweho intego ya miriyoni 5 z’amadolari y’amerika ku bazabasha gutanga amakuru y’aho baherereye, yapfuye mu mwaka wa 2000.

Kabuga Félicien, Getete Jean Baptiste, Bizimungu Augustin, Renzaho Tharcisse na Hategekimana Ildephonse ni bo bamaze gufatwa kuri urwo rudonde bashyikirizwa ubutabera, mu gihe abagishakishwa barimo Bizimana Augustin, Ngirabatware Augustin, Nizeyimana Ildephonse, Mpiranya Protais, Callixte Nzabonimana, Munyakazi Yussuf John, Ryandikayo, Sikubwabo Charles, Ndimbati Aloys na Pheneas Munyarugarama.

Ubushakashatsi bwimbitse bwerekanye ko Bizimana yapfuye muri Kanama 2000, mu gace ka Pointe Noire, muri Repubulika ya Congo-Brazaville.

Bizimana yari Minisitiri w’Ingabo muri Guverinoma yiyise iy’Abatabaazi ari na yo yashyize mu bikorwa umugambi wa Jenoside yakorewe Abatutsi.

Urukiko Mpuzamahanga Mpanabyaha rwashyiriweho u Rwanda (ICTR) rwasimbuwe na IRMCT, rwashinjaga Bizimana ibyaha 13 bya Jenoside birimo ubufatanyacyaha muri Jenoside, gutsemba abantu, ubwicanyi, gusambanya ku gahato, iyicarubozo, ndetse n’ibindi bikorwa bya kinyamaswa bitesha agaciro umuntu, byose bifitanye isano na Jenoside yakorewe Abatutsi mu 1994.

Mu bindi byaha  Bizimanayashinjwaga, harimo kuba ku isonga mu rupfu rw’uwahoze ari Minisitiri w’Intebe Agathe Uwiringiyimana n’abasirikare 10 b’Ababiligi bari mu butumwa bwa LONI, ndetse n’ubwicanyi bwakorewe abasivili mu zahoze ari Perefegitura ya Gisenyi, Ruhengeri, Butare, Kibuye na Cyangugu.

Kwemeza ko Bizimana yapfuye, ni umwe mu misaruro iri gutangwa n’iperereza ryimbitse kandi rikoresheje ikoranabuhanga uru rwego ruri gukora rufatanyije n’abayobozi mu Rwanda, Congo Brazaville, u Buholandi na Leta Zunze Ubumwe z’Amerika.

Mu mwaka ushize, uru rwego rwakoze ibizamini by’isano-muzi (DNA) ku bisigazwa by’umubiri w’umuntu byakuwe mu mva muri Pointe Noire. Iperereza ryakozwe ndetse ibisubizo bya DNA byagaragaje ko uwo mubiri wari uw’undi muntu, IRMCT ikomeza kugenzura ibindi bimenyetso bifite aho bihuriye n’urupfu rwa Bizimana, biza gushimangira urupfu rwe.

IRMCT irashimira by’umwihariko Ikigo cy’u Buholandi gishinzwe gupima ibimenyetso (Netherlands Forensic Institute) ndetse na Laboratwari y’igisirikare cya USA ishinzwe gupima ibimenyetso n’isano-muzi, ku bw’uruhare rukomeye byagize mu kugaragaza ukuri kuri Bizimana .

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.