Hagiye kuba imikino ya nyuma y’irushanwa ry’Intwari

Yanditswe na BUGINGO FIDELE

Ku ya 31-01-2018 saa 10:12:35
Ubwo abakinnyi ba Rayon Sports bari mu myitozo bitegura umukino wa APR FC

Tariki 01-2-2018

Police FC-AS Kigali (Amahoro-13h00)
APR FC-Rayon (Amahoro-15h30)

Ejo tariki 01 Gashyantare 2018, kuri Sitade Amahoro i Remera hazabera imikino isoza irushanwa ry’Intwari mu mupira w’amaguru “Heroes Cup tournament 2018”.

Ubwo abakinnyi ba Rayon Sports bari mu myitozo bitegura umukino wa APR FC

Iyi mikino yahuje amakipe yasoje ku myanya 4 ya mbere muri shampiyona ya 2016-2017 ari yo Rayon Sports, PoliceFC,  APR FC na AS Kigali. Aya makipe yagombaga gukina hagati yayo, ikipe ifite amanota menshi akaba ari yo  yegukana igikombe.

Ku munsi wa mbere w’iyi mikino tariki 20 Mutarama 2018, ikipe ya Police FC yatsinze APR FC igitego 1-0 naho Rayon Sports inganya na AS Kigali 0-0. Umunsi wa kabiri, APR FC yanganyije na AS Kigali  ibitego 2-2 naho Rayon Sports itsinda Police FC ibitego 4-0.

Rayon Sports, Police FC na AS Kigali zifite amahirwe yo kwegukana igikombe

Ubwo iyi mikino izaba isozwa, ikipe ya AS Kigali izakina na Police FC (13h00) naho APR FC ikine na Rayon Sports (15h30).

Mbere y’iyi mikino ya nyuma, Rayon Sports ifite amanota 4 n’ibitego 4 izigamye, ikurikiwe na Police FC ifite amanota 3 n’umwenda w’ibitego 4. Ku mwanya wa 3 hari AS Kigali n’amanota 2 nta mwenda nta n’igitego izigamye naho APR FC ni iya 4 n’inota rimwe n’umwenda w’igitego 1.

Ku rupapuro, Rayon Sports ni iyo ifite amahirwe menshi yo kwegukana iki gikombe gusa AS Kigali na Police FC nazo zifite amahirwe. AS Kigali iramutse itsinze Police FC yagira amanota 5  mu gihe APR FC yatsinda  Rayon Sports, AS Kigali yatwara igikombe. Police FC yo yatwara iki gikombe ibashije gutsinda AS Kigali, Rayon Sports igatsindwa cyangwa ikanganya. Mu gihe AS Kigali na Police FC zanganya, Rayon Sports izaba isabwa kunganya gusa.

Umukino uri kuvugwa cyane ni uzahuza APR FC na Rayon Sports kuko aya makipe asanzwe ahangana. APR FC itakaje uyu mukino  yaba ari inshuro ya 3 itsinzwe na Rayon Sports. N’ubwo yatsinda ntabwo yakwegukana igikombe kuko cyatwarwa na AS Kigali cyangwa Police FC. Igisigaye kuri iyi kipe akaba ari ukwihesha icyubahiro imbere ya mukeba.

Ubwo ikipe ya Rayon Sports yasubukuraga imyitozo yitegura uyu mukino tariki 29 Mutarama 2019, umutoza  w’iyi kipe Karekezi Olivier yatangaje ko abakinnyi be bose bameze neza  ko n’abari kumwe n’ikipe y’igihugu bose baje uretse Manzi wagize imvune ariko idakanganye.  Uyu mutoza avuga ko umukino wa APR FC uzaba ukomeye  kuko ari ikipe nziza ariko ko biteguye kwitwara neza.

Ku ruhande rw’ikipe ya APR FC, umutoza  Mulisa Jimmy yatangaje ko  bagomba gukora uko bashoboye bakitwara neza kuri uyu mukino kandi ko bishoboka kuko abakinnyi be bose bahari kandi bameze neza.

Ikipe izitwara neza ikegukana iki gikombe izahabwa miliyoni 6 z’amafaraga y’u Rwanda, ikipe ya kabiri izahabwe miliyoni 3, ikipe ya gatatu  ihabwe miliyoni 2 naho iya nyuma ya kane ihabwe miliyoni 1. APR FC ni yo yegukanye iki gikombe  umwaka ushize wa 2017 itsinze Rayon Sports igitego 1-0.

 

 

 

 

 

 

 

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.