Kigali-Rwanda

Partly cloudy
17°C
 

Hamenyekanye abanyarwenya bazitabira ‘Seka Live’ n’aho izabera

Yanditswe na Gisubizo Gentil M.

Ku ya 13-11-2019 saa 10:28:52
Umunya-Nigeria Klit da Drunk yatumiwe muri Seka Live i Kigali

Abanyarwenya bakomeye muri Afurika barimo umunya-Nigeria  Afamefuna Klint Igwemba ‘Klint da Drunk’, umunya-Kenya Sande Bush wamamaye nka ‘Dr Ofweneke’,nibo bazasusurutsa abakunzi  b’ibitaramo bya “Seka Live” itegurwa na Arthur Nation ihagararirwe n’Umunyarwenya Nkusi Arthur na we utoroshye mu karere.

Muri Werurwe 2019 habaye iserukiramuco ry’urwenya “Seka Fest”.  Icyo gihe hifashishijwe abanyarwenya bakomeye muri Afurika barimo Basket Mouth [Nigeria], Eric Omondi [Kenya], Patrick Salvado, Teacher Mpampire, Alex Muhangi bo muri Uganda n’abandi bo mu Rwanda.

Mu kiganiro n’Imvaho Nshya umuyobozi wa Arthur Nation, Nkusi Arthur yavuze ko ibitaramo bigize kuba bizaba bifite umwihariko ugereranije n’ibyabibanjirije.

Yagize ati, “Igitaramo cya Seka Live kizajya kiba buri kwezi kiratangira kuri icyo cyumweru taliki ya 24 Ugushyingo…. hatumiwemo abanyarwenda bavuye hanze y’u Rwanda, harimo Dr Ofweneke umenyerewe muri Churchill show yo muri Kenya na Klit da drunk wo muri Nigeria, umwihariko tuzanye kuri iyi nshuro nuko abazaza bazirebera impano nshya muri comedy batigeze babona ahandi.”

Nkusi Arthur umuyobozi wa Arthur Nation akaba ari nawe utegura ibitaramo bya Seka Live

Yakomeje avuga ko kuri ubu ibi bitaramo byagizwe ngarukakwezi, aho muri uku kwezi k’Ugushyingo uretse bariya mpuzamahanga bavuzwe haruguru hatumiwe  kandi n’abanyarwenya b’abanyarwanda benshi batari mu bamaze iminsi bakora barimo Merci, Zaba Missed Call, Divine, Milly, Patrick n’abandi banyarwenya babarizwa muri ‘Seka’.

Iki gitaramo cy’urwenya kizaba ku cyumweru tariki 24 Ugushyingo 2019 kuri Kigali Marriott Hotel, guhera saa kumi n’ebyiri z’umugoroba kizayoborwa na Nkusi Arthur.

Kwinjira muri ibi bitaramo ni 10.000 Frw mu myanya isanzwe na 20.000 Frw mu myanya y’icyubahiro (VIP).

Klint da Drunk watumiwe i Kigali ni umunya-Nigeria kavukire w’umunyarwenya, umukinnyi wa filime w’umunyamuziki uzi no kubyina.

Yavukiye muri Leta ya Anambara kuwa 03 Werurwe 1975, yujuje imyaka 44 y’amavuko. Yamenyekanye guhera mu mwaka wa 1991 ashakana na Lilien Klint-Igwemba bafitanye abana batatu.

Ni ku nshuro ya kabiri Klint da Drunk agiye gutaramira i Kigali kuko no kuwa 26 Werurwe 2018 yatanze ibyishimo muri ‘Seka Festival’. Yateye urwenya igihe kinini mu bitaramo bya “Night of Thousand Laugh” byari biyobowe na Opa Willims muri Nigeria.

Yifashishijwe muri filime nyinshi nka ‘Destroyer’, ‘Chain Reaction’, ‘Lost Kingdom’, ‘My house help’ n’izindi.   Mu mwaka wa 2012 yabwiye ikinyamakuru The Standardmedia ko atigeze amenya inkomoko y’izina rye, Dr Ofweneke.

Dr.Ofweneke ari mu bazasusutsa abazitabira ‘Seka Live’

Yavuze ko akiri umwana yakundaga gutera urwenya mu isanteri bamubaza izina atararivuga bakamubwira ko asa na Dr Ofweneke ariko atazi inkomoka yaryo.

Igihe kimwe agiye gushaka akazi yabajijwe izina azakoresha mu mwuga wo gusetsa ahitamo Dr Ofweneke yahawe n’abo yarishije imbavu igihe kinini. Yavuze ko umwuga wo gutera urwenya yawushyizemo imbaraga ageze mu mashuri yisumbuye.

Uyu mugabo yakuriye mu Burengerazuba w’Umujyi wa Nairobi. Amashuri abanza yize kuri Nabongo, Malava na Ikonyero ayisumbuye yiga mu Mujyi wa Nairobi na Mwea.

Yivuga nk’umugabo ucishije bugufi mu Isi ariko kandi ‘uteza urusaku’. Byamufashe igihe kinini kugira ngo yemeze abafana ko ari umunya-Kenya kuko benshi bavuga ko afite inkomoko muri Nigeria. Mu bantu afatiraho urugero harimo na Klint da Drunk bazahurira mu gitaramo kimwe i Kigali.

Umwanditsi:

Gisubizo Gentil M.

Tanga Igitekerezo

Email yanyu ntigaragazwa ku rubuga. Amazina na Email ni ngombwa.