Kigali-Rwanda

Mostly cloudy
22°C
 

Haruna  Niyonzima ashobora kugaruka mu kibuga mu minsi ya vuba

Yanditswe na BUGINGO FIDELE

Ku ya Mar 17, 2018

Niyonzima Haruna usanzwe ari kapiteni w’ikipe y’igihugu « Amavubi » akaba akinira ikipe ya Simba SC yo muri Tanzania  kuva muri Mutarama 2018 nta bwo akina kubera imvune yagize mu ivi ku kaguru k’iburyo.

Haruna Niyonzima ugiye gutangira imyitozo nyuma y’imvune yari amaranye iminsi

Muri Gashyantare 2018 ni bwo Haruna yagiye kuvurirwa mu Buhinde nyuma agaruka muri Tanzania.  N’ubwo byari byavuzwe ko adashobora kugaruka mu kibuga muri uyu mwaka w’imikino wa 2017-2018.

Haruna Niyonzima  aganira n’ikinyamakuru cyandikirwa muri Tanzania « Mwanaspoti » dukesha aya makuru yatangaje ko  agiye kugaruka mu kibuga kuko  ubu yatangiye imyitozo ku giti ke.

Haruna yemeze ko azatangirana imyitozo na bagenzi be  mu cyumweru gitaha  ubwo bazaba bavuye mu Misiri aho  ikipe ya Simba SC  iri kuko  uyu munsi tariki 18 Werurwe 2018 igomba  gukina umukino wo kwishyura n’ikipe ya Al Masry mu mikino y’Afurika y’amakipe yitwaye neza iwayo «Total CAF Confederation Cup 2018 ».

Niyonzima wageze muri Simba SC avuye muri mukeba wayo Yanga  mu ntangiriro z’umwaka w’imikino wa 2017-2017  yabwiye abakunzi b’iyi kipe ya Simba SC  ko  agiye kugaruka kandi yizeye ko bizagenda neza.

Agaruka ku kujya kwivuriza mu Buhinde, Niyonzima yatangaje ko byagenze neza mu minsi 10 yamazeyo  gusa ashima Imana cyane kuko atabazwe kuko byari gutuma amara igihe kirekire.

Haruna akaba ashobora gukina imikino isoza shampiyona muri Simba SC iyoboye urutonde dore ko nyuma y’imikino y’umunsi wa 22 ifite amanota 46 inganya na Yanga  gusa Simba SC ifite imikino 2 y’ibirarane naho Yanga ifite umukino 1.