Kigali-Rwanda

Partly cloudy
17°C
 

Huye:  U Rwanda rwegukanye umudari mu mikino ngororamubiri

Yanditswe na BUGINGO FIDELE

Ku ya Apr 3, 2019

Ku munsi wa mbere w’imikino    y’urubyiruko  mu karere ka 5 “ANOCA Zone  5  Youth Games 2019” irimo kubera i Huye, tariki 03 Mata 2019,  u Rwanda rwegukanye umudari w’umuringa mu mikino ngororamubiri  .

Uyu mudari wegukanwe na Niyonkuru Marthe nyuma yo kuza ku mwanya wa 3 mu gusiganwa metero 400 aho yakoresheje umunota 1 n’amasegonda 2. Yaje inyuma ya  Akid Beatrice wo muri Uganda waje ku mwanya wa mbere akoresheje 56 naho Kosekei Jepkoech ukomoka muri Kenya aba uwa kabiri akoresheje amasegonda 58.

Niyonkuru Marthe ubwo yari amaze kwegukana umwanya wa 3 mu gusiganwa metero 400

Mu gusiganwa metero 100 mu bangavu, Anyanga Beatrice (Kenya) yegukanye umwanya wa mbere akoresheje amasegonmda 12 n’ibice  36  akurikirwa na Abdelhalem Mannatalla (Misiri)  wakoresheje amasegonda 12 n’ibice 75  naho ku mwanya wa 3 haza Adokorach Brenda (Uganda) wakoresheje amasegonda 12 n’ibice 92. Niyonkuru Marthe (Rwanda) yasoje ku mwanya wa 5.

Muri metero 800 habaye amajonjora aho mu bakinnyi 6 bagomba guhatanira umudari harimo umukinnyi w’u Rwanda umwe, Nzambazamariya Nadine.

Mu ngimbi, mu gusiganwa metero 100, Tinega Brian (Kenya) yegukanye umwanya wa mbere   akoresheje amasegonda 10 n’ibice 78 akurirwa na Abdelrhim Abdelrahamas (Misiri) na Lomotho Radjab (Uganda). Karangwa Kwame (Rwanda) yasoreje ku mwanya wa 5.

Muri metero 400, Okabo Santos (Uganda) yabaye uwa mbere akoresheje amasegonda 48 n’ibice 21 akurikirwa na Olesange Stash (Kenya) na Joseph Akoomakoom  (Sudani y’Epfo). Ishimwe David (Rwanda) yasoreje ku mwanya wa 6.

Mu gusiganwa metero 800, Tesew Yada Mulu (Ethiopia) yegukanye umwanya wa mbere akoresheje umunota 1 n’amasegonda 54. Yakurikiwe na Pesi Leshan Francis (Kenya) na Vyizigiro Athanase (Burundi). Umukinnyi w’u Rwanda, Habinshuti Alexis yasoreje ku mwanya wa 7 (2’08”).

Muri metero 1500 habaye amajonjora  aho mu bakinnyi 6 nta mukinnyi w’u Rwanda urimo kuko Bakunzi Aime yaje ku mwanya wa 4 mu kiciro cya mbere.

Kuri uyu wa kane tariki 04 Mata 2019 harakinwa ibyiciro birimo metero 800 mu bangavu, metero 1500 mu ngimbi n’abangavu, metero ibihumbi 3 mu ngimbi n’abangavu na metero ibihumbi 5 mu ngimbi.

Mu yindi mikino

Muri Basketball ya 3, ikipe y’u Rwanda mu bangavu yitwaye neza itsinda imikino 2, batsinze u Burundi 21-5, batsinda Sudani y’Epfo 17-8 batsindwa n’ikipe y’impunzi 21-3. Kuri uyu wa Kane tariki 04 Mata 2019, iyi kipe irakina na Uganda na Misiri.

Mu ngimbi, ikipe y’u Rwanda yatsinze Misiri 16-15, kuri uwa Kane tariki 04 Mata 2019, ikipe y’u Rwanda irakina na Sudani y’Epfo, Somalia na Kenya.

Muri Beach Volleyball, mu bangavu, ikipe ya mbere igizwe na Musabyimana Penelope na Kayitesi Clementine yegeze muri ½ nyuma yo gutsinda imikino ibiri harimo uwo batsinze Uganda amaseti 2-0 (21-9  na 21-10) ndetse n’uwo batsinze u Burundi amaseti 2-0 (21-8 na 21-9).

Ikipe igizwe na Musabyimana Penelope na Kayitesi Clementine yegeze muri ½

Ikipe ya kabiri mu bangavu igizwe na Ingabire Hycente na Uwiringiyimana Albertine ntabwo yitwaye kuko yatsinzwe imikino ibiri harimo uwa Sudani y’Epfo na Misiri, amati 2-0. Kuri uyu wa Kane tariki 04 Mata 2018 irakina umukino wa nyuma majonjora na Kenya.

Mu ngimbi, ikipe ya mbere igizwe na Ndahayo Dieu Est La na Masabo Bernard  yatsinzwe na Misiri amaseti 2-0, itsinda ikipe y’impunzi amaseti 2-0. Kuri uyu wa Kane tariki 04 Mata 2019 irakina na Uganda.

Ikipe ya kabiri igizwe na Ngabo Rwamuhizi Romeo na Gisubizo Merci   yatsinzwe na Sudani y’Epfo amaseti 2-1 itsindwa nanone na Kenya 2-0. Kuri uyu wa Kane tariki 04 Mata 2019 irakina n’u Burundi na Sudani.

Amagare na Taekwondo baratangira gukina uyu munsi

Kuri uyu wa Kane tariki 04 Mata 2019 nibwo  muri Taekwondo ndetse no mu mukino w’amagare batangira gukina.

Mu magare harakinwa  gusiganwa n’isaha bakareba ibihe byakoreshejwe nk’ikipe “Team Time Trial”. Abasiganwa mu byiciro byombi  barasiganwa intera ya kilometero 16.2 aho bakoresha umuhanda wa Huye-Nyamagabe.

Ku ruhande rw’u Rwanda mu ngimbi harakina abakinnyi 4 ari bo  Uhiriwe Byiza Renus, Habimana Jean Eric, Muhoza Eric  na Nsabimana Jean Baptiste naho mu bangavu ni  Ingabire Diane, Irakoze Neza Violette, Nzayisenga Valentine  na Ishimwe Diane.