19°C , Mostly cloudy with showers | Kigali-Rwanda

Ibyemezo by’Inama y’Abaminisitiri yateranye ku wa 10 Nzeri 2020

Yanditswe na Imvaho Nshya

Ku ya 10-09-2020 saa 22:41:48

Ku wa Kane, tariki ya 10 Nzeri 2020, Inama y’Abaminisitiri yateraniye muri Village Urugwiro, iyobowe na Nyakubahwa Perezida wa Repubulika y’u Rwanda, Paul KAGAME.

1. Inama y’Abaminisitiri yemeje imyanzuro y’Inama y’Abaminisitiri yateranye ku wa 26/08/ 2020.

2. Inama y’Abaminisitiri yongeye gusuzuma ingamba zafashwe zo gukumira ikwirakwira ry’icyorezo cya COVID-19, yemeza ko ingamba zisanzweho zemejwe n’Inama y’Abaminisitiri yateranye ku wa 26/08/2020 zizakomeza gukurikizwa, ariko hakiyongeraho ingamba nshya n’izahinduwe ku buryo bukurikira, na zo zigomba guhita zishyirwa mu bikorwa. 

a. Ingendo zirabujijwe guhera saa tatu z’ijoro (9:00 pm) kugeza saa kumi n’imwe za mugitondo (5:00 am).

b. Ingendo zo kujya no kuva mu Karere ka Rusizi mu modoka bwite (private transport) ziremewe, ariko hubahirizwa amabwiriza y’Inzego z’Ubuzima.

c. Amakoraniro atandukanye yabiherewe uburenganzira, harimo inama n’ubukwe, bizakomeza hubahirizwa amabwiriza y’Inzego z’Ubuzima harimo kwipimisha COVID-19 (abayitabiriye bakishyura ikiguzi k’iyo serivisi). Umubare wabo ntugomba kurenga 30% by’ubushobozi bwo kwakira abantu bw’aho bateranira. Uruhushya ruzajya rutangwa n’Inzego z’Ibanze ndetse n’Urwego rushinzwe Iterambere mu Rwanda (RDB) habanje gusuzumwa ko amabwiriza y’inzego z’ubuzima yubahirijwe.

d. Abantu bose bitabira ibikorwa by’ubukerarugendo muri Pariki z’Igihugu bagomba kwipimisha COVID-19 kandi bakiyishyurira ikiguzi k’iyo serivisi.

Izi ngamba zizongera kuvugururwa nyuma y’iminsi 15 hashingiwe ku isesengura ry’inzego z’ubuzima.

Abaturage barongera kwibutswa ko ari ngombwa kubahiriza amabwiriza yo kwirinda COVID-19 harimo: gusiga intera hagati y’umuntu n’undi, kwambara agapfukamunwa no gukaraba intoki. Abatazabyubahiriza bazafatirwa ibihano. 

3. Inama y’Abaminisitiri yemeje umushinga w’itegeko rigenga Urwego rw’Ubwiteganyirize mu Rwanda (RSSB).

4. Inama y’Abaminisitiri yemeje poritiki yo kwegurira abikorera bimwe mu bigo, imitungo n’imigabane bya Leta (ptivatization policy).

5. Inama y’Abaminisitiri yagejejweho ibi bikurikira:

  • Uko isuzuma ku ishyirwa mu bikorwa ry’Imihigo y’Umwaka wa 2019/2020 ryakozwe n’itergurwa ry’Imihigo y’umwaka wa 2020/2021;
  • Imyiteguro y’Igihembwe k’Ihinga 2021 A;
  • Kwakira amarushanwa mpuzamahanga mu Rwanda no kwitabira azabera mu bindi bihugu.

6. Inama y’Abaminisitiri yashyize mu myanya Abayobozi bakurikira:

Agaciro Development Fund 

NYATANYI Gilbert: Chief Executive Officer

Urwego rw’Ubwiteganyirize mu Rwanda (RSSB)

Abagize Inama y’Ubutegetsi

  • Prof WHALES Christopher: Perezida;
  • MUKESHIMANA Marcel: Visi Perezida
  • Prof FISSEHA Senait: Ugize Inama y’Ubutegetsi;
  • MARARA SHYAKA Patrick: Ugize Inama y’Ubutegetsi;
  • USENGE Kephers: Ugize Inama y’Ubutegetsi;
  • BWAKIRA Liliane; Ugize Inama y’Ubutegetsi
  • Dr. AYINGENEYE Violette: Ugize Inama y’Ubutegetsi
  • GATSIMBANYI Yves: Ugize Inama y’Ubutegetsi
  • NDAYISHIMIYE Alain: Ugize Inama y’Ubutegetsi.

Umwanditsi:

Imvaho Nshya

7 Comments on “Ibyemezo by’Inama y’Abaminisitiri yateranye ku wa 10 Nzeri 2020”

  1. Turifuzako harebwa ukuntu sports zakomorerwa zikubahiriza amabwiriza yokwirinda covid19 abanyarwanda tukava mubwigunge tukareba sports murakoze

  2. Turashimira abayobozi bacu kubw’ibyemezo bafatiye muri iyo nama erega kwirinda biruta kwivuza ariko abayobozi bacu ndabibutsa ko mu Rwanda hari abantu birengagizwa buri gihe mu Nama y’Abaminisitiri ABANYONZI tumerewe nabi ntumwa za RUBANDA nkuko mudahwema kudutekerezaho ABANYONZI kwirinda kovidi19 mudufunguriye twakwirinda bihagije murakoze

    1. Abakozi bakorera ibigo bikora ibijyanye n’imikino y’amahirwe murabateganyiriza iki?Bamerewe nabi,ikindi Abanyonzi nabo bararenganye pe!

  3. Guha uburenganzira public transport gukora zijya cyangwa ziva mu turere ariko amabwiriza ya 50 kwijana akubahirizwa ndetse nandi amabwiriza yo kwirinda covid-19 agakomeza kubahirizwa. Urakoze.

  4. Gahunda ya privatization ni nziza cyane,gusa bigashyirwaho ubugenzuzi bwinbitse kuko hari aho za company’s usanga zarengereye uburenganzira bwabaturage ndetse zangije ibidukikije

Tanga Igitekerezo

Email yanyu ntigaragazwa ku rubuga. Amazina na Email ni ngombwa.