20°C , Partly cloudy | Kigali-Rwanda

Hitimana na Nyirarukundo ni bo begukanye irushanwa rya “20 km de Bugesera”

Yanditswe na NKOMEJE GUILLAUME

Ku ya 19-06-2018 saa 08:55:32
Hitimana Noel wabaye uwa mbere mu gusiganwa ibilometero 20 yahawe ibihembo birimo n'itike y'indege yo kujya gutembera i Dubai

Hitimana Noel mu bahungu na Nyirarukundo Salome mu bakobwa, bombi bakinira ikipe y’APR AC begukanye  irushanwa ryo gusiganwa ibilometero 20 rizwi nka “20 Km de Bugesera”, ryabereye mu Karere ka Bugesera, Intara y’Iburasirazuba tariki 17 Kamena 2018.

Hitimana Noel wabaye uwa mbere mu gusiganwa ibilometero 20 yahawe ibihembo birimo n’itike y’indege yo kujya gutembera i Dubai

Iri siganwa ryabaga ku nshuro ya 3, ryateguwe n’umuryango “Gasore Serge Foundation” ufatanyije n’Akarere ka Bugesera, rigamije gukangurira urubyiruko kurwanya ibiyobyabwenge, ruswa no kwirinda inda zitateguwe, ryitabiriwe n’abarenga ibihumbi bibiri, ibyiciro bitandukanye mu bahungu n’abakobwa birimo gusiganwa ibilometero 20, ibilometero 8 n’ibilometero 3 ku bana bato ndetse basiganwe no ku magare.

Hitimana usanzwe aserukira igihugu mu mikino ngororamubiri yo kwiruka ku maguru yegukanye iri siganwa nyuma y’uko yaje ku mwanya wa mbere akoresheje iminota 58’ n’amasegonda 25 (58’25’).

Yakurikiwe na Sugira James ukinira Mountain CAC akoresheje 58’28”, Muhitira Felicien bita “Magare”, aba uwa gatatu (58’46”) na ho Potien Ntawuyirushintege (APR AC) aba uwa kane (59’34”).

Mu kiciro cy’abakobwa, Nyirarukundo Salome yabaye uwa mbere mu gusiganwa ibilometero 20, akoresheje isaha imwe n’iminota 10 n’amasegonda 21 (1h10’21”). Yakurikiwe na mugenzi we bakinana muri APR AC, Yankurije Marthe wakoresheje 1h10’32”, Ishimwe Beathe (NAS) (1h16’32”) na ho Niragire Vivine aza ku mwanya wa kane (1h39’50”).

Mu bihembo byatanzwe mu byiciro byombi, uwa mbere yahawe itike y’indege yo kujya gutembera i Dubai, imyambaro ya siporo ndetse n’ibihumbi 200 by’amafaranga y’u Rwanda ari nacyo gihembo gikuru, uwa 2 ahabwa ibihumbi 200, uwa 3 ahabwa ibihumbi 150, uwa 4 ahabwa ibihumbi 100, uwa 5 bamuha ibihumbi 80 na ho uwa 6 bamuhemba ibihumbi 50.

Mu gusiganwa ibilometero 8, Nizeyimana Sylvain (Nyamasheke) yabaye uwa mbere mu bahungu, akurikirwa na Nkejumuto Ildephonse na Nzayisenga Epimaque (Ntarama AC), Bakunzi Epaphrodite ( Kamonyi), Amani Sylvain na ho ku mwanya wa 6 haje Shumbusho Geofrey (Bugesera).

Mu bakobwa, Ibishatse Ange  wa Mountain Classic AC yaje ku mwanya wa mbere, uwa kabiri aba Niyirora Primitive (NAS), Mutuyimana Epiphanie (Mountain Classic) aba uwa gatatu.

Uwa mbere muri buri kiciro yemerewe kwitoreza muri Kenya anahabwa ibihumbi 100 by’amafaranga y’u Rwanda, uwa kabiri ahabwa ibihumbi 100, uwa 3 ahabwa ibihumbi 70, uwa kane ahabwa ibihumbi 60, uwa 5 ahembwa ibihumbi 50 na ho uwa 6 ahabwa ibihumbi 40.

Mu mukino wo gusiganwa ku magare mu gusiganwa intera ya kilometero 40 (40Km), mu bahungu, ryatwawe na Kayumba Jerome (Nyabihu) yakoresheje iminota 55 n’amasegonda 59” (55’59”), akurikirwa na mugenzi we Ndayambaje Djuma 56’19”, Bizimana Theogene (Muhanga), 56’22”, Rushigajiki Innocent (Bugesera), 56’22”, Olivier Hakuzimana (Gisagara), 56’24” naho Twizere Frank (Bugesera) akoresheje 56’46”.

Mu bakobwa, Ntakirutimana Marthe (Bugesera), yabaye  uwa mbere akoresheje 1h05’58”, akurikirwa na Manishimwe Jeannette (Gisagara) wakoresheje 1h09’16”, Nzayihiki Skolastique (Bugesera) akoresheje 1h11’55’’, Mutuyimana Jeannette (Gisagara) yakoresheje 1h15’30”, Iteka Angele (Bugesera) yakoresheje 1h18’33” naho Amariza Divine (Bugesera) aba uwa 6 akoresheje 1h21’52’.

Mu bihembo byatanzwe, uwa mbere muri buri kiciro yahembwe igare n’ibihumbi 40 by’amafaranga y’u Rwanda, uwa kabiri ahabwa igare, uwa 3 ahabwa ibihumbi 40, uwa kane ahabwa ibihumbi 25, uwa 5 ahembwa ibihumbi 20 naho uwa 6 ahabwa ibihumbi 15.

 

 

 

 

 

Umwanditsi:

NKOMEJE GUILLAUME

Tanga Igitekerezo

Email yanyu ntigaragazwa ku rubuga. Amazina na Email ni ngombwa.