Inganda z’imyenda NIRDA yahaye imashini ziranoza ibikorerwa mu Rwanda

Yanditswe na Imvaho Nshya

Ku ya 12-06-2020 saa 06:30:49
Inganda zatsinze ipiganwa zigahabwa imashini zikomeje kunoza

Ubwo yumvaga gahunda y’Ikigo cy’Ubushakashatsi n’Iterambere ry’Inganda (NIRDA) yo gupiganira kubona imashini zigezweho n’amahugurwa  byamufasha kuzamura umusaruro mu ruganda rwe rudoda imyenda binyuze muri gahunda ya “Open Calls”, Kabera Joy ntiyazuyaje kwinjira mu ipiganwa.

Kabera ufite Uruganda rwitwa “Promota Creations” rukorera imyenda mu Mujyi wa Kigali, ni umwe mu banyenganda 50 bagiye mu ipigana ndetse anasoza mu banyamahirwe batandatu bafite inganda baritsinze.

NIRDA yatangije iyo gahunda yiswe ‘Open Calls programme’ ngo ifashe inganda, Leta ibona ko zateza imbere ibikorerwa mu Rwanda, kubona ibikoresho by’ikoranabuhanga rigezweho n’amahugurwa yazifasha kongera umusaruro no guhatana ku isoko.

Abahatana bagaragaza ko kubona imashini byabafasha kongera umusaruro mu bwiza, guhaza isoko ryo mu Rwanda no gusagurira amahanga. Banerekana kandi uko bazahanga imirimo mishya muri gahunda ya Leta yo guhangana n’ibura ry’imirimo.

Kabera yagize ati: “Nagize amahirwe ndatsinda NIRDA impa imashini 55 zidoda zikoresha ikoranabuhanga rigezweho, ubu mfite imashini zirenga 80.”

Avuga ko izi mashini yahawe zari izo kudoda imipira n’amashati kandi zizamufasha kongera ubwiza n’ubwinshi bw’ibyo akora akajya ashyira ibicuruzwa bye ku isoko mu gihe ubundi yakoreraga abakiliya babimusabye gusa.

Umuyobozi Mukuru w’Agateganyo wa NIRDA Mukeshimana Claire, avuga ko gushyigikira inganda mu kunoza imikorere biri mu nshingano nyamukuru z’icyo kigo

Imashini zaritabajwe mu gukora udupfukamunwa

Kabera avuga ko yakomwe mu nkokora na COVID-19 bigatuma ahagarika gahunda yari afite yo gukora imipira n’amashati akinjira mu rugamba rwo gukumira iki cyorezo binyuze mu gukora udupfukamunwa.

Yagize ati “Izi mashini cyane cyane zadufashije mu gukora udupfukamunwa, dukora 6000 ku munsi twifashishwa mu bwirinzi bwa COVID-19, bituma Abanyarwanda badukeneye batubona biboroheye.”

Yavuze ko izo mashini nizizaba zitagikoreshwa udupfukamunwa, zizifashishwa mu gukora imyenda.

Yakomeje agira ati “Hari umushinga wo gukora imipira isanzwe n’amashati, ubu dufite ubushobozi bwo gukora imipira 6000 n’amashati ibihumbi 3000 ku kwezi.”

Imashini nshya zafashije mu gukora udupfukamunwa dukomeje gufasha mu kwirinda COVID-19

Uruganda rwa “Promota Creations” rufite ubushobozi bwo guha akazi abakozi barenga 100 ruvuye kuri 30 rusanganywe.

Mu zindi nganda zahawe imashini harimo African Sewing Club yashyikirijwe n’izirimo enye zikoreshwa na mudasobwa ahanini mu kunoza amakora, ibifungo n’imifuka y’imyenda.

Umuyobozi wa African Sewing Club, Niyongabo George, yakomeje ati “Nahawe imashini ziri mu byiciro bibiri, hari izikoresha ikoranabuhanga ariko zikoreshwa n’abadozi hakaba n’izindi zifite ikoranabuhanga rihambaye zikoresha mudasobwa zikora ibintu ku buryo bunoze zizadufasha kuzamura ikoranabuhanga dukoresha.”

Imashini zatanzwe hakurikijwe ubusabe bw’abanyenganda

Abayobozi b’inganda zahawe imashini zigezweho ni bo bagize uruhare mu kuzihitamo bijyanye n’ikerekezo cy’ishoramari ryabo.

African Sewing Club yahawe ibikoresho bifite agaciro ka $30,000, akabakaba miliyoni 28 Frw, bigizwemo uruhare na NIRDA n’abafatanyabikorwa bayo barimo UNIDO na KOICA.

Niyongabo ati: “Twagize abafatanyabikorwa beza bativanze mu guhitamo kwacu, ibyo twahisemo ni byo baduhaye, hari abatera inkunga ariko bakanabahitiramo. Twe baduhaye rugari tuvuga ibyo dukeneye tuvuga ibiranga  imashini n’ibyo zikora, turashimira  cyane NIRDA n’abafatanyabikorwa.”

Aha ni mu ruganda George African Sewing Company ruri mi zegukanye imashini muri gahunda ya Open Calls

Uruganda rwa African Sewing Club kimwe n’izindi zikora imyenda, narwo rwashyize imbaraga mu gukora udupfukamunwa, rushobora gukora uturenga  10 000 ku munsi.

Nyuma yo guhabwa imashini nshya, uru ruganda ruteganya kuzajya rukora imipira 500 ivuye ku ijana n’amashati 500 na yo avuye ku ijana ku munsi.

Niyongabo avuga ko “Abadozi benshi bakunze guta umwanya munini ku bijyanye no gutegura ibyo bakora kugira ngo bateranye umwenda, nko gukora amakora y’amashati usanga umuntu yakoreshaga amaboko atera ipasi ariko mu kanya gato unyuza mu mashini ikabisohora iteye bimeze neza.”

“Hari n’ibyo imashini yibwiriza kuko zirikoresha mudasobwa aho ushyiramo komande ugakanda gusa igahita ikora uwo murimo ku buryo bwihuse kandi bunoze, tuzazamura rero ibyo umusaruro mu bwiza no mu bwinshi.”

Abanyarwanda basabwe gukunda ibikorerwa mu gihugu

Abanyenganda bagaragaza ko imashini bahawe zizabafasha kunoza ibyo bakora ariko nanone umusaruro nyawo uzagaragarira mu buryo byakirwa ku isoko n’uko bigurwa.

Kayitesire Aurore, ufite Uruganda rwa WEYA Creations, avuga imashini n’amahugurwa bizamufasha kunoza ibyo akora.

Ati: “Iyo twakiriye imashini nk’izi ntaho ziba zitandukaniye n’azikora ibicuruzwa biturutse mu mahanga, imyenda yacu ikoze neza ku rwego rwiza, ku buryo umuguzi wese wabasha kuza akihera ijisho ntiyabasha gutandukanya umwenda wakorewe hano n’uwakorewe mu Bushinwa atarebye ku birango.”

Abakozi bo muri New Kigali Designers Outfitters Ltd barimo gukora udupfukamunwa dufasha guhangana na COVID-19

Umuyobozi wa New Kigali Designers and Outfitters Ltd, Kanyonya Andrew, unahagarariye abafite inganda zikora imyenda mu Rwanda avuga ko inkunga ya NIRDA yaziye igihe kandi ko izafasha abayihawe kunoza ibyo bakora.

Uruganda rwe rwahawe imashini enye nini zikoresha ikoranabuhanga rihambaye zifashishwa ahanini mu mirimo ya nyuma y’ubudozi ku mipira, imifuka y’amashati n’iy’amapantaro.

Ati: “Izi mashini zadufashije kuko zikoreshwa mu buryo bwo kunoza no kurangiza imyenda ikaba myiza kandi yose ikaba isa.”

Hitezwe umusaruro nyuma ya COVID-19

New Kigali Designers and Outfitters Ltd yizeye kongera umusaruro w’ibyo ikora ku buryo uzava ku gukora amashati hagati ya 100 na 200 akagera ku 1000 n’amapantalo 1000 avuye kuri 200 na ho imipira ikazava kuri 200 kugera kuri 800.

Kanyonya avuga ko nubwo COVID-19 yagize ingaruka mu nganda zikora imyenda, igihe ubucuruzi bwazanzamuka biteze kongera gukora cyane no gutera imbere.

Ati: “Inkunga ya NIRDA nziza kuko bayitanze barebye ku byo twari dukeneye, ni inkunga rero ifite akamaro cyane cyane ko itwongerera umusaruro mu bwiza no mu bwinshi.”

Inganda zikora imyenda zabonye imashini zigezweho

Icyo NIRDA isaba inganda

Umuyobozi Mukuru w’Agateganyo wa NIRDA, Mukeshimana Claire, avuga ko ikigo gifite inshingano zo gufasha inganda nto n’iziciriritse gukura no kugera aho zihangana ku isoko ryo mu Rwanda no mu mahanga.

Ati: “Twahisemo ziriya nganda ngo tugire aho tuzikura n’aho tuzigeza, zibashe gukora ibintu byongerewe ubwiza kandi byinshi kuko ikintu cyiza cyose kigira aho kigera kikabasha guhatana ku isoko ryo mu gihugu n’iryo hanze.”

Uretse inganda zafashijwe mu kiciro cya mbere zahawe imashini zigezweho ku nkunga, izindi nganda zizajya zihabwa ibi bikoresho ku nguzanyo itagira inyungu ntinasabe ingwate ku bufatanye na Banki y’u Rwanda Itsura Amajyambere (BRD).

Mukeshimana yagize ati: “Abahawe imashini barasabwa kuzikoresha neza harimo no guteza imbere abo bakorana cyane cyane urubyiruko no kongera umusaruro w’ibikorerwa mu gihugu banakoresha imashini icyo zagenewe.”

Muri Open Calls, NIRDA yanafashije inganda esheshatu zitunganya umusaruro w’inzoga zikomoka ku bitoki.

Muri iki gihe NIRDA ifasha inganda zitunganya umusaruro ukomoka ku mboga n’imbuto n’izitunganya umusaruro ukomoka ku biti ndetse n’uw’ibikomoka ku nka.

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.