Kigali-Rwanda

Mostly cloudy
19°C
 

Handball: Muri ADEGI baracyafite ikizere ko bazagera ku ntego bihaye

Yanditswe na  NKOMEJE GUILLAUME

Ku ya Sep 6, 2018

Niyokwizera Joel, umutoza w’ikipe y’Urwunge rw’amashuri rwa ADEGI Gituza mu mukino wa Handball “ADEGI HBC” atangaza ko bagifite ikizere cy’uko bazasoreza mu myanya ine ya mbere muri shampiyona y’igihugu y’uyu mwaka wa 2018.

Niyokwizera Joel, umutoza w’ikipe ya ADEGI HBC

Ibi yabitangaje nyuma y’uko ikipe y’ADEGI HBC itsinzwe imikino ibiri muri 3 ya shampiyona bakinnye mu mpera z’icyumweru gishize. Muri iyi mikino irimo uwo batsinzwe na Police HBC abigoranye ku bitego 35 kuri 32, itsindwa na ES Kigoma HBC ibitego 44 kuri 38 naho itsinda Munyove HBC ibitego 42 kuri 36.

Mu kiganiro yagiranye n’Imvaho Nshya, umutoza wa ADEGI HBC, Niyokwizera Joel yatangaje ko nubwo batsinzwe iyi mikino bizeye ko bazagera ku ntego bihaye yo kurangiza mu makipe ane ya mbere muri shampiyona.  Ati Nubwo twatsinzwe iyi mikino ibiri, hakaba hasigaye umunsi umwe ngo shampiyona y’uyu mwaka igane ku musozo, ikizere kirahari ko tuzagera ku ntego twihaye.”

Niyokwizera wemeza ko ADEGI HBC yazamuye urwego rw’imikinire, avuga ko bagomba kuzatsinda umukino usoza shampiyona, iyi kipe  izahuramo na College Inyemeramihigo uzaba ku wa Gatandatu tariki 8 Kanama 2018.

Kugeza ubu, ADEGI HBC iri ku mwanya wa 3 w’agateganyo muri shampiyona, n’amanota 36 mu mikino 16, irusha Munyove HBC iyikurikira amanota 4 (32). Iri inyuma ya APR HBC ya kabiri n’ikinyuranyo cy’amanota 10 (46) ndetse na Police HBC ya mbere ikaba iyirusha amanota 15 (51).

Muri uyu mwaka w’imikino wa 2018, ADEGI HBC yegukanye ibikombe bibiri; birimo igikombe k’irushanwa “Amashuri Kagame Cup 2018”, ndetse n’igikombe k’imikino ihuza amashuri yisumbuye yo mu karere k’Afurika y’Iburasirazuba “FEASSSA 2018”.