27°C , Mostly cloudy | Kigali-Rwanda

Inyito “Jenoside yakorewe Abatutsi” yemejwe na UN mu nteko rusange yayo

Yanditswe na MUGISHA BENIGNE

Ku ya 29-01-2018 saa 07:45:10
Inteko rusange ya LONI yemeje ko mu Rwanda habaye Jenoside yakorewe abatutsi

Nyuma y’imyaka  hafi  24 Jenoside yakorewe Abatutsi ibaye, Umuryango w’Abibumbye (UN) urashyize wemeza ikoreshwa  ry’iyo nyito aho kuba “Jenoside yabaye mu Rwanda”  nk’uko  yakoreshwaga mu rwego rw’Umuryango w’Abibumbye.

Inteko rusange ya LONI yemeje ko mu Rwanda habaye Jenoside yakorewe abatutsi

Ibi byashimishije Abanyarwanda n’inshuti zabo, bikaba byanagarutsweho na Dr Bizimana Jean Damascene, Umuyobozi wa Komisiyo ishinzwe kurwanya Jenoside (CNLG), aho avuga ko asanga ari intambwe nziza itewe mu rwego mpuzamahanga, bikazafasha kurwanya no guhana abapfobya n’abahakana Jenoside yakorewe abatutsi.

Yagize ati “N’ubwo mu Rwanda twakoreshaga inyito ya Jenoside yakorewe Abatutsi, Umuryango w’Abibumbye wo si ko wabibonaga, ahubwo wemeraga ko mu Rwanda habayeho Jenoside, ariko ntugaragaza igice cy’abaturage bayikorewe, iyi rero ni intambwe nziza igaragaye, turayishimiye.”

Dr Bizimana avuga ko inyito yari isanzwe ikoreshwa n’Umuryango w’Abibumbye ari yo Jenoside yabaye mu Rwanda yemejwe kuva mu mwaka wa 2003, ikaba yari imaze imyaka 14 ikoreshwa ityo.

Ambasaderi Rugwabiza Valentine, uhagarariye u Rwanda muri LONI, nawe yemeza ko iyi ari intambwe nziza Umuryango w’Abibumbye uteye mu kugaragaza ukuri kwa Jenoside yakorewe abatutsi mu Rwanda.

Yagize ati “Inama rusange y’Umuryango w’Abibumbye yemeje ko nta we uvuyemo umwanzuro wo kujya UN ivuga “International Day of  Reflection on the 1994 Genocide against the Tutsi in Rwanda, ugenekereje mu Kinyarwanda ni Umunsi mpuzamahanga wo kwibuka Jenoside yakorewe Abatutsi mu Rwanda.”

Avuga ko iki kemezo kije  kuvanaho urujijo ku kemezo cyari gisanzwe cyari cyakuyeho ijambo “Tutsi” nk’ubwoko bwari bwibasiwe.

Amb. Rugwabiza avuga ko uyu mwanzuro uzatuma UN itemerera uwo ari we wese gupfobya no guhakana Jenoside yakorewe Abatutsi.

Abanyarwanda nabo ubwabo bishimiye iki kemezo cyafashwe na UN, bishimira ko nibura kije guha agaciro abazize Jenoside yakorewe Abatutsi n’abayirokotse, bavuga ko basanga UN yari yaratinze kugaragaza ukuri kwa Jenoside yakorewe Abatutsi.

Ngiruwonsanga Anatole wo mu Murenge wa Gatsata, Akarere ka Gasabo yagize ati “ Rwose LONI  yari yaratinze kwemeza iyi nyito ya “Jenoside yakorewe Abatutsi” kuko ari yo yo, ntabwo ari Jenoside yabaye mu Rwanda, kuko iyo uvuze utyo hari ukuri uba uhishe cyangwa se wirengagije. Tujye twerura tuvuge ibyabaye tutabiciye ku ruhande.”

Murebwayire Jeanne wo mu Murenge wa Muhima, Akarere ka Nyarugenge, asanga imyaka 24 yari ishize  Jenoside yakorewe Abatutsi ibaye ari imyaka myinshi ku buryo abantu bakwiye kuba bazi ukuri kw’ibyabaye, gusa ndashima Umuryango w’Abibumbye ko usubije agaciro abayizize ndetse n’abayirokotse bagifite ibikomere bitarakira.

Ati “N’ubwo byari bitinze ko LONI yemeza iyi nyito ya Jenoside yakorewe Abatutsi mu Rwanda”, nibura ndayishimira ko igihe kigeze ikabyemeza. Erega ukuri kuratinda ntiguhera, ibi ni byiza kuko bizaca intege abajyaga bayihakana bakanayipfobya.”

Tariki ya 07 Mata  buri mwaka, u Rwanda rwibuka Jenoside yakorewe Abatutsi mu Rwanda, imyaka 24 ikaba irangiye miliyoni isaga y’Abatutsi bishwe bazize uko bavutse, u Rwanda rukaba ruzizihiza ku nshuro ya 24 Jenoside yakorewe Abatutsi mu Rwanda, rwifatanyije n’isi yose kuko noneho byemejwe nta gushidikanya ko habaye Jenoside yakorewe Abatutsi mu Rwanda atari Jenoside yabaye mu Rwanda.

 

Umwanditsi:

MUGISHA BENIGNE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.