Kigali-Rwanda

Partly cloudy
19°C
 

Hashyizweho itegeko ryemera gusubirishamo imanza zaciwe burundu ku mpamvu z’akarengane

Yanditswe na SEZIBERA ANSELME

Ku ya 06-06-2018 saa 06:32:07
Yankurije Odette, Umuvunyi Wungirije ushinzwe gukumira no kurwanya akarengane (Foto Sezibera A.)

Umuvunyi Wungirije ushinzwe gukumira no kurwanya akarengane, Yankurije Odette, atangaza ko hashyizweho itegeko rishya ririmo impinduka zigamije gufasha umuturage kandi zikamurinda kuba yavutswa uburenganzira n’amahirwe yo kuba yasubirishamo urubanza yatsinzwe ku mpamvu z’akarengane.

Yankurije Odette, Umuvunyi Wungirije ushinzwe gukumira no kurwanya akarengane (Foto Sezibera A.)

Ibyo byagarutsweho mu kiganiro urwego rw’Umuvunyi rwagiranye n’abanyamakuru nyuma y’ibibazo bijyanye n’akarengane rugenda rwakira by’umwihariko agashingiye ku irangizwa ry’imanza zamaze gucibwa burundu.

Yankurije asobanura igihe byemewe kugira ngo umuntu abe yasubirishamo urubanza ku mpamvu z’akarengane biba byemewe. Bitandukanye na mbere ya 2012 mu Rwanda kimwe n’ahandi ku Isi itegeko ryavugaga ko iyo urubanza rwabaga rwaciwe rukagera ku rwego rwa nyuma, itegeko ryafungaga ntihabe hari indi nzira yo kongera kuruburanisha ishoboka, ariko biza kugaragara ko bishoboka ko urubanza rwaba rwaraciwe n’inzira zo kujujira zikarangira ariko hakaba hakirimo akarengane.

Avuga ko tariki 2 Kamena 2018 hasohotse itegeko rishya Nomero 30/2018 ryo ku wa Kabiri Kamena 2018 rigena ububasha bw’inkiko. Avuga ko iryo tegeko ryazanye impinduka z’ingenzi ku bijyanye n’inzira gusaba gusubirishamo urubanza ku mpamvu z’akarengane bikorwamo ndetse n’ibihe bigomba gukorwamo.

Yankurije avuga ko u Rwanda nk’igihugu kiyemeje guca akarengane, yemera ko mu mpamvu zimwe zikomeye zidasanzwe mu gihe bene izo manza n’iyo zaba zaraciwe burundu ariko zikigaragaramo akarengane itegeko rifungura zikongera zikaburanwa.

Agira ati: “Impamvu ni 3, iya mbere ni iyo hari ibimenyetso simusiga bigaragaza ruswa, ikimenyane, cyangwa ikenewabo byagize ingaruka ku mikirize y’urubanza bikaba bitarigeze  bimenywa n’uwatsinzwe mu gihe k’iburana.

Indi mpamvu ya 2 ni iyo mu icibwa ry’urubanza harengagijwe amategeko cyangwa ibindi bimenyetso bigaragarira buri wese, hanyuma iya 3 ni iyo urubanza rudashobora kurangizwa hakurikijwe uburyo ruciwe”.

Yankurije atangaza ko kuva mu mwaka wa 2012, Urwego rw’Umuvunyi rwongerewe inshingano nshya yo gusuzuma no gusesengura imanza zaciwe burundu, abaziburanyemo babona ko zabayemo akarengane gakabije. Iryo tegeko riha urwo rwego  ububasha bwo kuzisesengura, rugasaba Urukiko rw’Ikirenga ko izo manza zakongera kuburanishwa na rwo rukazikorera ubusesenguzi bityo abaturage bari bararenganye bakarenganurwa.

Itangazamakuru ryifuje kumenya icyo itegeko ryari risanzweho ryateganyaga kuri bene izo manza z’akarengane, Yankurije asobanura ko umuntu wabaga afite urubanza yatsinzwe yifuzaga ko rwasubirwamo ku mpamvu z’akarengane yandikiraga Urwego rw’Umuvunyi akarusaba ko urwo rubanza rwasubirwamo.

Akagaragaza ko mu itegeko rishya ririho iyo nzira yahinduwe kuko urubanza rukimara gucibwa umuntu akabona ko yarugiriyemo akarengane ahita yandikira Perezida w’urukiko rw’isumbuye ku rwaciye rwa rubanza.

Agira ati: “Niba urubanza rwaraciwe n’Urukiko rw’ibanze, icyo gihe yandikira Perezida w’urukiko rw’isumbuye arusaba gusubirishamo urubanza kugira ngo akarengane yagiriwe gakosorwe, niba urubanza rwaraciwe n’Urukiko rwa Gisirikare azandikira Perezida w’Urukiko rukuru rwa Gisirikare. Icyo gihe Perezida w’urukiko wandikiwe asuzuma ubusabe akareba koko niba urubanza rurimo akarengane yagasangamo akandikira Perezida w’Urukiko rw’Ikirenga akamusaba ko kakosorwa, hanyuma na we akagena urukiko rwaca urwo rubanza.

Ariko igihe Perezida w’Urukiko rw’Ikirenga asanze nta karengane karimo yandikira uwo muturage wamwandikiye akamumenyesha ko nta karengane karimo ari nabwo umuturage ashobora guhita yiyambaza Urwego rw’Umuvunyi”.

Itangazamakuru ryifuje kumenya igihe bikorwamo, Yankurije asobanura ko mu itegeko ryari risanzweho nta gihe ntarengwa ryagenaga, ariko mu itegeko rishya risaba ko uwatanze gusubirirwamo urubanza ryagennye iminsi 30 kuva urubanza ruciwe, Perezida w’urukiko yamara kubasubiza abagaragariza ko mu rubanza nta karengane karimo bakagira iminsi 30 gusa ngo biyambaze Urwego rw’Umuvunyi kuko nyuma yayo ikibazo kiba kitacyakiriwe.

Gusa usibye kuba umuturage warenganyijwe yakwiyambaza Urukiko rw’Ubujurire, Urwego rw’Umuvunyi ikemezo kizajya gifatwa na Perezida w’Urukiko rw’Ikirenga nta handi aba ashobora kujyana ikirego.

 

 

Umwanditsi:

SEZIBERA ANSELME

One Comment on “Hashyizweho itegeko ryemera gusubirishamo imanza zaciwe burundu ku mpamvu z’akarengane”

  1. Umugore wahamijwe cyaha cyo kwica umugabo we ariko umurambo ntugaragazwe, akarangiza igihano yakatiwe, byaje kugarahara ko uwo mugabo akiriho yibanira n’undi mugire. Nyagukatirwa n’umujinya mwinshi yagiye kureba nyamugabo amukubita icyo abonye hafi aho ararinaga. Uwo mugore azongera akurikiranweho ko yishe umugabo we? ( Ihame rya Non bis in idem ryakubahirizwa gute?)

Leave a Reply to Vincent Ntaganira Cancel reply

Email yanyu ntigaragazwa ku rubuga. Amazina na Email ni ngombwa.