19°C , Partly cloudy | Kigali-Rwanda

Handball: Amakipe 8 yo hanze amaze kwemeza ko azitabira irushanwa ryo kwibuka

Yanditswe na BUGINGO FIDELE

Ku ya 03-06-2018 saa 09:01:00
Ikipe ya Police HBC ni yo yegukanye irushanwa riheruka itsinze APR HBC ku mukino wa nyuma

Kuva tariki 16-17 Kamena 2018 hazaba irushanwa  ryo kwibuka abari abakinnyi, abatoza n’abakunzi b’umukino wa Handball mu Rwanda bazize Jenoside yakorewe Abatutsi mu 1994 “Handball Genocide  Memorial Tournament 2018”.

Ikipe ya Police HBC ni yo yegukanye irushanwa riheruka itsinze APR HBC ku mukino wa nyuma

Umunyamabanga Mukuru w’ishyirahamwe ry’umukino wa Handball mu Rwanda “FERWAHAND”, Ngarambe Jean Paul yatangarije Imvaho Nshya ko batumiye amakipe yo mu bihugu bitandukanye muri aka karere ariko  amakipe 7 ari yo amaze kwemeza ko azitabira.

Aya makipe arimo   Police HBC, Prisons, Makelele University (Uganda), JKT , Ngome HBC (Tanzania) na Black Mamba  (Kenya) mu bagabo  ndetse na Police HBC, Prisons (Uganda) mu kiciro cy’abagore. Ngarambe yakomeje avuga ko  kuri izi kipe hashobora kwiyongeraho ikipe ya Police HBC yo muri  Sudani.

Iyi mikino izabera muri Kigali ku bibuga bisanzwe bikoreshwa birimo Sitade Amahoro ndetse na Kimisagara.

Irushanwa ryo kwibuka riheruka muri 2017, Police HBC yo mu Rwanda  yegukanye igikombe itsinze  APR HBC nayo yo mu Rwanda  ibitego 36 kuri 21  mu bagabo no mu bagore,  ikipe ya Police HBC  yo muri Uganda  yegukanye igikombe itsinze Gorillas yo mu Rwanda  ibitego 25 kuri 17.

Dore urutonde rw’abibukwa

Mu bari abakinnyi hari  Simbaburanga Evariste, Rutamu Augustin , Nsabimana Pierre Claver, Ndikubwimana Augustin, Uwitibagiwe Vital, Uwihirwe Emile, Hakizimana Leonard, Shumbusho Charles, Nsengiyumva Evariste, Ndaruhutse , Munyambano Eugene, Kabera (GS Zaza), Hakizimana Augustin, Kayirege Agatha (Nyakabanda) na Isabwe Claude (UNR).

Mu bayobozi n’abandi  hari Muhinda Ernest (Visi Perezida wa  Nyakabanda), Rubingisa Paul (umufana  wa Nyakabanda), Munyakayanza  (umuyobozi wa Kabirizi),  Rwayitare François (Perezida w’abafana   ba Nyakabanda), Mutabaruka Paul (Umunyamuryango wa Nyakabanda), Munyensanga Lambert  (Umunyamuryango wa  Nyakabanda), Uwimana Virgile (umunyamuryango  wa Nyakabanda) na Murangira Charles (Umunyamuryango  wa Nyakabanda).

 

 

 

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.