Kigali-Rwanda

Partly sunny
26°C
 

Handball: APR HBC nta bwo izitabira irushanwa ry’igikombe k’igihugu

Yanditswe na BUGINGO FIDELE

Ku ya Aug 3, 2019

Kuri iki Cyumweru tariki 04 Kanama 2019, ishyirahamwe ry’umukino wa Handball mu Rwanda “FERWAHAND” ryateguye irushanwa ry’igikombe k’igihugu “Rwanda Cup 2019”.

Mu makipe azitabira iri rushanwa nta bwo harimo ikipe ya APR HBC yabaye iya kabiri muri shampiyona.

Iri rushanwa rikaba rizabera kuri Sitade Amahoro i Remera rikazakinwa mu bagabo n’abagore. Umunyamabanga mukuru wa FERWAHAND, Ngarambe Jean Paul yatangaje ko  iri rushanwa rizitabirwa n’amakipe 7 ni ukuvuga 4 mu bagabo n’andi 3 mu kiciro cy’abagore.

Mu bagabo amakipe azitabira ni Police HBC yegukanye shampiyona ya 2019,  Nyakabanda HBC, College Inyemeramihigo n’ikipe ya Blue Tigers.

Muri iki kiciro ikipe zizahura hagati yazo hanyuma iyitwaye neza abe ari yo yegukana igikombe.

Uko imikino izagenda

 Ikipe ya Police HBC izatangira ikina na Nyakabanda HBC (09h00), umukino ubere ku kibuga kiri inyuma ya Sitade Amahoro. Inyemeramihigo izakina na Blue Tigers (9h00), umukino ubere ku kibuga kiri muri Sitade Amahoro.

Ikipe ya Blue Tigers izakina na Nyakabanda HBC (11h00) ku kibuga kiri inyuma ya Sitade Amahoro mu gihe Police HBC izaba ikina na College Inyemeramihigo ku kibuga kiri muri Sitade Amahoro. Ikipe ya College Inyemeramihigo izakina na Nyakabanda HBC (13h00) ku kibuga kiri inyuma ya Sitade Amahoro naho Police HBC ikine na Blue Tigers (15h00) muri Sidate Amahoro.

Muri iyi mikino ni ugukina imikino 20 y’igice cya mbere bakaruhuka iminota 5 bakongera bagakina iminota 20 y’igice cya kabiri.

 Mu kiciro cy’abagore amakipe 3 ari yo UR Rukara, Masters Women na Kiziguro SS. Muri iki kiciro naho izi kipe zizakina hagati yazo iya mbere yegukane igikombe. UR Rukara izatangira ikina na Masters Women (10h00), Masters Women ikine na  Kiziguro SS (12h00) naho  Kiziguro ikine na UR Rukara (14h00).

Iyi mikino yose izabera ku kibuga kiri inyuma ya sitade Amahoro. Muri iki kiciro ni ugukina imikino 20 y’igice cya mbere bakaruhuka iminota 10 bagakina iminota 20 y’igice cya kabiri.

Mu kiciro cy’abagabo, ikipe ya APR HBC ikunze guhanganira igikombe na Police HBC nta bwo izitabira iri rushanwa dore ko nyuma ya shampiyona  batigeze bongera no gukora imyitozo. Iyi kipe ikaba itazanitabira imikino ihuza ingabo zo mu bihugu  bigize  umuryango w’ibihugu by’Afurika y’Iburasirazuba “EAC Military Games 2019” izabera muri Kenya  kuva tariki 08 Kanama 2019.

Ku ruhande rwa Police HBC iri rushanwa ry’igikombe k’igihugu ni imyiteguro myiza y’amarushanwa atandukanye izitabira arimo imikino  ihuza Abapolisi bo mu karere k’Afurika y’Iburasirazuba “EAPCCO Games 2019”  izabera i Nairobi muri Kenya kuva tariki 25 Kanama kugeza 01 Nzeri 2019. Hari kandi imikino y’Afurika y’amakipe yitwaye neza iwayo “African Handball Champions League 2019” izabera muri Cap Vert mu Kwakira 2019.

Police HBC izanitabira imikino ihuza amakipe mu karere k’Afurika y’Uburasirazuba yabaye aya mbere iwayo izaba mu Kuboza 2019.

Ikipe ya APR HBC itazitabira irushanwa ry’igikombe k’igihugu 2019