Handball: Ikipe y’igihugu U-18 na U-20 zatangiye neza mu mikino ya zone V

Yanditswe na NKOMEJE GUILLAUME

Ku ya 14-03-2019 saa 14:46:57
Ikipe y'igihugu y'abakobwa batarengeje imyaka 20 (U20) yitwaye neza itsinda Tanzania ibitego 24 kuri 18

Ikipe y’u Rwanda y’abakobwa y’umukino wa Handball mu batarengeje imyaka 18 n’iy’abatarengeje imyaka 20 zatangiranye insinzi mu mikino y’Akarere ka 5 “IHF Challenge Trophy” irimo kubera muri Zanzibar kuva tariki 12 kugeza 17 Werurwe 2019.

Mu mikino yabaye ejo hashize tariki 13 Werurwe 2019, ikipe y’u Rwanda y’abakobwa U-20 iri mu itsinda A hamwe na Ethiopia, Kenya na Tanzania, yatangiye itsinda Tanzania ibitego 20 kuri 14.

Ni mu gihe ikipe y’u Rwanda U-18 iri mu itsinda B hamwe na Ethiopia, Djibouti n’u Burundi nayo yaje kwitwara neza itsinda Djibouti mu mukino ubanza ibitego 56 kuri 13.

Iyi mikino irakomeza uyu munsi tariki 14 Werurwe 2019, aho ikipe y’u Rwanda U-20 ikina imikino ibiri, irimo uyihuza na Kenya ikaza gukurikizaho uwa Ethiopia.

Ku ruhande rw’ikipe y’u Rwanda U-18 irahura na Ethiopie mu mukino wa kabiri w’iri rushanwa.

Ikipe y’u Rwanda U-18 ni ku nshuro ya mbere yitabiriye iyi mikino nayo irimo gukinwa bwa mbere mu gihe ikipe y’igihugu U-20 yabashije kwegukana umwanya wa 3 mu mikino y’Akarere ka 5 “IHF Challenge Trophy 2015” iheruka mu 2015.

Iyi mikino y’Akarere ka 5 igamije gushaka itike y’imikino ihuza ibihugu byitwaye neza mu turere biherereyemo “IHF Trophy Africa-Continental Phase” abazitwara neza aha bazabona itike y’imikino mpuzamigabane “IHF Trophy Intercontinental Phase” hakiyongeraho n’itike y’igikombe k’Isi by’umwihariko mu batarengeje imyaka 20.

Ikipe y’igihugu y’abakobwa batarengeje imyaka 20 (U20) yitwaye neza itsinda Tanzania ibitego 24 kuri 18

Umwanditsi:

NKOMEJE GUILLAUME

Tanga Igitekerezo

Email yanyu ntigaragazwa ku rubuga. Amazina na Email ni ngombwa.