Hatangijwe gahunda y’imikino y’abafite ubumuga bwo mu mutwe mu mashuri 400

Yanditswe na BUGINGO FIDELE

Ku ya 27-08-2020 saa 19:04:08
Abayobozi b'ibigo by'amashuri yo mu Mujyi wa Kigali nyuma yo kuganirizwa kuri gahunda y’imikino y’abafite ubumuga bwo mu mutwe mu mashuri

Umuryango “Special Olympics Rwanda” wita ku bana bafite ubumuga bwo mu mutwe binyuze mu mikino watangije gahunda y’imikino y’abafite ubumuga bwo mu mutwe  mu bigo by’amashuri izaba ihuriwemo n’abadafite ubumuga “Unified Champion Schools”.

Pasiteri Sangwa Deus, umuyobozi wa “Special Olympics Rwanda” atangaza ko ubusanzwe uyu  ari umwe mu miryango mpuzamahanga  utegura imikino ku bafite ubumuga bwo mu mutwe n’ubundi bukomatanyije ndetse  hakazamo n’abatabufite.

Avuga ko iyi gahunda  izamara imyaka 4 ni ukuvuga ko izageza muri 2023 aho  bagiye gukorera  mu mashuri kuko n’ubundi iyi gahunda yaje  basanzwe bafite ibikorwa bya siporo mu mashuri ndetse no bigo byita ku bana bafite ubumuga bwo mu mutwe kuko ubu bakorera mu turere 23 aho ubu bafite abakinnyi  18,100.

Umuyobozi wa Special Olympics Rwanda, Pasiteri Sangwa Deus

Kuwa Gatatu tariki 26 Kanama 2020 ni bwo habaye igikorwa cyo gutangiza iyi gahunda mu nama yahuje ubuyobozi bwa “Special Olympics Rwanda” ndetse n’abayobozi b’ibigo  by’amashuri 40 byo muri Kigali ari naho iyi gahunda izatangirira.

Pasiteri Sangwa avuga ko bategura amarushanwa  bigamije ubukangurambara ku bantu batandukanye bwo kudapfukirana abafite ubumuga bwo mu twe.

Iyi gahunda izatwara miriyoni  zisaga 617

Pasiteri Sangwa Deus, umuyobozi wa “Special Olympics Rwanda” atangaza ko  nyuma y’imikino y’Isi yabereye   Abu Dhabi muri 2019, igikomangoma cya  Abu Dhabi muri Leta Zunze ubumwe z’Abarabu,  Sheikh Mohamed bin Zayed Al Nahyan yemeye inkunga ingana na miriyoni  25 z’amadorari y’Amerika  kugira ngo bafashe mu kuzamura iyi gahunda y’imikino y’abafite ubumuga bwo mu mutwe mu mashuri mu bihugu 6 bitandukanye ku Isi.

Ati : “ Iyi nkunga yanyujijwe muri Special Olympics  ku rwego rw’Isi na bo  babaza muri Afurika igihugu  iyi gahunda yatangirizwamo  bahitamo u Rwanda mu bihugu byose 33.” Ibihugu 6 byatoranyijwe harimo Argentina, Misiri, u Buhinde , Pakistan, Romania n’u Rwanda.

Muri iyi gahunda u Rwanda rwagenewe inkunga y’ibihumbi 650 by’amadorari y’Amerika ni ukuvuga miriyoni zisaga 617 z’amafaranga y’u Rwanda azagenda atangwa mu byiciro.

Hifashishijwe uburyo bw’ikoranabuhanga, Visi Perezida wa Special Olympics   ku rwego rw’Isi ushinzwe gahunda y’iterambere ry’urubyiruko, Soeren Palumbo yatangaje ko yishimiye iki gikorwa cyo gutangiza gahunda y’imikino y’abafite ubumuga bwo mu mutwe mu mashuri. Yashimiye kandi igikomangoma  Sheikh Mohamed bin Zayed ku bw’inkunga  anashimira Leta y’u Rwanda ifasha Special Olympics    kwita ku bafite ubumuga bwo mu mutwe.

Umuyobozi wa  Special Olympics   ku rwego rw’Afurika, Charles Nyambe nawe yishimiye iki gikorwa agaragaza ko kuba u Rwanda rwatoranyijwe muri Afurika ari ikerekena ko bafite ibikorwa byiza kandi ko nibigenda neza bizabera ibindi bihugu urugero.

Umukozi muri Minisiteri ya Siporo  ushinzwe iterambere no gukurikirana impano z’abakiri bato, Habyarimana Florent yatangaje ko politiki  ya siporo  na  gahunda siporo mu mashuri byuzuzanya byose  kuko bireba umukinnyi, umuntu ukora siporo uwo ari we  wese yaba  ufite ubumuga n’utabufiye.

Yagize ati : “ Minisiteri ya siporo ifite uburyo bw’imikoranire na Special Olympics Rwanda  ndetse n’abandi bafatanyabikorwa batandukanye, icyo dukora  nka  Minisiteri ni ukureba niba ba bafatanyabikorwa bashyira mu bikorwa uko bikwiye ya politiki ya siporo irimo no kureba abafite ubumuga.”

Umukozi muri Minisiteri ya Siporo  ushinzwe iterambere no gukurikirana impano z’abakiri bato, Habyarimana Florent

Uko  iyi gahunda izashyirwa mu bikorwa

Muhamyangabo Jean Bosco, ushinzwe ishyirwa mu bikorwa by’iyi gahunda ku rwego rw’igihugu atangaza ko izakorerwa mu bigo by’amashuri  400 aho harimo 40 byo mu mujyi  wa Kigali, ibigo 70 byo mu Ntara y’Iburasirazuba, ibigo 120 byo mu Ntara y’Amajyaruguru n’ Iburengerazuba ndetse n’ibigo 170 byo mu Ntara y’Amajyepfo.

Akomeza avuga ko muri iyi myaka 4 bafite intego ko nibura hazakinwa imikino 2010. Bafite intego kandi ko bazaba bafite abatoza 400 ndetse n’abarimu 400 ni ukuga buri kigo kizaba gifite umutoza n’umwarimu ufite ubumenyi kuri yi gahunda.

Muhamyangabo Jean Bosco, ushinzwe ishyirwa mu bikorwa by’iyi gahunda ku rwego rw’igihugu

Muhamyangabo atangaza ko  bazatangiza  itsinda   ry’abanyeshuri (Club) nibura rigizwe n’abana 5 muri buri kigo rizafasha  mu bukangurambaga n’ubuvugizi.

Mu gutanga ubutumwa hazifashiwe siporo zitandukanye zirimo umupira w’amaguru ukinwa n’abafite ubumuga n’abatabufite, hari kandi imikino ngororamubiri na Bocce.

Agaruka ku nyungu ibi bigo by’amashuri bizakura iyi gahunda, Muhamyangabo Jean Bosco agaragaza ko hari amahugurwa ndetse no gufasha abana kwidagadura.

Yagize ati : “Buri kigo tuzakoreramo tuzagiha ibikoresho birimo  imyambaro y’abakina umupira w’amaguru, imipira ibiri yo gukina, ifirimbi, ibikoresho by’imikino ngororamubiri, udukoresho (Corners) bizifashishwa mu myitozo, isaha yifashishwa gupima igihe n’ibikoresho by’umukino wa Bocce usanzwe ukinwa n’abafite ubumuga bwo mu mutwe.”

Uretse ibi bikoresho, muri buri kigo bagomba kuzasiga bubatsemo ikibuga  cy’umukino wa Bocce.

Muhamyangabo avuga ko muri iyi gahunda bazakorana n’inzego  zitandukanye  zirimo Minisiteri ya Siporo, Minisiteri y’Uburezi “MINEDUC” ndetse n’amashyirahamwe y’imikino itandukanye.

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.