Harakorwa ubuvugizi kugira ngo inganda zitunganya ibiribwa zige zongeramo intungamubiri

Yanditswe na Tumukunde Georgine

Ku ya 19-11-2019 saa 17:08:12
Inganda zitunganya ibiribwa zisabwa kongeramo intungamubiri

Mu burenganzira bw’umuguzi harimo kugira ubuzima bwiza, akabona indyo n’ibindi byose byujuje ubuziranenge. Ni muri urwo rwego abacuruzi bakangurirwa guha abaguzi ibicuruzwa byujuje ubuziranenge ndetse n’inganda zikaba zikangurirwa kongera intungamubiri mu biribwa zitunganya kugira ngo haboneke indyo ifite ireme.

Imvaho Nshya yagiranye ikiganiro na Ndizeye Damien Umunyamabanga Nshingwabikorwa w’Umuryango uharanira uburenganzira bw’umuguzi mu Rwanda (ADECOR), umwe mu miryango ikora ubukangurambaga muri ruriya rwego, avuga ko mu nshingano bafite harimo n’iyo  kurengera Abanyarwanda mu bijyanye no kwihaza mu biribwa, kurwanya imirire mibi n’inzara.

Yasobanuye ko bafatanya n’abandi bafatanyabikorwa, binyuze mu mushinga watangiye mu mwaka wa 2016, witwa Voice for Change Partnership w’Abaholandi, ugamije kurwanya imirire, no kwihaza mu biribwa, bo bakita cyane ku bijyanye no kongera ibyo kurya byujuje intungamubiri (Fortified Food).

Ati: “Muri ubwo bufatanye twebwe nka ADECOR tukaba tureba cyane ibijyanye no kongera ibyo kurya byujuje intungamubiri”.

Ni muri urwo rwego bakangurira inganda zikora Kawunga, isukari,… kongera  intungamubiri mu byo zikora.

Avuga ko nko ku bijyanye n’umunyu ho byamaze kuba ihame ko uwinjira mu gihugu uba wongewemo Iyode.  Ati:“Tuzi ko umunyu winjira mu gihugu uba wongewemo iyode kugira ngo abantu batarwara imyingo,  kera abantu barwaraga imyingo ubu ntibakirwara”.

Yagaragaje kandi ko bafatanyije na Minisiteri y’Ubucuruzi n’Inganda na Minisiteri y’Ubuzima Ikigo cy’Ubuziranenge (RSB), n’Ikigo gishinzwe kugenzura ibyo kurya n’imiti mu Rwanda (Rwanda FDA) bakora   ubuvugizi kugira ngo habeho itegeko rigenga inganda bityo zose zige zongera intungamubiri mu byo zikora.

Ati: “Twakoze ubuvugizi, ubu hariho amabwiriza avuga ko inganda zigomba kongeramo intungamubiri, bituma Abanyarwanda bose babasha kubona indyo yuzuye, kuko na wawundi utari ubizi, ugura kawunga hafi aho atuye na we biramufasha akagira imirire myiza”.

Ndizeye avuga ko banigisha abantu kurya ibyo biribwa biba byongewemo intungamubiri kugira ngo bagire ubuzima bwiza.

Yakomeje agira ati: “Twe twahisemo kwigisha abantu kurya indyo yuzuye, bakarya ibiribwa birimo intungamubiri cyane cyane vitamini A iboneka mu ntungamubiri bongera mu biribwa by’umwihariko muri kawunga”.

Yakomeje asobanura ko bafatanyije na ziriya nzego zitandukanye barwanya imirire mibi mu bana no mu bakuze by’umwihariko abarwaye indwara yo kubura amaraso.

Bagira na gahunda yo gutegura urubyiruko n’abangavu kugira ngo mu gihe bazaba bagiye gushaka bazabe bariteganyirije; umubiri wabo ukomeye urimo intungamubiri, bikazatuma babyara  abana bashyitse kandi bafite ubuzima bwiza.

Yakomeje agira ati: “Twita no ku bagore batwite kugira ngo barye indyo yuzuye kandi babashe kugira ubumenyi  bwo kurera abana babo kugira ngo batagwa mu mirire mibi”.

Abaguzi bagomba no kubona ibiribwa byujuje ubuziranege

Ndizeye yakomeje avuga ko mu kumenyekanisha uburenganzira bw’umuguzi bwo kugira ubuzima bwiza; akabona indyo yujuje ubuziranenge, bafatanya n’izindi nzego bakagenzura ibiribwa mu maduka.

Ati: “Ku bijyanye n’uburenganzira bwo kubona indyo yuzuye kandi yujuje ubuziranenge twibanda ku maduka, tukareba ibyo kurya biri mu maduka; byakozwe ryari bizarangira ryari? Ibiva mu mahanga bizamara igihe kingana iki? Tukigisha abacuruzi ko mu gihe babona bigiye kurangiza igihe, bagomba kubivana mu maduka yabo kugira ngo ababigura bitabagiraho ingaruka”.

Ikindi abacuruzi basabwa ni ugufata neza ibicuruzwa, bakabibika ahantu haboneye kuko nubwo byaba bitarageza ku itariki bigomba kurangiriraho, mu gihe byaba bibitswe nabi nabwo byakwangiza ubuzima, atanga urugero rw’ibishobora kuzamo uruhumbu kuko byabitswe ahantu hakonje.

Asaba n’abaguzi kujya bashishoza mu kugura ibiribwa; bakareba amatariki cyangwa se ko bitangiritse.

Anenga abamamaza ibiribwa biva mu nganda bakabiha ubushobozi bidafite

Ndizeye Damien anenga abamamaza bimwe mu biribwa biba byatunganyirije mu nganda bakabikabiriza cyane ku buryo bihindukamo no kubeshya; ugasanga bavuga ko ikiribwa runaka gituma umwana amenya ubwenge mu ishuri,…kandi wanagenzura ugasanga nta n’intungamubiri n’imwe irimo, ari icyo kuryoshya mu kanwa gusa.

Ababyeyi na bo bafata ibyo biribwa bakabihata   abana kandi mu by’ukuri ibyavuzwe mu kwamamaza bidahuye n’ukuri, bigatuma ababiriye bahaga vuba ntibabashe kurya indyo nyayo umubiri wabo ukeneye.

Yibutsa ko kwamamaza ubeshya bihanwa n’amategeko bityo ntawukwiye kubikora. Ati: “Hari ingingo ivuga ibijyanye no kwamamaza, ntawukwiye kwamamaza abeshya abantu, nta bwo byemewe ndetse birahanirwa”.

Avuga ko bakomeje ubuvugizi kugira ngo ibyo bicike.

Ingingo ya 37 y’itegeko Nº36/2012 ryo ku wa 21/09/2012 rigenga ihiganwa mu bucuruzi no kurengera abaguzi  igaragaza  imigenzereze ibujijwe mu bucuruzi, ivuga ko igikorwa cyose kinyuranyije n’imigenzereze mu bucuruzi cyatuma ugurisha abangamira inyungu z’umuguzi cyangwa abandi bagurisha kibujijwe.

Mu bikorwa by’ubucuruzi bifitanye isano no kugeza ibicuruzwa cyangwa serivisi ku baguzi, igabanya ry’ibiciro muri gahunda yo kwamamaza mu buryo bushoboka bwose bwo gutanga cyangwa gukoresha ibicuruzwa cyangwa serivisi, ugurisha abujijwe kubeshya cyangwa kuyobya umuguzi mu buryo ubwo ari bwo bwose.

 

Ingingo ya 38 ivuga ko iyamamaza ryose rishobora gutuma habaho imyitwarire yangiza ubuzima cyangwa umutekano w’abantu rirabujijwe.  Naho ingingo ya 39 yo ivuga ko iyamamaza rigereranya ibicuruzwa rikorwa hagereranwa ibicuruzwa cyangwa serivisi rigaragaza mu buryo buziguye cyangwa butaziguye uhiganwa cyangwa ibicuruzwa cyangwa serivisi zikozwe n’umuntu umwe cyangwa ikigo cy’ubucuruzi kandi bitabangamiye ihiganwa.

Iyamamaza rigereranya ibicuruzwa ryemewe iyo ryujuje ibisabwa bikurikira: kutabeshya cyangwa kuba mu miterere yaryo ryatuma umuguzi yibeshya; gukorwa ku bicuruzwa cyangwa serivisi zitanga igisubizo ku bikenewe bimwe cyangwa bigamije ikintu kimwe no kugereranya nta marangamutima imiterere imwe cyangwa myinshi y’ibicuruzwa cyangwa serivisi zigereranywa.

Umwanditsi:

Tumukunde Georgine

Tanga Igitekerezo

Email yanyu ntigaragazwa ku rubuga. Amazina na Email ni ngombwa.