17°C , Partly sunny | Kigali-Rwanda

Jado Sinza  yatangiye gukora filimi y’uruhererekane yise “Ndategereje”

Yanditswe na BUGINGO FIDELE

Ku ya 11-06-2021 saa 09:58:43
Umuririmbyi w'indirimbo zihimbaza Imana, Jado Sinza

Umuhanzi w’indirimo zihimbaza Imana, Jado Sinza yatangiye gushyira hanze filimi y’uruhererekane yise “Ndategereje Series”.

Mu kiganiro cyihariye yagiranye n’Imvaho Nshya, Jado Sinza yagarutse ku rugendo rwo mu muziki ndetse n’uko yinjiye muri filimi y’uruhererekane.

Jado Sinza   ni muntu ki?

Amazina ye ni Sinzabyibagirwa Jean De Dieu ariko izina akoresha mu buhunzi ni “Jado Sinza”. Yavukiye mu Karere ka Nyamagabe, Intara y’Amajyepfo mu 1995. Ni umwana wa 2 mu bana 5 ba Harerimana Anaclet  na  Mukarusanga  Philomene bakunda kwita “Bitangaza”.

Yatangiriye amashuri abanza i Nyamagabe akomereza muri Kigali asoreza amashuri yisumbuye  mu ishuri rya St Joseph Le Travailleur mu Mujyi wa Kigali. Ubu atuye Kimironko mu Karere ka Gasabo.

Uko yatangiye ubuhanzi

Jado Sinza avuga ko yakuze yiyumvamo impano yo kuririmba kuko yakundaga umuziki cyane. Ati : “Nasanze  ababyeyi banjye ari abakirisitu  aho basengeraga muri ADEPR , icyo gihe najyaga mvuza za ngoma zisanzwe neza  nkanayobora amateraniro y’abana nagera no mu ishuri nkirirwa nshuranga ku ntebe n’abarimu tukabipfa”.

Akomeza avuga ko bageze i Kigali yagiye mu kigo cy’umuzungu witwaga Marlene Lee  cyigishaga umuziki “Kigali Music School” ubu cyahindutse “Oak Dale Kigali Music School”. Jado Sinza ati : “Nagiyeyo kugira ngo nzamure ubumenyi kuko nigaga gucuranga Piano.”

Jado Sinza yize umuziki

Jado Sinza avuga ko muri 2011 ari bwo yatangiye kwiga umuziki hanyuma muri 2016 atangira kuririmba ku giti cye kuko mbere yaririmbaga  muri Korali mu rusengero. Muri 2016 ni bwo yasohoye indirimbo ye ya mbere itaramenyekanye cyane yitwaga “Akira ishimwe”.

Ati : “Nayikoze nk’ukina ngo ngerageze ndebe, abantu bayumvise  barambwira bati wakomeza, bintera imbaraga ndakomeza.”

Jado Sinza  yakurikijeho indirimbo yitwa  “Nabaho”  akomeza no guhimba izindi ubu afite Alubumu 3 ziriho indirimbo zakunzwe  nka “Golgotha, “Ndategereje”, “Ongera wivuge” n’izindi.

Avuga ko guhanga izi ndirimbo byose bituruka mu ijambo ry’Imana. Ati : “Gusobanukirwa no guhishurirwa ibyo Imana yatugambiriyeho byose biva mu ijambo ry’Imana gusa bishobora  no guturuka  mu bintu nanyuzemo nkabihuza n’ijambo ry’Imana  bikabyara ikintu gishobora gufasha abandi.”

Uko yinjiye muri filimi y’uruhererekane

Jado Sinza atangaza ko usanzwe yakuze akunda ibintu bibiri, umuziki na Filimi ariko atiyumvishaga ko  yazagera ku rwego rwo kuyikora.

Ati: “Naje gusobanukirwa ko iyo ukunda ikintu hari igihe Imana iba yarakigukundishije  ngo kizagire umumaro wenda mu gihe utazi.”

Asobanura uko yatangiye gutegura filimi y’uruhererekane, Jado Sinza yagize ati : “Nakoze indirimbo yitwa Ndategereje bitewe n’ibihe nanyuzemo bitari byoroshye, indirimbo mvugamo ko nta kindi dufite uretse gutegereze icyo Imana yagambiriye irema umuntu kigasohora kuko buri wese imufiteho umugambi, naravugaga nti nubwo ndi mu bihe bimeza  gutya  ariko ntegereje kuzasingira icyo Imana yagambiriye ku buzima bwanjye, ntangira kuvugamo amagambo  y’ibyiringiro   n’ibyiza mbona imbere binampa kwizera  no  gutegereza nihanganye.”

Jado Sinza avuga ko nyuma yo gukora iyi ndirimbo muri 2018 abantu bayikunze cyane na we akayikunda cyane kuko yamwubatse. Ati : “Yaje ari nk’igisubizo kuri bya bibazo nibazaga muri ibyo bihe.”

Jado Sinza ari kumwe na bamwe mu bo bafatanya gukora filimi “Ndategereje”

Sinza akomeza avuga ko nyuma y’iyi ndirimo yatangiye kwiyumvamo ibintu byinshi ndetse ko yabyukaga mu ijoro akabyandika ariko akibazo icyo azabikoresha kuko yumva ko nta bushobozi afite bwo kuba yakwandika igitabo.

Ati : “Naje kwibuka ko mu bintu  nakuze nkunda harimo filimi, nti reka nzabinyuze muri  filimi y’uruhererekane ntangira kubitecyerezaho  bigenda byaguka  dutangira no gukora iyi filimi”.

Jado Sinza avuga ko “Ndategereje Series” intego yayo ari ukwibutsa abantu ko gutegereza bihanganye birimo amahirwe yo kuzabona  ineza y’Imana  n’umugambi wayo ku buzima bwabo.

 Agace ka mbere karasohotse

Ku wa Mbere tariki 07 Kamena 2021 ni bwo  agace ka mbere ka “Ndategereje Series” kasohotse kanyura kuri TV10 saa tatu n’igice  z’umugoroba (21h30). Jado Sinza atangaza ko  bishimiye gutangira gushyira ahagaragara iyi filimi avuga ko bizakomeza agace kazajya gasohoka buri wa mbere kakanyura kuri iriya televiziyo, kakongera gucaho ku wa Gatatu  ndetse kagashyirwa  ku muyoboro we wa Youtube “https://www.youtube.com/channel/UC8Or1RFT5jtOffcvvR1va1Q”.

Jado Sinza avuga ko nubwo gukora filimi bihenze ariko yijeje abazazikunda ko biteguye kuyibagezaho kuko bafite  uduce  twinshi bateguye kugeza ubu kandi bazakomeza. Ashimira abamufashije n’abakomeje kumufasha.

Jado Sinza agaragaza ko gukora iyi filimi byamutwaye amafaranga menshi ariko inyungu yifuza ya  mbere ari   uko ubutumwa bwiza atanga  ababwakira bazanyurwa, ikindi  avuga ko iyo umuntu arimo gukora  hari  amarembo afunguka.

Mu butumwa  yageneye abakunzi b’ibihangano bye, Jado Sinza  yavuze ko abakunda kandi abifuriza ibyiza ariko akeneye n’ubufasha bwabo.

Umwanditsi:

BUGINGO FIDELE

One Comment on “Jado Sinza  yatangiye gukora filimi y’uruhererekane yise “Ndategereje””

  1. Muvandimwe jado komerezaho imana izakugeze kure kandi izaguhe kuzaba mubwami bwijuru ntugacige intege kubera mwisi haribyinshi bigoye so keep going

    Igitekerezo: nagugango komerezago kandi unjye wifashisha by biriya thanks

Tanga Igitekerezo

Email yanyu ntigaragazwa ku rubuga. Amazina na Email ni ngombwa.