23°C , Partly sunny | Kigali-Rwanda

Ibyamamare bitandukanye byashenguwe n’urupfu rwa Kenny Rogers

Yanditswe na Ndamyirokoye François

Ku ya 22-03-2020 saa 17:13:21
Nyakwigendera Kenny Rogers

Umuhanzikazi Dolly Parton  na Lionel Richie ni bamwe mu byamamare bunamiye nyakwigendera Kenny Rogers uherutse kwitaba Imana.

Aba bahanzi bagiye bakorana indirimbo na we kandi baririmbanye mu bitaramo bikomeye binyuranye.

Isi yabuze umuhanga mu njyana ya Country. Umuryango we watangaje ko yashizemo umwuka mu ijoro ryo ku wa Gatanu ku ya 20-21 Werurwe 2020 akaba yari afite imyaka 81 y’amavuko .

Kenny Rogers yamaze imyaka 60 akora muzika aba umwe mu bahanzi bakora injyana ya Country na Pop bageze ku bintu bifatika muri muzika. Yakoranye indirimbo n’abahanzi yarutaga mu myaka n’abari mu kigero cye.

Mu 1983 yakoranye indirimbo ‘Islands in the stream’ na Dolly Parton. Bombi yatumye  bakundwa cyane ndetse imaze kurebwa n’abarenga miliyoni 25 mu gihe imaze ku rubuga rwa Youtube.

Aba bahanzi bombi kandi bubatse ubushuti mu buryo bukomeye, ku buryo Dolly Parton yanditse kuri Twitter, avuga ko mu gihe yari ahugiye kumva amakuru y’icyorezo cya Coronavirus yanakiriye inkuru mbi ivuga ko inshuti ye y’igihe kinini yitabye Imana.

Uyu mugore yavuze ko kuva ku munsi wa mbere amenyana na Kenny Rogers bagiranye  ibihe byiza amukunda yivuye inyuma birenze ibyo bageranyeho mu rugendo rw’umuziki.

Yanditse agira ati “Ntushobora kumenya uburyo ukundamo umuntu utaramutakaza. Nagiranye ibihe by’igitangaza n’inshuti yanjye Kenny Rogers. Uretse kugera kuri byinshi mu muziki, naramukundaga nk’inshuti nyayo”.

Yavuze ko yifatanyije n’umuryango wa Kenny Rogers kandi azawubaha hafi muri ibi bihe by’akababaro n’ibihe bizaza.

Na Lionel Richie yagiye ahurira ku rubyiniro n’uyu muhanzi bakaririmbira abantu bakishima cyane.

Nyakwigendera Kenny Roggers na Lionel Richie  bafitanye indirimbo  yitwa ‘Lady’ imaze imyaka irindwi aho imaze kurebwa n’abarenga miliyoni 16 ku rubuga rwa Youtube. Ni indirimbo baririmbye mu birori n’ibitaramo bikomeye buri wese atunguye undi cyangwa se babiteguye.

Banafitanye indirimbo yitwa  “She believes in me” n’izindi. Lionel Richie we  yanditse avuga ko yabuze inshuti magara kandi ko yasigaranye byinshi byo ku mwibukiraho.

Yasohoye amafoto arindwi amugaragaza yishimanye na Kenny Rogers ku rubyiniro n’ahandi. Maze agira ati “Uyu munsi nabuze inshuti yanjye. Nsigaranye byinshi byo kumwibukiraho. Hari ibitwenge twagiraga turi kuganira. Umutima wanjye urashengutse. Amasengesho yanjye yose ari ku muryango we.”

Kenny Rogers yegukanye ibihembo bitatu bya Grammy. Indirimbo ze zakunzwe cyane mu myaka ya 1970 na 1980 akundwa mu ndirimbo nka ‘The Gambler’, ‘Coward of The Country’. ‘Lucille’, ‘Evening Star’ n’izindi.

Uwavuga ko yari icyamamare ku rwego rw’Isi ntabwo yaba yibeshye na gato. Nyakwigendera Kenny Rogers yari Umunyamerika.

Umwanditsi:

Ndamyirokoye François

Tanga Igitekerezo

Email yanyu ntigaragazwa ku rubuga. Amazina na Email ni ngombwa.