19°C , Partly cloudy | Kigali-Rwanda

Ikendera ry’isano y’umuntu n’urusobe rw’ibinyabuzima mu Rwanda

Yanditswe na NTAWITONDA JEAN CLAUDE

Ku ya 22-05-2020 saa 18:37:52

Mu myaka ya 1900, ababyeyi baciraga abana imigani, bakabawira n’ibitekerezo bikubiyemo ubwoko bw’ibiti, ibyatsi, inyamaswa n’amashyamba akenshi bashoboraga kubereka kuko biboneka bugufi, bigatuma barushaho gufata inyigisho zikubiye mu byo ababyeyi bifuza kubigisha.

Umwana yabyirukaga azi amoko y’ibiti bitandukanye birimo Intomvu, Umunzenze, Intobo, umuko, imivumu n’ibindi. Igihe yabaga yaciriwe umugani w’impyisi, inkima, inyamanza, bakame, ikirura n’ibindi, yashoboraga kubyerekwa nyuma y’igihe runaka agasanisha imiterere yabyo n’igitekerezo yabwiwe.

Ntibikiri igitangaza ko muri iki gihe, hari na bamwe mu babyeyi batibuka ibyinshi byari bigize urusobe rw’ibinyabuzima rwabaga mu Rwanda rwo ha mbere uhereye, ku biti ukageza ku nyamaswa kuri ubu byazimye.

Urugero rwa hafi, iyo Leta y’u Rwanda itagarura Intare n’Inkura muri Pariki y’Akagera ababyiruka bari kuzarinda  basaza bazibona kuri internet gusa. Kuri ubu ababyeyi babo bashobora kubatembereza bakazibonera amaso ku maso kimwe n’izindi nyamaswa.

Ni kenshi abantu bakunze guhura n’ingorane zituruka ku mubano mubi uri hagati yabo n’urundi rusobe rw’ibinyabuzima, bikitwa ibiza ariko hadafashwe umwanya wo gusesengura umuzi w’ikibazo.

Abahanga mu bya Siyansi bemeza ko kwangirika no gukendera k’urusobe rw’ibinyabuzima bigira ingaruka zikomeye ku mibereho ya muntu, uhereye ku guhungabanya umutekano mu biribwa, kwibasirwa n’ibiza bitandukanye, kubura ingufu zitangwa n’umutungo kamere, ukageza no ku kubura amazi meza.

Ingaruka zikomereza ku kwambura umuntu uburenganzira bwe bwo guhitamo ibijyanye n’imibereho ye kuko imihindagurikire y’ikirere n’imiterere y’ibimukikije ari byo bigena uko bucya bimeze.

Kutabungabunga urusobe rw’ibinyabuzima ni ukwisenyeraho inzu

Nubwo abantu, inyamaswa, amashyamba n’indi mitungo kamere, byose bikenerana kugira ngo bibeho, umuntu ni we ugomba kuyobora urwo rugendo kubera ko afite ubwenge bwo gutekereza no gukora igenamigambi.

Kuri uyu wa Gatanu tariki 22 Gicurasi 2020, ubwo hizihizwaga Umunsi Mpuzamahanga wahariwe kuzirikana urusobe rw’ibinyabuzima, Ishami ry’umuryango w’Abibumbye ryita ku burezi, ubumenyi n’umuco (UNESCO) ryongeye kwibutsa abatuye Isi gusigasira isano ya muntu n’urusobe rw’ibinyabuzima n’ibidukikije.

Insanganyamatsiko y’uyu mwaka iragira iti: “Ibisubizo byacu biri mu Isi y’Umwimerere.”

By’umwihariko, mu Rwanda uyu munsi wizihijwe hazirikanwa ingaruka z’imihindagurikire ikirere  yangije ibidukikije byinshi igatwara n’ubuzima bw’abantu.

Minisiteri y’Ibidukikije itangaza ko guhera mu ntangiro z’umwaka wa 2020, abantu bamaze kwicwa n’ibiza babarirwa mu 140, mu gihe imiryango irenga 3000 yasenyewe ndetse n’imyaka n’ibikorwa remezo bikangirika.

Mvunabandi Dominique, Umuyobozi w’Ishami ry’Ubumenyi, ikoranabuhanga no guhanga udushya muri Komisiyo y’Igihugu ikorana na UNESCO mu Rwanda (CNRU), yatangarije Imvaho Nshya ko UNESCO kuva yajyaho ifite inshingano guteza imbere ubumenyi no kububungabunga, bityo ikomeje gufasha mu bukangurambaga bwo kumenyekanisha ubumenyi ku rusobe rw’ibinyabuzima n’ingaruka zituruka ku kubikoresha nabi.

Ati: “Muri ubwo bumenyi harimo n’ubujyanye no kubungabunga urusobe rw’ibinyabuzima; muri rusange burimo guteza imbere aho urwo rusobe ruherereye no gushyigikira abagira uruhare kugira ngo rubungungabungwe mu buryo burambye.”

Ashimangira ko ku rundi ruhande iyo urwo rusobe rubungabunzwe neza, rutanga umusaruro utunga umuntu, rukamwinjiriza amadovize, rukamuhangira imirimo n’ibindi byinshi.

Urubyiruko ruratozwa kuba b’Ambasaderi b’ibigukikije

Mvunabandi yakomeje avuga ko muri uyu mwaka, urubyiruko rwahawe ijambo kugira ngo rugaragaze ibyo rushoboye gukora no kurutegurira gukomeza kuba abavugizi bo kurinda urusobe rw’ibinyabuzima kugeza mu zabukuru.

Abanyeshuri ba Kaminuza biyemeje gutanga umusanzu wo kurinda urusobe rw’ibinyabuzima

CNRU yakoranye n’abanyeshuri biga muri Kaminuza, ibashyigikira mu gushinga ihuriro, none ubu bakomeje gufasha mu bukangurambaga bugamije kwimakaza umubabno mwiza hagati y’umuntu n’urusobe rw’ibinyabuzima.

Ati: “Buri mwaka hari ibintudukora bireba ku biza, umutungo kamere w’amazi, uburyo bukomatanyije bwo kurinda umutungo kamere, imihindagurikire y’ikirere, n’ibindi bintu byinshi. Twagize ngo uyu mwaka duhe urubyiruko umwanya rugaragaze icyo rushoboye mu kumenyekanisha urusobe rw’ibinyabuzima u Rwanda rufite, uburyo rubungabunzwe, ibibazo birimo, n’icyo na bo ubwabo bashobora gutanga nk’umusanzu mu kurubungabunga.”

Iradukunda Prosper, Umuyobozi w’ihuriro ry’urwo rubyiruko rwiyemeje kurengera urusobe rw’ibinyabuzima (Rwanda MAB Youth Network), yavuze ko biyemeje kuba umusemburo wo gufasha rubanda kuzamura umubano mwiza n’ibibakikije.

Ati: “Twatangiye dushyira ku murongo iryo tsinda, hanyuma dukurikijeho gufasha urundi rubyiruko n’Abanyarwanda muri rusange guhindura imyumvire ku bijyanye no gufata neza urusobe rw’ibinyabuzima.”

Rwanda MAB Youth Network kuri ubu igizwe n’urubyiruko rwo muri kaminuza y’u Rwanda ishami rya Huye, n’urwo muri Kaminuza yigisha ibijyanye n’Imiyoborere (ALU Rwanda), hakaba hakomeje ubukangurambaga bwongera abanyamuryango bafite umuhate wo gukwiza ubumenyi ku rusobe rw’ibinyabuzima no kururinda.

Umuyobozi wa UNESCO ku Isi Audrey Azoulay, yatangaje ko urusobe rw’ibinyabuzima rugize ubuzima muntu mu rwego rw’imibereho myiza,  ubuzima buzira umuze n’ubukungu.

Ashimangira ko muri ibi bihe Isi yose ihanganye n’icyorezo cya COVID-19 buri wese akwiye kongera kuzirikana ku isano ye n’urusobe rw’ibinyabuzima,  cyane ko ubwo abantu batemererwaga gusohoka muri ibi bihe, ibindi biremwa byasigaye byidegembya, Isi yongera kubona agahenge, bivuze ko ibikorwa bya muntu bikwiye gukoranwa ubushishozi ngo bitarimbura isoko y’ubuzima bw’umubumbe.

Pariki ya Gishwati-Mukura, Icyanya gikomye kiyongera kuri Pariki y’Ibirunga, bicumbikiye urusobe rutandukanye rw’ibinyabuzima

Umwanditsi:

NTAWITONDA JEAN CLAUDE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.