Imikino ngororamubiri mu mashuri yasorejwe i Muhanga

Yanditswe na BUGINGO FIDELE

Ku ya 09-05-2018 saa 05:57:15
Abegukanye imidari bose bari kumwe n'abayobozi batandukanye

Mu karere ka Muhanga ni ho hasorejwe imikino  ngororamubiri  ihuza amashuri ku rwego rw’igihugu.

Iyi mikino yari irimo gusiganwa ku maguru, gusimbuka umurambararo, gutera ingasire, gusimbuka   yitabiriwe n’abakobwa  n’abahungu baturutse mu gihugu hose bahurira muri GS St Joseph, imikino ibera muri Sitade ya Muhanga  tariki 05-06 Gicurasi 2018.

Abegukanye imidari bose bari kumwe n’abayobozi batandukanye

Nyuma y’iyi mikino, Akarere ka Gicumbi ni ko kegukanye imidari myinshi mu bakobwa naho Rubavu yegukana myinshi mu bahungu. Mu rwego rwa za League, Amajyaruguru yegukanye igikombe nk’abitwaye neza mu bakobwa  naho Uburengerazuba buhabwa igikombe nk’ubwitwaye neza mu bahungu. Muri rusange kandi League y’Uburengerazuba ni bo babaye aba mbere mu kwegukana imidari myinshi.

Umwe mu begukanye umudari wa zahabu mu gusiganwa metero ibihumbi 5 na 10,  Nizeyimana Slyver akaba akomoka i Nyamasheke yatangaje ko  irushanwa ritari ryoroshye kuko bari abakinnyi benshi kandi bakomeye. Ati Nakoresheje imbaraga mbasha gutsinda”.

Umutoza w’ikipe y’Akarere ka Nyamasheke, Ndagijimana Donatien we yatangaje ko impamvu abakinnyi babo bitwara neza  bafatanya mu kubategura.  Ati  Dufatanya n’ubuyozi  bw’akarere tukabona ibikenerwa  byose kugira ngo bitegure nange nkabafasha mu myitozo bakumva ibyo mbabwira niyo mpamvu ubona umusaruro wabonetse”.

Perezida w’shyirahamwe ry’imikino mu mashuri, Padiri Gatete Innocent  yatangangaje ko imikino yagenze neza anashimangira ko ari umwanya mwiza yo gutegura aba bakinnyi ku mikino ihuza  amashuri mu bihugu by’Afurika y’Iburasirazuba “FEASSSA 2018” izabera mu Rwanda muri Kanama 2018.

Yagize ati Abana baragerageza ariko ntibari ku rwego twifuza kuko bazahangana n’abandi muri aka karere”. Aha  avuga ko bagomba gukomeza kubategura atari mu mikino ngororamubiri ahubwo mu mikino yose muri rusange.

 

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.