Kigali: Isoko ryo Kwa Mutangana rirafungurwa kuri uyu wa Kabiri

Yanditswe na Imvaho Nshya

Ku ya 14-09-2020 saa 05:26:16

Ubuyobozi bw’Umujyi wa Kigali ubwatangaje ko isoko rya Nyabugogo rizwi nko “Kwa Mutangana” n’amaduka arikikije birafungurwa ku wa Kabiri tariki ya 15 Nzeri 2020, ariko hafashwe ingamba zo kugabanya ubucucike muri iryo soko.

Ubuyobozi bw’Umujyi wa Kigali bwasobanuye ko iri soko rigiye gufungurwa nyuma y’igenzura ryakozwe n’inzego z’ubuzima ndetse n’imyiteguro y’abasanzwe barikoreramo mu rwego rwo gushyira mu bikorwa ingamba zo kwirinda icyorezo cya COVID-19.

Kugira ngo ubucucike bugabanuke mu isoko ryo Kwa Mutangana, amaseta yongerewemo atari asanzwe mu myubakire yaryo agomba kuvanwaho ndetse n’abacururizaga mu nzira ku buryo umuntu yinjira bimugoye bakahava.

Umujyi wa Kigali wasobanuye ko abarikoreragamo ubucuruzi bw’imboga n’imbuto n’ababiranguza bo bazakomeza gukorera ku Giticyinyoni. Abaranguzaga ibirayi bo bazakomeza gukorera mu Nzove.

Biteganyijwe ko mu isoko hazajya hakoreramo 50% by’abari basanzwe barikoreramo, bakazajya basimburana, mu rwego rwo kwirinda ikwirakwira rya COVID-19.

Iki kemezo gifashwe nyuma y’uko hashize iminsi igera kuri 11 hafunguwe isoko ryo mu Mujyi (Kigali City Market) yari yarafungiwe rimwe  guhera tariki 17 Kanama 2020,  nyuma y’uko byari byemejwe n’inzego z’ubuzima ko ayo masoko yagaragayemo umubare munini w’abamaze kwandura icyorezo cyaCOVID.

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.