17°C , Thunderstorms | Kigali-Rwanda

Hari abifuza kuva mu kiciro cya mbere cy’Ubudehe kubera gusuzugurwa

Yanditswe na Mugisha Benigne

Ku ya 22-09-2019 saa 10:15:21
Abari mu kiciro cya mbere cy'ubudehe bafite inzozi zo kwiteza imbere bakazamuka bakajya mu bindi byiciro

Bamwe mu baturage bo mu Murenge wa Gikomero, Akarere ka Gasabo, batangaza ko bifuza kuvanwa mu kiciro cya mbere cy’ubudehe bitewe n’uko babona gisuzuguritse ndetse ngo hakaba na serivisi zimwe badahabwa kuko ari cyo barimo.

Ibi ni bimwe mu byo babwiye Itangazamakuru ubwo baganiraga na ryo, aho bamwe bavuga ko bimwe akazi kuko ngo bahombeje batabona uko bishyuzwa, abandi ngo bimwe inguzanyo muri za Sacco ku bw’iyo mpamvu y’ikiciro cya mbere, hari n’abandi bagenda basuzugurwa na bagenzi babo kuko bari mu kiciro cya mbere, kongeraho n’abamaze kwiteza imbere bifuza kukivanwamo bakajya mu cya kabiri.

Ndabikunze Jackson ni umwe mu baturage b’Umurenge wa Gikomero, avuga ko yahoze mu kiciro cya kabiri akirihirira mituweri ariko ngo nyuma yaje kwisanga mu kiciro cya mbere, none ngo yabuze akazi kubera ko ari muri iki kiciro.

Avuga ko yagiye gusaba imirimo kwa rwiyemezamirimo ukora amandazi n’imigati akanabicuruza, ngo yashakaga akazi ko guponda ifarini ikorwamo amandazi, agezeyo ngo yabajijwe ikiciro abarizwamo, avuze ko ari mu cya mbere bahita bakamwima ngo ahombeje ntibabona uko bamwishyuza kuko ari mu kiciro cya mbere cy’Ubudehe, akaba afashwa na Leta.

Yagize ati “Nimwe akazi nzira kuba mu kiciro cya mbere, bambwiye ko ndamutse mpombye batabona uko banyishyuza kuko nishyurirwa byose na Leta, ngo ningende nta bwo baha akazi umuntu wo mu kiciro cya mbere.”

Avuga ko yemerewe kubitsa muri banki, kuko abitsa muri Sacco ariko yajya gusaba inguzanyo bakayimwa, ni mu gihe abitsa akanabikutsa ariko akimwa inguzanyo.

Bakimbagira Joseph na we ni umuturage w’uyu murenge akaba afite ubumuga, avuga ko agituye mu Murenge wa Kimihurura baje guhabwa amahugurwa yo gukora amasabune y’amazi n’andi asanzwe, bamaze guhugurwa ngo Bakimbagira yaje kujya muri Koperative Umurenge Sacco ya Kimihurura gusaba inguzanyo kugira ngo abashe gushyira mu bikorwa umushinga we wo gukora amasabuni nyuma yo guhabwa ubumenyi.

Avuga ko bamwimye inguzanyo banamubwira ko impamvu bayimwinye ari uko ari mu kiciro cya mbere cy’ubudehe, ko atazabona icyo yishyura.

Yagize ati “Iyi si inkuru mbarirano, ngewe ubwange nigiriye muri Koperative Umurenge Sacco ya Kimihurura gusaba inguzanyo ngo nshyire mu bikorwa ubumenyi nari maze guhabwa bwo gukora amasabuni, mbinyujije mu mushinga nari nakoze, ariko barayinyimye banagerekaho ko batampa inguzanyo kuko ndi mu kiciro cya mbere cy’ubudehe.”

Bakimbagira avuga ko n’ubwo afite ubumuga ariko afite ubumenyi bwamufasha kwishyura inguzanyo mu gihe yayihabwa, akavuga ko yazitiwe n’ikiciro cya mbere, gusa we ntiyifuza kukivamo n’ubwo kimuzitiye kuko afite ubumuga akaba agikeneye gufashwa.

Nzayino Honoré na we ni uwo mu Murenge wa Gikomero, avuga ko abari mu kiciro cya mbere badahabwa zimwe muri serivisi bakenera zirimo inguzanyo n’izindi, agasanga bituma abakirimo basuzugurwa n’abandi bantu, bakavutswa amwe mu mahirwe y’iterambere.

Kankundiye Leoncie wo mu Kagari ka Munini, Umurenge wa Gikomero ni umubyeyi w’abana batandatu akaba ari n’umupfakazi, we arashimira ubuyobozi kuko bamushyize mu kiciro cya mbere we n’umugabo we wari ufite ubumuga waje gupfa umusigiye abana batandatu, akaba yaritabye Imana yaremerewe inka, akaza kuyihabwa umugabo yarapfuye.

Ati “Nari mfite umugabo ukuze kandi ufite ubumuga, yashyizwe mu bahabwa inkunga y’ingoboka aza gusaza atarayahabwa, baje kuyampa nyuma yo kubyara inda y’impanga yari yaransigiye.”

Avuga ko ayo mafaranga y’ingoboka yamufashije kurera izo mfubyi kuri ubu akaba afite aho ageze ari nako asaba kuva mu kiciro cya mbere, agashyirwa mu kiciro cya kabiri.

Umunyamabanga Nshingwabikorwa w’Umurenge wa Gikomero Rwamucyo Louis de Gonzague ahakana ibivugwa n’aba baturage kuko ngo iyo umuntu agiye gusaba inguzanyo muri banki cyangwa muri Koperative Umurenge Sacco atabazwa ikiciro kuko ntaho gihuriye n’ibyo aba asaba.

Ashidikanya ku bivugwa n’abaturage kuko ngo gusaba inguzanyo muri banki n’ikiciro cy’ubudehe nta hantu na hamwe bihuriye, bityo akavuga ko atari byo.

Asaba abaturage kumva ko ibyiciro by’ubudehe bigamije igenamigambi bitagamije kudahabwa serivisi kuri bamwe kandi ko icyo igihugu kifuza ari uko abaturage bacyo batera imbere bakava mu kiciro cya mbere bakajya mu cya kabiri ndetse no mu cya gatatu.

Ubushakashatsi bw’Umuryango mpuzamahanga Transparency International ishami ry’u Rwanda washyize ahagaragara wagaragaje ko abaturage bakoreweho ubushakashatsi, abari mu kiciro cya mbere bemeza ko hari serivisi badahabwa bitewe n’ikiciro, harimo kwimwa inguzanyo ya banki, kwimwa urushushya rw’abajya mu mahanga ndetse ngo no kujyayo ku muntu wo mu kiciro cya mbere ngo ntibyemewe.

Muri ubu bushakashatsi abaturage bo mu kiciro cya mbere bavuga ko bimwe inguzanyo za banki kuko ngo batabona icyo bishyura, ibyo bigatuma bamwe bafata iki kiciro nk’igisuguritse abandi bakifuza kukivamo kugira ngo bagire ubwisanzure kuri izo serivisi zivuzwe haruguru.

Ubu bushakashatsi bwagaragaje ko bamwe mu baturage b’Akarere ka Rubavu bangirwa kwambuka bajya mu gihugu cya Kongo kuko bari mu kiciro cya mbere ngo batagira ibyo bangizayo kuko batabona icyo bishyura bitewe n’uko ubufasha bwose babuhabwa na Leta.

Abari mu kiciro cya mbere kandi muri ubu bushakashatsi bahimbwe amazina n’abandi baturage, aho babita infungwa za Leta, kimwe mu bituma hari abatagishaka kuguma muri iki kiciro.

Ku bijyanye n’uko hari abaturage bimwa inguzanyo n’impushya z’abajya mu mahanga, uwari Umunyamabanga wa Leta muri Minisiteri y’Ubutegetsi bw’igihugu ushinzwe imibereho myiza y’abaturage, Dr. Mukabaramba Alvere, yahakanye ibivugwa n’abaturage kuko ngo nta tegeko ribabuza kubona inguzanyo ndetse n’impushya zo kujya mu mahanga, akaba asanga haramutse hari ababibima baba bakora amakosa yo kuvutsa uburenganzira abenegihugu nta mpamvu.

Yagize ati “Ibyo nta byo nzi ndetse nta n’aho byanditse, nta tegeko ribuza abantu bo mu kiciro cya mbere cy’ubudehe guhabwa serivisi za banki n’impushya zo kujya mu mahanga ibyo byaba ari ubikora ku giti ke ariko ntaho biri nta n’itegeko ribibuza.”

Ibyiciro by’ubudehe birimo kuvugururwa bitegerezanyijwe amatsiko n’abaturage b’ingeri zose, hari abifuza kuva mu kiciro cya mbere cy’ubudehe hari n’abumva bakigumamo.

Umwanditsi:

Mugisha Benigne

Tanga Igitekerezo

Email yanyu ntigaragazwa ku rubuga. Amazina na Email ni ngombwa.