25°C , Partly sunny | Kigali-Rwanda

Hinga Weze irafasha abahinzi kubona ibikoresho byo gufata neza umusaruro

Yanditswe na BUGINGO FIDELE

Ku ya 23-09-2020 saa 14:09:03
Abari bahagarariye Koperative i Nyabihu nyuma yo gusinya amasezerano y'inkunga

Muri iki gihe abahinzi bugarijwe n’ikibazo cyo  gutakaza umusaruro ahanini biterwa no kutagira ibikoresho byabugenewe bifasha kubungabunga no gufata neza uyu musaruro ukomoka ku buhinzi.

Umushinga Hinga Weze uterwa  inkunga n’Ikigo cy’Abanyamerika gishinzwe iterambere “USAID” ku bufatanye na Minisiteri y’Ubuhinzi n’Ubworozi “MINAGRI” batangiye uburyo butandukanye burimo  guhugura abahinzi  ku buryo bugezweho bwo gufata neza umusaruro wabo ndetse no kubafasha kubona ibikoresho bigezweho bituma bashobora gufata neza uwo musaruro.

Ibyo bikoresho birimo, imashini zitunganya umusaruro, ibyo kwanikaho umusaruro ngo ugumane ubuziranenge, ibyo gupima ubuhehere bw’ibinyampeke ngo bamenye ko byumye neza, iminzani n’ibindi.

Kuri ubu Umushingwa Hinga Weze  wageneye amakoperative 63 yo mu turere 10 ukoreramo inkunga y’ibyo bikoresho byo gufata neza umusaruro wabo bifite agaciro ka miriyoni 162 z’amafaranga y’u Rwanda.

Tariki 22 Nzeri 2020, ubuyobozi bwa Hinga Weze bwagiranye amasezerano  y’inkunga na Koperative 10 z’abahinzi  bo mu Karere ka Nyabihu.

Umuyobozi wungirije wa Hinga Weze, Mukamana Laurence  atangaza ko  ikibazo cyo gutakaza  umusururo ku bihingwa bimwe usanga ari nka 10% ku bindi ugasanga ni nka 20% hari  n’ibigera kuri 30% .

Ati : “Ibaze mu bihingwa  umuhinzi yasaruye   mu biro 100 agatakaza ibiro 10 cyangwa 20,  ni  igihombo gikomeye, ibyo rero bikunze kugaraga mu musaruro w’imboga , ibishyimbo, ibigori n’ibindi.”

Umuyobozi wungirije wa Hinga Weze, Mukamana Laurence

Yakomeje avuga ko iki ari  cyo kibazo  bashaka gukemura bafatanyije n’aya makopeative atandukanye ndetse n’abandi bafatanyabikorwa.

Ati : “Iyi nkunga  twayigeneye amakoperative by’umwihariko kuko tuzi ko akorana n’abantu benshi ariko hari n’izindi nkunga twatanze zo gufasha mu gutunganya  umusaruro kuri ba  rwiyemezamirimo ku  giti cyabo bakorana n’abahinzi.”

Bitewe n’igice rukana, amakoperative yagiye asaba ibikoresho bijyanye n’ibyo bakenera cyane bitewe n’ibyo bahinga.  Muri Nyabihu  kubera guhinga ibirayi basabye iminzani igezweho.

Umuyobozi wungirije wa Hinga Weze,  Mukamana Laurence  ati : “Muri aka gace, amakoperarive yasabye iminzani yujuje ubuziranenge, uterekaho ukabona ibiro. Ahandi nk’Iburasirazaba twatanze imashini zo gutunganya umusaruro w’ibinyampeke n’ibindi.”

Ibikoresho bizagenerwa Koperative 10 mu Karere ka Nyabihu  bizatwara amafaranga anga na miriyoni 32 ku ruhande rwa Hinga Weze ariko na Koperative zikaba zizatanga uruhare rwazo.

Habimana  Olivier ushinzwe ishami ry’amasoko no gufata neza umusaruro muri Hinga Weze  yavuze ko kugabanya umusaruro wangirika ku bahinzi bituma amafaranga babona yiyongera.

Habimana  Olivier, umukozi muri Hinga Weze ushinzwe ishami ry’amasoko no gufata neza umusaruro

Agaruka ku bahinzi bo muri Nyabihu atangaza ko  mbere babanje kububakira ubuhunikiro gusa umusaruro wabo ugatakarira mu  kuko hari uwabwiraga umuhinzi  ati sarura tuje kugura ugasanga asaruye nk’ibiro 600 by’ibirayi   kandi umuguzi yashakaga 500 bya bindi  100 ugasanga birangiritse.

Yagize ati : “ Iyi minzani rero izabafasha kuko bazajya bahinga ibyo bazi, banasarure ibyo bazi bagiye kugurisha. Mu guhunika twabahaye za Palete  (Pallets) aho bazajya batereka imifuka kuko iyo iteretse hasi ubuhehere bushobora kwinjira mu myaka ikangirika.”

Abahinzi babyakiriye neza

Nyuma yo gusinya amasezerano y’inkunga, abakuriye izi Koperative  bishimiye iyi nkunga bagiye guhabwa na Hinga Weze bagaragaza ko bizabasha kubungabunga umusaruro wabo.

Perezida wa Koperative y’abahinzi b’ibirayi   ya CAPR-IBIGWI ikorera mu Murenge wa Jenda,  Bagaragaza Augustin yashimangiye ko iminzani bari bafite itujuje ubuziranenge aho wasangaga akenshi umuhinzi ahahombera.

Perezida wa Koperative CAPR-IBIGWI,  Bagaragaza Augustin

Yagize ati : “ Turishimye kuko iki kibazo kigiye gukemuka, ku bufatanye  na  Hinga Weze, tugiye kubona  iminzani yujuje ubuziranenge aho umuhinzi n’ umuguzi w’ibirayi bazajya  bareba ubwabo ibiro bipimye.”

Akomeza avuga ko icyo bifuza ari uko n’aho bagemura ibirayi  muri Kigali n’ahandi  bazashaka iminzani nk’iyi yujuje ubuziranenge kugira ngo hatazaba kwibeshya.

Mukeshimana Claudine, Visi Perezida wa Koperative y’Abahinzi b’Amatunda ba Kareba na Rega “KOPAAKARE” yavuze ko ibikoresho byo gufata neza umusaruro bagiye guhabwa bizabafasha cyane. Ati : “Ubusanzwe twasaruriraga mu mifuka  tukabigeza ku isoko byangiritse tukagira igihombo ariko ubu ubwo tugiye kubona ibikoresho bigezweho  tuzajya tubisaruriramo  bigere ku isoko bimeze neza.”

Visi Perezida wa Koperative “KOPAAKARE”, Mukeshimana Claudine

Uko uturere  10 Hinga Weze ikoreramo tuzabona ibikoresho

Mu Karere ka Kayonza hazatangwa ibikoresho kuri Koperative 10, Nyabihu (10), Bugesera (3), Gatsibo (3), Karongi (6), Ngoma (9), Ngororero (6), Nyamagabe (4), Nyamasheke (2) na Rutsiro (3).

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.