Handball: Police HBC mu makipe azahagararira u Rwanda muri ECAHF

Yanditswe na BUGINGO FIDELE

Ku ya 05-11-2019 saa 18:12:41
Ikipe ya Police HBC imwe muzizahagararira u Rwanda muri ECAHF

Ikipe ya Police HBC yegukanye igikombe cya  shampiyona  ya 2019 ni imwe mu makipe azahagararira u Rwanda mu mikino y’amakipe yo mu karere k’Afurika y’u Burasizuba no hagati ECAHF Senior Club Championship 2019”.

Iri rushanwa  ritegurwa n’ishyirahamwe ry’umukino wa Handball muri Afurika yo hagati n’i Burasirazuba “East and Central Handball Federation (ECHAF)”  biteganyijwe ko rizabera i Kigali mu Rwanda kuva tariki 02 kugeza 07 Ukuboza 2019.

Umunyamabanga mukuru w’ishyirahamwe ry’umukino wa Handball mu Rwanda “FERWAHAND”, Ngarambe Jean Paul yatangarije Imvaho Nshya ko hari amakipe amwe  n’amwe yamaze kwemeza ko azitabira n’andi yemeje by’agateganyo.

Mu kiciro cy’abagabo  hari Police HBC, APR HBC na Gicumbi HBT (Rwanda),  Police HBC  na TP Mazembe (RDC), JKT (Tanzania), Black Mamba Cereals (Kenya),  Lusaka Rangers (Zambia), Prisons na Ndejje University (Uganda).

Ikipe ya Gicumbi HBT (Rwanda), TP Mazembe HBC (RDC), Lusaka Rangers (Zambia),  Black Mamba Cereals (Kenya), Prisons na Ndejje University nta bwo aremeza burundu ko azitabira.

Mu bagore hari UR Rukara  na ES Kiziguro (Rwanda), Police HBC  na EVABUKA (RDC),  JKT (Tanzania),  Nairobi Water HBC  (Kenya) na Prisons HBC (Uganda). Aha naho UR Rukara na ES Kiziguro (Rwanda), Prisons (Uganda) na EVABUKA (RDC)   nta bwo izi kipe ziremeza burundu ko  zizitabira.

Iri rushanwa  riba buri mwaka, ubushize muri 2018 ryabereye muri Zanzibar aho  nta kipe yo mu Rwanda yabashije kwitabira.  Ikipe ya Police HBC yo muri RDC mu bagabo ndetse na  Nairobi Water (Kenya) mu bagore  ni zo zegukanye igikombe.

Ikipe ya Police HBC yo mu Rwanda iheruka muri iyi mikino muri 2017 ubwo yegukanaga umwanya wa 3, igikombe cyatwawe na  Ulinzi HBC mu bagabo na  Nairobi Water mu bagore.

Ubwo iri rushanwa riheruka kubera mu Rwanda muri 2015, iyi kipe ya Police HBC yitwaye neza  yegukana igikombe.

Mu rwego rwo kwitegura, ikipe ya Police HBC yatangiye imyitozo  aho ikora kuva ku wa Mbere kugeza ku wa Gatanu mbere ya saa sita. Iyi kipe uretse umukinnyi Bizimana Haruna watandukanye nayo abandi bakinnyi bose yari ifite muri uyu mwaka w’imikino barahari ndetse umukinnyi Mukunzi Felix wari wasoje amasezerano ye yamaze kuyongera.

Izindi kipe zizitabira iri rushanwa ari zo, APR HBC na Gicumbi HBT nta bwo ziratangira imyitozo gusa amakuru Imvaho Nshya ifite ni uko bagiye gutangira mu minsi ya vuba.

Ikipe ya Gicumbi HBT muri uyu mwaka yariyubatse aho yaguze abakinnyi 3 bakinaga muri APR HBC ari bo Karenzi Yannick, Muhumure Elyse na Muhawenayo Jean Paul.

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.